କଳାହାଣ୍ଡି ୦୯/୧୦: ପୂର୍ବତନ ବିଧାୟକ ଧନେଶ୍ଵର ମାଝୀଙ୍କ ପରଲୋକ। ୮୪ ବର୍ଷ ବୟସରେ ସେ ଶେଷ ନିଶ୍ଵାସ ତ୍ୟାଗ କରିଛନ୍ତି। ବୁଧବାର ସକାଳେ କେସିଙ୍ଗା ମେଡିକାଲରେ ଚିକିତ୍ସାଧୀନ ଅବସ୍ଥାରେ ପୂର୍ବତନ ବିଧାୟକ ଧନେଶ୍ଵର ମାଝୀଙ୍କ ଦେହାନ୍ତ ହୋଇଛି। ଶ୍ରୀ ମାଝୀ କେସିଙ୍ଗା ଓ ନର୍ଲାରୁ ୫ ଥର ବିଧାୟକ ହୋଇଥିଲେ। ସେ ରାଜ୍ୟସଭା ସାଂସଦ ମଧ୍ୟ ଥିଲେ। ତାଙ୍କ ମୃତ୍ୟୁ ପରେ ରାଜନୈତକ ମହଲରେ ଶୋକର ଛାୟା ଖେଳିଯାଇଛି। 

କଳାହାଣ୍ଡି ଜିଲ୍ଲାର ଜଣେ ପରିଚିତ ଲୋକ ପ୍ରତିନିଧି ତଥା ପୂର୍ବତନ ବିଧାୟକ, ରାଜ୍ୟସଭା ସାଂସଦ ହେଉଛନ୍ତି ଧନେଶ୍ଵର ମାଝୀ। ବୁଧବାର ସକାଳ ୭ଟା ୪୦ ମିନିଟରେ କେସିଙ୍ଗା ଡାକ୍ତରଖାନାରେ ତାଙ୍କର ପରଲୋକ ଘଟିଛି। ଆଜି ସକାଳୁ ସେ ଛାତିରେ ଯନ୍ତ୍ରଣା ଅନୁଭବ କରିବା ପରେ ତାଙ୍କୁ କେସିଙ୍ଗା ଡାକ୍ତରଖାନା ନିଆ ଯାଇଥିଲା । ସେଠାରେ ଡାକ୍ତର ତାଙ୍କ ସ୍ବାସ୍ଥ୍ୟାବସ୍ଥା ପରୀକ୍ଷା କରୁଥିବା ସମୟରେ ସେ ଶେଷ ନିଃଶ୍ୱାସ ତ୍ୟାଗ କରିଥିଲେ। 

୫ ଜୁଲାଇ ୧୯୪୧ ମସିହାରେ କେସିଙ୍ଗା ବ୍ଲକ ତୁଣ୍ଡଳା ଗ୍ରାମ ପଞ୍ଚାୟତରେ ଧନେଶ୍ଵର ମାଝୀ ଜନ୍ମଗ୍ରହଣ କରିଥିଲେ। ଶିକ୍ଷା ସମାପ୍ତ ପରେ ସେ ପ୍ରଧାନ ଶିକ୍ଷକ ଭାବରେ ରିଶିଡା ବାପୁଜୀ ହାଇସ୍କୁଲ୍, ବେଲଖଣ୍ଡି ଘାସିରାମ ଦୋରା ହାଇସ୍କୁଲ୍ ଏବଂ ତୁଣ୍ଡଲା ହାଇସ୍କୁଲ୍ କର୍ମମୟ ଜୀବନ ଆରମ୍ଭ କରିଥିଲେ। ପରେ ଲୋକଙ୍କ ସେବା କରିବାକୁ ସେ ରାଜନୀତିରେ ପାଦ ଦେଇଥିଲେ। ସେ ପ୍ରଥମେ ୧୯୭୧ ମସିହାରେ ନର୍ଲା ନିର୍ବାଚନ ମଣ୍ଡଳୀର ବିଧାୟକ ଭାବେ ବିଜୟ ଲାଭ କରିବା ପରେ କଳାହାଣ୍ଡି ରାଜ୍ୟସଭା ସାଂସଦ(୧୯୭୮-୧୯୮୪) ହୋଇଥିଲେ। ତାଙ୍କ ଜୀବନକାଳ ମଧ୍ୟରେ (୧୯୭୧,୧୯୭୪,୨୦୦୦,୨୦୦୪,୨୦୧୪ ମସିହା ନିର୍ବାଚନ)ରେ ସେ ପାଞ୍ଚ ଥର ନର୍ଲା ଓ କେସିଙ୍ଗା ନିର୍ବାଚନ ମଣ୍ଡଳୀର ବିଧାୟକ ଭାବେ ନିର୍ବାଚିତ ହୋଇଥିଲେ । ଶେଷ ଥର ପାଇଁ ସେ ୨୦୧୪ ନିର୍ବାଚନରେ ବିଜୁ ଜନତା ଦଳ ତରଫରୁ ନର୍ଲା ନିର୍ବାଚନ ମଣ୍ଡଳୀର ବିଧାୟକ ରହିଥିଲେ। ତେବେ ନିଜ ଜୀବନରେ ଏକ ଆଦର୍ଶ ମଣିଷ, ପରୋପକାରୀ, ମେଳାପୀ, ମିଷ୍ଟଭାଷୀ ଭାବରେ ସାରା ଓଡ଼ିଶାରେ ପରିଚିତ ଥିଲେ।  

ସେ ରାଜନୀତି ଜୀବନ କାଳ ମଧ୍ୟରେ ଜନତା ଦଳ, ସ୍ଵତନ୍ତ୍ର ଦଳ ବିଜେପି, ବିଜେଡ଼ି ଦଳରେ ପୃଥକ ପୃଥକ ସମୟରେ ରହି ଆସିଥିଲେ ଏବଂ ଗତ ସାଧାରଣ ନିର୍ବାଚନ ପୂର୍ବରୁ(ମାର୍ଚ୍ଚ ୨୯ ତାରିଖ)ରେ ବିଜେଡ଼ି ଛାଡ଼ି ବିଜେପିରେ ଯୋଗ ଦେଇଥିଲେ । ତାଙ୍କ ମୃତ୍ୟୁରେ କଳାହାଣ୍ଡି ଜିଲ୍ଲାରେ ଶୋକର ଛାୟା ଖେଳି ଯାଇଛି । ତାଙ୍କର ଶେଷ ଦର୍ଶନ କରିବାକୁ ବହୁ ବିଶିଷ୍ଟ ବ୍ୟକ୍ତି, ରାଜନେତା, ଆଦିବାସୀ ନେତା ଉପସ୍ଥିତ ରହିଛନ୍ତି।