ହିନ୍ଦୋଳ ୦୧/୦୬: ହିନ୍ଦୋଳ ଏନଏସି ଇଲାକାର ଏକ ଫାର୍ମ ପରିସରରେ ଏକ ମୃତହାତୀ ପୋତାଯାଇଛି । ହାତୀର ମୃତ୍ୟୁ ପରେ ଘଟଣାକୁ ଚପାଇବାକୁ ଯାଇ ଫାର୍ମ ପରିସରରେ ଗାତଖୋଳି ମୃତଦେହ ପୋତି ଦିଆଯାଇଛି ବୋଲି ସୂଚନା ପାଇବା ପରେ ବନ ବିଭାଗ ତନାଘନା ଚଳାଇଛି । ଫାର୍ମ ପରିସରରେ ବନ କର୍ମଚାରୀ ଜଗି ରହିଛନ୍ତି। ଫାର୍ମ୍ର ମାଲିକଙ୍କ ସମେତ ୩ ଜଣଙ୍କୁ ବନ ବିଭାଗ ଅଟକ ରଖି ଜେରା କରୁଛି । ଏ ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ।
ପ୍ରକାଶ ଯେ, ହିନ୍ଦୋଳ ଏନଏସି ୧୪ ନମ୍ୱର ୱାର୍ଡ ଚରଣପୁରଠାରେ ରହିଛି ଏହି ୪ ଏକରର ଫାର୍ମ ରହିଛି । ଫାର୍ମ ଚତୁର୍ପାଶ୍ୱର୍ରେ ସୌରାଲୋକ ବ୍ୟବସ୍ଥା ହୋଇଛି । ସୌରବାଡ଼ ବି ଦିଆଯାଇଛି । ବିଦ୍ୟୁତ୍ କରେଣ୍ଟ ସଂସ୍ପର୍ଶରେ ଆସି ହାତୀଟି ମୃତ୍ୟୁମୁଖରେ ପଡ଼ିଥିବ ହିନ୍ଦୋଳ ବନ ବିଭାଗ ସନ୍ଦେହ କରିଛି । ହାତୀ ମୃତ୍ୟୁ ପରେ ଘଟଣା ଲୁଚାଇବାକୁ ଫାର୍ମ ପରିସରରେ ଜେସିବିରେ ମାଟି ଖୋଳି ମୃତଦେହ ପୋତି ଦିଆଯାଇଛି ବୋଲି ବନ ବିଭାଗ ଆଶଙ୍କା କରିଛି । ବିଶ୍ୱସ୍ତ ସୂତ୍ରରୁ ଖବର ପାଇ ହିନ୍ଦୋଳ ବନ ବିଭାଗ ପକ୍ଷରୁ ଘଟଣା ସ୍ଥଳରେ ତନାଘନା କରାଯାଇଛି । ପୋତା ଯାଇଥିବା ଜାଗା ଚିହ୍ନଟ କରାଯାଇଛି ।
ଅଧିକ ପଢ଼ନ୍ତୁ :- Parking Issues: ଭୋକ ବଢ଼ାଉଛି ରାଜଧାନୀ ଟ୍ରାଫିକ୍
ରବିବାର ସନ୍ଧ୍ୟା ହେବାରୁ ସେହି ସ୍ଥାନକୁ ବନ କର୍ମଚାରୀ ଜଗି ରହିଥିଲେ । ଆଜି ସେହି ସ୍ଥାନରୁ ମାଟିଖୋଳି ମୃତଦେହ ଉଦ୍ଧାର କରାଯିବ ବୋଲି ସୂଚନା ମିଳିଛି । ସେପଟେ ଫାର୍ମମାଲିକ ଓ ତାଙ୍କର ଦୁଇ ସହଯୋଗୀଙ୍କୁ ବନ କାର୍ଯ୍ୟାଳୟରେ ଅଟକ ରଖାଯାଇଛି । ଘଟଣା ସ୍ଥଳରେ ଏସିଏଫ କୁଞ୍ଜ ବିହାରୀ ନାୟକ, ରେଞ୍ଜର ତ୍ରିଲୋଚନ ଦେହୁରୀ, ଫରେଷ୍ଟର ଦୀପ୍ତିରଞ୍ଜନ ଆଚାର୍ଯ୍ୟ, ଗାର୍ଡ ଦିପୁ ରଞ୍ଜନ ଖିଲାରଙ୍କ ସହିତ ହିନ୍ଦୋଳ ପୁଲିସ ଅଧିକାରୀମାନେ ଉପସ୍ଥିତ ରହି ତଦନ୍ତ ଆରମ୍ଭ କରିଛନ୍ତି । ଏ ସମ୍ପର୍କରେ ରେଞ୍ଜର ଶ୍ରୀ ଦେହୁରୀ କହିଛନ୍ତି, ଫାର୍ମ ପରିସରରେ ହାତୀ ପୋତା ଯାଇଥିବା ଖବର ପାଇ ସେହି ସ୍ଥାନରେ ଜଗି ରହିଛୁ । ଆଜି ସେହି ସ୍ଥାନ ଜେସିବି ଦ୍ୱାରା ଖୋଳାଯିବା ପରେ ପ୍ରକୃତ ଘଟଣା ସ୍ପଷ୍ଟ ହେବ ।
