ରାଇକିଆ,୩୦।୫ : ରାଇକିଆ ବ୍ଲକ୍ ଅନ୍ତର୍ଗତ ଅପହଞ୍ଚ ଘଞ୍ଚ ଜଙ୍ଗଲ କରଡ଼ା ରେଞ୍ଜର ଇନ୍ଦ୍ରଗଡ ସେକ୍ସନରେ ହାତୀପଲଙ୍କ ଉପଦ୍ରବ। ଏଥିରେ ଲୋକଙ୍କ ଫସଲ ନଷ୍ଟ ହେବା ସହ ଚାରି ଜଣଙ୍କ ଘର ଭାଙ୍ଗିରୁଜି ନଷ୍ଟ ହୋଇଯାଇଛି।
ଗଞ୍ଜାମ ଜିଲ୍ଲା ମୁଜାଗଡ ରେଞ୍ଜରୁ ୨୬ ଟିକିଆ ହାତୀପଲ ଗତ କିଛି ଦିନ ହେଲା କରଡ଼ା ରେଞ୍ଜରେ ଚଳପ୍ରଚଳ କରୁଛନ୍ତି। ମଙ୍ଗଳବାର ବିଳମ୍ବିତ ରାତିରେ ଗାନ୍ଧାରୀ ଭୂଇଁ ଗ୍ରାମରେ ହାତୀପଲଙ୍କ ଉପଦ୍ରବ ଦେଖିବାକୁ ମିଳିଥିଲା। ହାତୀ ଉପଦ୍ରବରେ ମଲ ନାୟକ, ଚକ୍ର ନାୟକ, ଖଦାଳ ନାୟକ, ମନୋଜ ମଲ୍ଲିକଙ୍କ ଘର ଭାଙ୍ଗିଛି। ଏଥିରେ କ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ସହାୟତା ଯୋଗାଇବା ପାଇଁ ଦାବୀ କରାଯାଇଛି। ହାତୀପଲଙ୍କ ଉପଦ୍ରବ ଯୋଗୁଁ ଗ୍ରାମବାସୀ ଭୟଭୀତ ଅବସ୍ଥାରେ ଅଛନ୍ତି।
