ନୂଆଦିଲ୍ଲୀ ୧୨/୧୨: ପ୍ରଦୂଷଣ ସଂପର୍କରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଉତ୍ତରପ୍ରଦେଶର ଜଣେ ଯୁବକ ଏକ ନିଆରା ଉପାୟ ଅବଲମ୍ବନ କରିଛନ୍ତି । ଗତ ସୋମବାର ସେ ପ୍ରାୟ ୧୦୦ ଜଣ ବରଯାତ୍ରୀଙ୍କ ସହିତ ୧୦ କିମି ସାଇକେଲ ଚଳାଇ ବାହା ହେବାକୁ ପହଞ୍ଚିଥିଲେ । ଶେରୱାନି ପରିହିତ ବରଙ୍କୁ ସାଇକେଲ୍ ଚଳାଉଥିବା ଦେଖି ରାସ୍ତାରେ ଅନେକ ଲୋକ ଭିଡିଓ କରିଥିଲେ । ଘଟଣାଟି ପ୍ରତାପଗଡ଼ ଜିଲ୍ଲା ବିଶ୍ୱନାଥଗଞ୍ଜ ଅଞ୍ଚଳର ।
ସେଠାରେ କୃଷି ବିଭାଗରେ ଇଞ୍ଜିନିୟର ଭାବେ କାର୍ଯ୍ୟରତ ନମନ ତିୱାରୀଙ୍କର ବିବାହ ଛଅମାସ ପୂର୍ବରୁ ପ୍ରୟାଗରାଜର ପ୍ରିଂଶୁ ମିଶ୍ରାଙ୍କ ସହିତ ସ୍ଥିର ହୋଇଥିଲା । ନମନଙ୍କ ପିତା ଅଜୟ ତିୱାରୀ ପରିବେଶ ସେନା ନାମକ ଏକ ସଂସ୍ଥାର ମୁଖ୍ୟ ଅଛନ୍ତି । ସେ ନମନଙ୍କୁ ବିବାହ ଶୋଭାଯାତ୍ରାରେ ପ୍ରଦୂଷଣକୁ ଯଥାସମ୍ଭବ କମ୍ କରିବାକୁ ପରାମର୍ଶ ଦେଇଥିଲେ । ଏ ସଂପର୍କରେ ନମନ କହିଛନ୍ତି, ବାପାଙ୍କ ପରାମର୍ଶ ଅନୁସାରେ ମୁଁ ସାଇକେଲ୍ରେ ହିଁ ବାହା ହେବାକୁ ଯିବା ଲାଗି ସ୍ଥିର କରିଥିଲି । ତେବେ କନ୍ୟାପକ୍ଷଙ୍କୁ ଏକଥା ଜଣାଇଲା ପରେ ପ୍ରଥମେ ସେମାନେ ମନ ଊଣା କରିଥିଲେ । ପରେ ଅବଶ୍ୟ ରାଜି ହୋଇଥିଲେ ।
ସୋମବାର ସନ୍ଧ୍ୟାରେ ବ୍ୟାଣ୍ଡ ବାଜାର ତାଳେ ତାଳେ ସାଇକେଲ୍ରେ ନମନ ଓ ତାଙ୍କ ବରଯାତ୍ରୀ ଦଳ ଯାତ୍ରାରମ୍ଭ କରିବା ପରେ ରାସ୍ତାରେ ସେମାନଙ୍କୁ ଦେଖିବାକୁ ଲୋକେ ଭିଡ଼ ଜମାଇଥିଲେ । ବରଙ୍କ ସହିତ ଅନେକ ସେଲ୍ଫି ନେଇଥିଲେ । ସବୁଠୁ ବଡ଼ କଥା ହେଲା ଏହି ବିବାହ ଶୋଭାଯାତ୍ରା ସମୟରେ ଗୋଟିଏ ବି ବାଣ ଫୁଟାଯାଇନଥିଲା । ନମନଙ୍କ ପିତା ଅଜୟ ତିୱାରୀ କହିଛନ୍ତି, ରାଜଧାନୀ ଦିଲ୍ଲୀ ସମେତ ଉତ୍ତରଭାରତର ଅନେକ ସହରରେ ଏବେ ବାୟୁ ପ୍ରଦୂଷଣ ସବୁଠୁ ବଡ଼ ଚିନ୍ତା । ଏଭଳିସ୍ଥିତିରେ ଆମ ସମସ୍ତଙ୍କୁ ପରିବେଶକୁ ନେଇ ଆଲର୍ଟ ରହିବାକୁ ହେବ । ପ୍ରଦୂଷଣକୁ କମ୍ କରିବାକୁ ନିଜ ନିଜ ସ୍ତରରେ ଉଦ୍ୟମ କରିବାକୁ ବି ପଡି଼ବ । ବିବାହ ପରେ ଅବଶ୍ୟ ନମନ ପତ୍ନୀଙ୍କ ସହିତ କାର୍ରେ ଫେରିଥିଲେ ।
