ନୂଆଦିଲ୍ଲୀ,୧୨/୦୮: ଟେସଲା ସିଇଓ ଏଲନ୍ ମସ୍କ ପ୍ରାୟତଃ ତାଙ୍କ ବୟାନ ପାଇଁ ଚର୍ଚ୍ଚାରେ ଥାନ୍ତି। ନିକଟରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ମତଭେଦ ଯୋଗୁଁ ଅନେକ ବିବାଦରେ ଥିଲେ। ଆଉ ଏବେ ସେ ଜାପାନ ବିଷୟରେ ଏପରି ଏକ ବୟାନ ଦେଇଛନ୍ତି, ଯାହା ସାରା ବିଶ୍ୱରେ ଆଲୋଚନା ହେଉଛି। ସେ ଜାପାନ ବିଷୟରେ କହିଛନ୍ତି ଯେ ୨୦୨୬ ପୂର୍ବରୁ ଅର୍ଥାତ ଚଳିତବର୍ଷ ଏଠାରେ ପ୍ରାୟ ଦଶ ଲକ୍ଷ ଲୋକଙ୍କ ମୃତ୍ୟୁ ହୋଇପାରେ। ଟେସଲାର ସିଇଓ ଆହୁରି କହିଛନ୍ତି ଯେ, ଏହି ସମୟରେ ଏଠାକାର ଲୋକଙ୍କ କେବଳ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ହିଁ ସହାୟ ହୋଇପାରିବ। ଏହା ପଛରେ ତାଙ୍କର ଚିନ୍ତାଧାରା ସୋସିଆଲ ମିଡିଆରେ ସେୟାର କରି ସେ କହିଛନ୍ତି ଯେ,  ଏହାର କାରଣ ଜନ୍ମ ଏବଂ ମୃତ୍ୟୁ ମଧ୍ୟରେ ଥିବା ବିରାଟ ପାର୍ଥକ୍ୟ। ଗତ କିଛି ଦଶନ୍ଧି ମଧ୍ୟରେ ଏହି ପାର୍ଥକ୍ୟ ବହୁତ ବୃଦ୍ଧି ପାଇଛି। ନିଶ୍ଚିତ ଭାବରେ ଜାପାନରେ ଜନସଂଖ୍ୟା ହ୍ରାସ ଦେଶ ପାଇଁ ଏକ ବଡ଼ ବିପଦ ହେବ, କାରଣ କାର୍ଯ୍ୟଶକ୍ତି ହ୍ରାସ ପାଇବ ଏବଂ ସ୍ୱାସ୍ଥ୍ୟ ଶିଳ୍ପ ଉପରେ ଚାପ ବୃଦ୍ଧି ପାଇବ। ଏହା ଏପରି ଏକ ଜନସଂଖ୍ୟାଗତ ପରିବର୍ତ୍ତନ ହେବ ଯାହା କେବଳ AI ସାହାଯ୍ୟରେ କ୍ଷତିପୂରଣ କରାଯାଇପାରିବ, ଯାହା ଦ୍ୱାରା ବୃଦ୍ଧମାନଙ୍କୁ ସାହାଯ୍ୟ କରାଯାଇପାରିବ।

ମସ୍କ ଆହୁରି ବି କହିଛନ୍ତି, ଜନସଂଖ୍ୟାଗତ ହ୍ରାସ ମଧ୍ୟରେ କିପରି ଅର୍ଥନୈତିକ ସନ୍ତୁଳନ ବଜାୟ ରଖାଯିବ ସେ ବିଷୟରେ ଅନେକ ବିଶେଷଜ୍ଞ ଏବଂ ନୀତି ନିର୍ଦ୍ଧାରକମାନେ ପୂର୍ବରୁ କହିସାରିଛନ୍ତି। ମସ୍କ ବିଶ୍ବାସ କରନ୍ତି ଯେ, ଏଆଇ  ବ୍ୟବହାର କରି ଏହାକୁ ମୁକାବିଲା କରାଯାଇପାରିବ। ବୃଦ୍ଧମାନଙ୍କୁ ସ୍ୱାସ୍ଥ୍ୟସେବା ଯୋଗାଇବା ଠାରୁ ଆରମ୍ଭ କରି କର୍ମକ୍ଷେତ୍ରରେ ଏହାର ବ୍ୟବହାର ପର୍ଯ୍ୟନ୍ତ, ଏହା ଦେଶକୁ ପରିବର୍ତ୍ତନ କରିପାରିବ। ପ୍ରକାଶ ଥାଉକି, ଜାପାନରେ ପ୍ରଜନନ ହାର ବହୁତ କମ୍। ଏହା ସହିତ, ଶିଶୁ ଯତ୍ନ ମଧ୍ୟ ବହୁତ ମହଙ୍ଗା। ଜାପାନ ସରକାର ଏବଂ ଗଣମାଧ୍ୟମର ରିପୋର୍ଟ ଅନୁଯାୟୀ, ଗତ କିଛି ବର୍ଷ ମଧ୍ୟରେ ଜନ୍ମ ଅପେକ୍ଷା ପ୍ରାୟ ୯ ଲକ୍ଷରୁ ଅଧିକ ମୃତ୍ୟୁ ଘଟିଛି।