ନୂଆଦିଲ୍ଲୀ: ଜମ୍ମୁ ଓ କାଶ୍ମୀରର ଅଖନୂର ସେକ୍ଟରରେ ଅପରେସନ ସିନ୍ଦୂର ସମୟରେ ପାକିସ୍ତାନର ତୀବ୍ର ଗୋଳାବର୍ଷଣ ମଧ୍ୟରେ ସୀମା ସୁରକ୍ଷା ବାହିନୀ (BSF)ର ସାତ ଜଣ ମହିଳା ଯବାନ ଅସାଧାରଣ ସାହସ ଓ ଦୃଢ଼ତା ପ୍ରଦର୍ଶନ କରି ଦୁଇଟି ଅଗ୍ରବର୍ତୀ ପୋଷ୍ଟକୁ ତିନି ଦିନ ଧରି ସୁରକ୍ଷିତ ରଖିଥିଲେ। ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଘଟଣାଟି ସତରେ ଘଟିଛି। ବିଏସଏଫର ଏହି ସମ୍ପୂର୍ଣ୍ଣ ମହିଳା ଦଳର ନେତୃତ୍ୱ ନେଉଛନ୍ତି ସହକାରୀ କମାଣ୍ଡାଣ୍ଟ ନେହା ଭଣ୍ଡାରୀ। ଏହି ଯବାନମାନଙ୍କ ମଧ୍ୟରୁ ଅଧିକାଂଶ ଯବାନ ଗତ ଦୁଇ ରୁ ତିନି ବର୍ଷ ମଧ୍ୟରେ ବିଏସଏଫରେ ଯୋଗ ଦେଇଥିଲେ ଏବଂ ଏହା ଥିଲା ସେମାନଙ୍କର ପ୍ରଥମ ସକ୍ରିୟ ଯୁଦ୍ଧାନୁଭବ।

ଅପରେସନ ସିନ୍ଦୂର ଥିଲା ଭାରତର ଏକ ସୁନିୟନ୍ତ୍ରିତ ସାମରିକ ଅଭିଯାନ। ଯାହା ୨୦୨୫ ମସିହା ଏପ୍ରିଲ ୨୨ ତାରିଖରେ ଜମ୍ମୁ ଓ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବରେ ଆରମ୍ଭ ହୋଇଥିଲା। ଏହି ଆକ୍ରମଣରେ ୨୬ ଜଣ ନାଗରିକ ପ୍ରାଣ ହରାଇଥିଲେ। ଜବାବରେ ଭାରତ ଗତ ମେ ୭ ତାରିଖରେ ଭାରତୀୟ ସେନା ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀର (PoK)ରେ ଥିବା ନଅଟି ଆତଙ୍କବାଦୀ ଶିବିର ଉପରେ ସଠିକ ଆକ୍ରମଣ କରି ଏହାକୁ ଧ୍ୱଂସ କରିଥିଲା। ଏହାର ପ୍ରତିକ୍ରିୟାରେ ପାକିସ୍ତାନ ସୀମାବର୍ତୀ ଅଞ୍ଚଳ ମାନଙ୍କରେ ତୀବ୍ର ଗୋଳାବର୍ଷଣ ଆରମ୍ଭ କରିଥିଲା।

ଭାରତର ଅଖନୂର ସେକ୍ଟରରେ ପାକିସ୍ତାନର ଏହି ଆକ୍ରମଣାତ୍ମକ ଗୋଳାବାରୀ ସମୟରେ ବିଏସଏଫର ମହିଳା ଯବାନମାନଙ୍କୁ ପୋଷ୍ଟ ଛାଡ଼ି ସୁରକ୍ଷିତ ସ୍ଥାନକୁ ସ୍ଥାନାନ୍ତର ହେବାର ବିକଳ୍ପ ଦିଆଯାଇଥିଲା। କିନ୍ତୁ ନେହା ଭଣ୍ଡାରୀଙ୍କ ନେତୃତ୍ୱରେ ଏହି ଦଳ ପୋଷ୍ଟରେ ରହି ଶତ୍ରୁଙ୍କ ଆକ୍ରମଣର ମୁକାବିଲା କରିବାକୁ ନିଷ୍ପତ୍ତି ନେଇଥିଲେ। ଆପଣଙ୍କୁ ଜଣାଇ ରଖୁ ଯେ ନେହାଙ୍କ ପରିବାରରେ ସେନା ଓ CRPF ରେ ସେବାର ଏକ ଗୌରବମୟ ପରମ୍ପରା ରହିଛି। ଏନେଇ ସେ କହିଛନ୍ତି ଯେ, "ମୋ ସୈନ୍ୟମାନଙ୍କ ସହ ଅନ୍ତର୍ଜାତୀୟ ସୀମାରେ ପୋଷ୍ଟ ସଂରକ୍ଷଣ କରିବାରେ ମୁଁ ଗର୍ବ ଅନୁଭବ କରୁଛି। ଏହା ପାକିସ୍ତାନୀ ପୋଷ୍ଟଠାରୁ ପ୍ରାୟ ୧୫୦ ମିଟର ଦୂରରେ ଅବସ୍ଥିତ। ଶତ୍ରୁ ପୋଷ୍ଟକୁ ଉପଯୁକ୍ତ ଜବାବ ଦେବାରେ ଏହା ଏକ ସମ୍ମାନର କାର୍ଯ୍ୟ ଥିଲା।"

