ନୂଆଦିଲ୍ଲୀ: ଟେସଲା ସିଇଓ ଏଲନ ମସ୍କ ସାମାଜିକ ଗଣମାଧ୍ୟମ ଏକ୍ସ (X)ରେ କରିଥିବା ଏକ ପୋଷ୍ଟ ହଟାଇ ଦେଇଛନ୍ତି। ଯେଉଁଥିରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଦିବଂଗତ ଯୌନ ଅପରାଧୀ ଜେଫ୍ରୀ ଏପଷ୍ଟୀନଙ୍କ ଫାଇଲରେ ନାମିତ ଥିବା ନେଇ ଅଭିଯୋଗ କରିଥିଲେ। ଏହି ପଦକ୍ଷେପ ମସ୍କ ଏବଂ ଟ୍ରମ୍ପଙ୍କ ମଧ୍ୟରେ ଚାଲିଥିବା ବିବାଦରେ ଏକ ସମ୍ଭାବ୍ୟ ବୁଝାମଣାକୁ ସୂଚାଇଛି। ତେବେ ପୂର୍ବରୁ ରାଜନୈତିକ ସହଯୋଗୀ ଥିବା ଦୁଇଜଣ ବର୍ତ୍ତମାନ କିପରି ପରସ୍ପରକୁ ଆକ୍ରମଣ କରିବାକୁ ମଧ୍ୟ ପଛାଉନାହାନ୍ତି ତାହା ଲୋକମାନଙ୍କୁ ଚକିତ କରିବାରେ ଲାଗିଛି।
ସୂଚନା ମୁତାବକ, ଗତ ମାସରେ ମସ୍କ ଡିପାର୍ଟମେଣ୍ଟ ଅଫ ଗଭର୍ଣ୍ଣମେଣ୍ଟ ଏଫିସିଏନ୍ସି (DOGE) ଛାଡ଼ିଥିଲେ। ଏବଂ ଟ୍ରମ୍ପଙ୍କ ସହିତ "ବିଗ୍, ବ୍ୟୁଟିଫୁଲ ବିଲ" (ଖର୍ଚ୍ଚ ବିଲ) ଏବଂ ବିସ୍ତୃତ ଟିକସ କାଟ ନେଇ ଉଭୟଙ୍କ ମଧ୍ୟରେ ମତାନ୍ତର ସୃଷ୍ଟି ହୋଇଥିଲା। ଗୁରୁବାର ଦିନ, ମସ୍କ ଏକ ପୋଷ୍ଟରେ ଅଭିଯୋଗ କରିଥିଲେ ଯେ ବର୍ତ୍ତମାନ ସୁଦ୍ଧା ସାର୍ବଜନୀନ ହୋଇନଥିବା ଏପଷ୍ଟୀନ ଫାଇଲରେ ଟ୍ରମ୍ପଙ୍କର ମଧ୍ୟ ନାମ ଅଛି। ମସ୍କଙ୍କ ଏହି ପୋଷ୍ଟ ଏହା ହିଁ ଫାଇଲ ପ୍ରକାଶ ନ ହେବାର ପ୍ରକୃତ କାରଣ ବୋଲି ସୂଚାଇ ଦେଇଥିଲା। ସେ ଲେଖିଥିଲେ, "ସମୟ ଆସିଛି ପ୍ରକୃତ ବୋମା ଫୁଟାଇବାର, ଡୋନାଲ୍ଡ ଟ୍ରମ୍ପଙ୍କ ନାମ ଏପଷ୍ଟୀନ ଫାଇଲରେ ଅଛି। ଏହା ହିଁ ଏହି ଫାଇଲକୁ ସାର୍ବଜନିନ କରା ନଯିବାର ପ୍ରକୃତ କାରଣ। ଶୁଭ ଦିନ, DJT!" ଏହା ପରେ ସେ ଆଉ ଏକ ପୋଷ୍ଟ ମଧ୍ୟ କରିଥିଲେ, "ଭବିଷ୍ୟତ ପାଇଁ ଏହି ପୋଷ୍ଟକୁ ଚିହ୍ନିତ କରନ୍ତୁ। ପରେ ସତ ଜଣାପଡିବ।" ତେବେ ବର୍ତ୍ତମାନ ତାଙ୍କ ଏକ୍ସ ହ୍ୟାଣ୍ଡେଲରୁ ଦୁଇଟିଯାକ ପୋଷ୍ଟ ବର୍ତ୍ତମାନ ହଟାଇ ଦିଆଯାଇଛି।
ଏହି ଅଭିଯୋଗ ମସ୍କ ଏବଂ ଟ୍ରମ୍ପଙ୍କ ମଧ୍ୟରେ ଚାଲିଥିବା ସାମାଜିକ ଗଣମାଧ୍ୟମ ବିବାଦର ଏକ ଅଂଶ ଥିଲା। ଯେଉଁଥିରେ ଟ୍ରମ୍ପ ମସ୍କଙ୍କୁ "ଟ୍ରମ୍ପ ଡିରେଞ୍ଜମେଣ୍ଟ ସିଣ୍ଡ୍ରୋମ"ରେ ଆକ୍ରାନ୍ତ ହେବା ଅଭିଯୋଗ କରିଥିଲେ ଏବଂ ମସ୍କଙ୍କ କମ୍ପାନୀ ଟେସଲା ଏବଂ ସ୍ପେସଏକ୍ସ ପାଇଁ ଫେଡେରାଲ ଚୁକ୍ତି ବାତିଲ କରିବାକୁ ଧମକ ଦେଇଥିଲେ। ମସ୍କଙ୍କ ଏପଷ୍ଟୀନ ଅଭିଯୋଗ ୧୯୯୨ ମସିହାରେ ହୋଇଥିବା ମାର-ଆ-ଲାଗୋ ପାର୍ଟିରେ ଟ୍ରମ୍ପ ଏବଂ ଏପଷ୍ଟୀନଙ୍କୁ ଏକାଠି ଦେଖାଇଥିବା ଏକ ଭିଡିଓ ସହିତ ସମ୍ପର୍କିତ ଥିଲା, ଯାହାକୁ ନେଇ ମସ୍କ ଏକ୍ସରେ ଏକ ପୋଷ୍ଟ ସେୟାର କରିଥିଲେ।
ଏପଷ୍ଟୀନ ଫାଇଲ ସମ୍ପର୍କରେ ଭିନ୍ନଭିନ୍ନ ପ୍ରକାର ଅନୁମାନ କରାଯାଉଛି। ଅନେକେ ବିଶ୍ୱାସ କରୁଛନ୍ତି ଯେ ସରକାର ଜାଣିଶୁଣି ଏହାକୁ ଗୁପ୍ତ ରଖିବାକୁ ଚେଷ୍ଟା କରୁଛନ୍ତି। ୨୦୨୫ ଫେବୃଆରୀରେ, ଆଟର୍ନୀ ଜେନେରାଲ ପାମ ବଣ୍ଡି ଜଷ୍ଟିସ ଡିପାର୍ଟମେଣ୍ଟରୁ କିଛି ନଥିପତ୍ର ପ୍ରକାଶ କରିବାକୁ ଆଦେଶ ଜାରି କରିଥିଲେ। କିନ୍ତୁ ଅଧିକାଂଶ ତଥ୍ୟ ପୂର୍ବରୁ ଜାରି ହୋଇଥିବା ନଥିପତ୍ର, ମୋକଦ୍ଦମା ଏବଂ ଫ୍ରିଡମ ଅଫ ଇନଫରମେସନ ଆକ୍ଟ (FOIA) ଅନୁରୋଧ ମାଧ୍ୟମରେ ଉପଲବ୍ଧ ଥିଲା। ଏହା ସହିତ, ୨୦୧୪ରେ ଏଲନ ମସ୍କଙ୍କୁ ଏପଷ୍ଟୀନଙ୍କ ଦୀର୍ଘକାଳୀନ ସହଯୋଗୀ ତଥା ପୂର୍ବତନ ଗର୍ଲଫ୍ରେଣ୍ଡ ଘିସଲେନ ମ୍ୟାକ୍ସୱେଲଙ୍କ ସହ ଥିବା ହଲିଉଡ ପାର୍ଟିର ଏକ ଫୋଟୋଚିତ୍ର ପୁଣି ଅନଲାଇନରେ ଭାଇରାଲ ହେବାରେ ଲାଗିଛି। ମ୍ୟାକ୍ସୱେଲଙ୍କୁ ୨୦୨୧ରେ ଏପଷ୍ଟୀନଙ୍କ ଯୌନ ଶୋଷଣ କାର୍ଯ୍ୟରେ ସହାୟତା କରିବା ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଥିଲା। ତେବେ ସେହି ସମୟରେ ମସ୍କ ଏହି ଫୋଟୋକୁ ଏକ "ଫୋଟୋବମ୍ବ" ବୋଲି କହି ଖାରଜ କରିଥିଲେ।
ମସ୍କଙ୍କ ଏହି ପୋଷ୍ଟ ହଟାଇବା ଘଟଣା ସୋସିଆଲ ମିଡିଆରେ ବ୍ୟାପକ ଆଲୋଚନାର କାରଣ ହୋଇଛି। ଅନେକ ଏକ୍ସ ବ୍ୟବହାରକାରୀ ଏହାକୁ ମସ୍କ ଓ ଟ୍ରମ୍ପଙ୍କ ମଧ୍ୟରେ ସମ୍ଭାବ୍ୟ ବନ୍ଧୁତାର ସଙ୍କେତ ବୋଲି ମନ୍ତବ୍ୟ କରିଛନ୍ତି। ତେବେ, ମସ୍କ କୌଣସି ପ୍ରମାଣ ବିନା ଏହି ଅଭିଯୋଗ କରିଥିଲେ। ଏବଂ ହ୍ୱାଇଟ ହାଉସ ଏହାକୁ ଏକ "ଦୁର୍ଭାଗ୍ୟଜନକ ଘଟଣା" ବୋଲି କହି ଖାରଜ କରିଛି। ଟ୍ରମ୍ପ ଏବଂ ଏପଷ୍ଟୀନଙ୍କ ମଧ୍ୟରେ ପୂର୍ବରୁ ଜଣାଶୁଣା ସାମାଜିକ ସମ୍ପର୍କ ଥିଲା, ଯେପରିକି ୧୯୯୦ ଦଶକରେ ପାମ ବିଚରେ ଏକାଠି ଦେଖାଯିବା। କିନ୍ତୁ ଟ୍ରମ୍ପ ଏନେଇ କହିଛନ୍ତି ଯେ ସେ ବହୁ ଆଗରୁ ଏପଷ୍ଟୀନଙ୍କ ସହ ସମ୍ପର୍କ ଛିନ୍ନ କରିସାରିଛନ୍ତି।
ଏହି ବିବାଦ ମସ୍କ ଏବଂ ଟ୍ରମ୍ପଙ୍କ ମଧ୍ୟରେ ଚାଲିଥିବା ରାଜନୈତିକ ଏବଂ ଆର୍ଥିକ ମତଭେଦକୁ ଆହୁରି ତୀବ୍ର କରିଛି। ଯାହା ଟେସଲାର ଷ୍ଟକରେ ୧୮% ପର୍ଯ୍ୟନ୍ତ ହ୍ରାସ ଘଟାଇଛି। ଏପଷ୍ଟୀନ ଫାଇଲ ଏବଂ ଏହାର ସମ୍ଭାବ୍ୟ ପ୍ରଭାବ ସମ୍ପର୍କରେ ଜନସାଧାରଣଙ୍କ ମଧ୍ୟରେ ଆଲୋଚନା ଜାରି ରହିଛି।
