ବଣାଇ, ୧୪/୧୨: ହାତୀ ଟ୍ରାକିଂ କରିବା ପାଇଁ ଯାଇଥିବା ବେଳେ ଆକ୍ରମଣ କଲା ଦନ୍ତା । ଏହି ଆକ୍ରମଣରେ ପାରା କର୍ମଚାରୀ ଲୁଧିଆ ସିଂ ଗୁରୁତର ହୋଇଥିଲେ । ହାତୀ ଆକ୍ରମଣରେ ତାଙ୍କ ଗୋଡ଼, ଛାତି ପିଞ୍ଜରା ଭାଙ୍ଗି ଯାଇଥିବା ବେଳେ କ୍ୟାମେରା ମଧ୍ୟ ଭାଙ୍ଗି ଯାଇଛି । ସୁନ୍ଦରଗଡ଼ ଜିଲ୍ଲା ତାମଡା ରେଞ୍ଜର ସାପଲତା ବିଟର ରୁଷି ମଠ ଜଙ୍ଗଲରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ରୁଷି ମଠ ଜଙ୍ଗଲରେ ହାତୀ ଥିବା ଜାଣି ବନ କର୍ମଚାରୀ ହାତୀ ଟ୍ରାକିଂ ଲାଗି ଯାଇ ଥିବାବେଳେ ହଠାତ୍ ଦନ୍ତା ଆକ୍ରମଣ କରିଥିଲା । ହାତୀ ଭୟରେ ବନ କର୍ମଚାରୀ ଯିଏ ଯୁଆଡେ ପଳାଇ ଥିବା ବେଳେ ଜଣେ ପାରା କର୍ମଚାରୀକୁ ହାତୀ ଆକ୍ରମଣ କରିଥିଲା । ଫଳରେ ତାଙ୍କ ଗୋଡ଼, ଛାତି ପିଞ୍ଜରା ଭାଙ୍ଗି ଯାଇଥିବା ବେଳେ ସେ ଏକ ପଥର ପାଖରେ ପଡି ଯାଇଥିଲେ । ହାତୀ ଭୟରେ ଯିଏ ଯୁଆଡେ ପଳାଇ ଥିବା ବେଳେ ଲୁଧିଆ ସିଂ ନଆସିବାରୁ ତାକୁ ବନ କର୍ମଚାରୀ ରାତିରେ ଖୋଜିଥିଲେ । ବହୁ ଖୋଜିବା ସତ୍ତ୍ୱେ ତାଙ୍କର କୌଣସି ପତ୍ତା ମିଳି ନଥିଲା । ପ୍ରାୟ ୮ଘଣ୍ଟା ପରେ ଶନିବାର ସକାଳୁ ତାକୁ ଉଦ୍ଧାର କରି ଡାକ୍ତରଖାନାକୁ ଚିକିତ୍ସା ପାଇଁ ନେଇଥିଲେ । ଗୁରୁତର ଲୁଧିଆ ସିଂ ବର୍ତ୍ତମାନ ରାଉରକେଲାରେ ଚିକିଶ୍ଚିତ ହେଉଛନ୍ତି ।