ଅପରେସନ ସିନ୍ଦୂର ଅଧୀନରେ ବିଏସଏଫ ପୂର୍ଣ୍ଣ ଶକ୍ତିରେ ପ୍ରତିଆକ୍ରମଣ କରିଥିଲା। ଏହି ଅଭିଯାନରେ ୭୬ଟି ପାକିସ୍ତାନୀ ସୀମା ପୋଷ୍ଟ, ୪୨ଟି ଅଗ୍ରବର୍ତୀ ପ୍ରତିରକ୍ଷା ସ୍ଥାନ ଏବଂ ତିନୋଟି ଆତଙ୍କବାଦୀ ଲଞ୍ଚପ୍ୟାଡ ଧ୍ୱଂସ କରାଯାଇଥିଲା। ନେହା ଭଣ୍ଡାରୀଙ୍କ ଦଳ ସମସ୍ତ ଉପଲବ୍ଧ ଅସ୍ତ୍ରଶସ୍ତ୍ର ବ୍ୟବହାର କରି ପାକିସ୍ତାନୀ ଆକ୍ରମଣର ଦୃଢ଼ ଜବାବ ଦେଇଥିଲେ ଏବଂ ଶତ୍ରୁକୁ ପଛକୁ ହଟିବାକୁ ବାଧ୍ୟ କରିଥିଲେ।

ଏହି ସାହସିକତାକୁ ସମ୍ମାନ ଜଣାଇବା ପାଇଁ ବିଏସଏଫ ସାମ୍ବା ସେକ୍ଟରରେ ଏକ ଫରୱାର୍ଡ ପୋଷ୍ଟର ନାମ 'ସିନ୍ଦୂର' ରଖିବା ପାଇଁ ପ୍ରସ୍ତାବ ଦିଆଯାଇଛି। ବିଏସଏଫ ଆଇଜି ଶଶାଙ୍କ ଆନନ୍ଦ କହିଛନ୍ତି, "ଆମେ ୭୦ରୁ ଅଧିକ ପାକିସ୍ତାନୀ ପୋଷ୍ଟ ଓ ଲଞ୍ଚପ୍ୟାଡକୁ ଧ୍ୱଂସ କରିଛୁ। ଏହି ସମୟରେ ଆମର ମହିଳା ଯବାନମାନେ ସମସ୍ତ ସ୍ୱତନ୍ତ୍ର ଅସ୍ତ୍ର ବ୍ୟବସ୍ଥା ବ୍ୟବହାର କରି ଶତ୍ରୁଙ୍କୁ ନିଶ୍ଚିହ୍ନ କରିଥିଲେ।"

ଅପରେସନ ସିନ୍ଦୂର ସମୟରେ ଅଖନୂର ସୀମାରେ ବିଏସଏଫର ମହିଳା ଯବାନମାନଙ୍କ ଏହି କାର୍ଯ୍ୟ ନାରୀ ଶକ୍ତି ଓ ଦେଶପ୍ରେମର ଏକ ଜ୍ୱଳନ୍ତ ଉଦାହରଣ। ନେହା ଭଣ୍ଡାରୀଙ୍କ ନେତୃତ୍ୱରେ ଏହି ଦଳ କେବଳ ସୀମାର ସୁରକ୍ଷା କରିନଥିଲେ, ବରଂ ଦେଶର ସମ୍ମାନକୁ ଅକ୍ଷୁଣ୍ଣ ରଖିଥିଲେ। ଏହି ଘଟଣା ଭାରତୀୟ ସୁରକ୍ଷା ବାହିନୀରେ ମହିଳାମାନଙ୍କର ଗୁରୁତ୍ୱପୂର୍ଣ୍ଣ ଭୂମିକାକୁ ପୁନର୍ବାର ପ୍ରମାଣିତ କରିଛି।