ମୁମ୍ବାଇ: ମହାରାଷ୍ଟ୍ରର ପରବର୍ତ୍ତୀ ମୁଖ୍ୟମନ୍ତ୍ରୀ ହେବାକୁ ଯାଉଥିବା ଦେବେନ୍ଦ୍ର ଫଡ଼ନାଭିସ ରାଜ୍ୟପାଳଙ୍କୁ ଭେଟି ଆଜି ସରକାର ଗଠନ ଲାଗି ଦାବି କରିଛନ୍ତି । ଏହା ସହ ଗତକାଲି (ମଙ୍ଗଳବାର) ପୂର୍ତବନ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସହ କଣ ଆଲୋଚନା କରିଥିଲେ ସେନେଇ କହିଛନ୍ତି ଫଡ଼ନାଭିସ । ରାଜ୍ୟପାଳଙ୍କୁ ସାକ୍ଷାତ କରିବା ପରେ ଗଣମାଧ୍ୟମ ସାମ୍ନାକୁ ଆସି ଫଡ଼ନାଭିସ୍, ଏକନାଥ ସିନ୍ଦେଙ୍କୁ କୃତଜ୍ଞତା ଜଣାଇଛନ୍ତି ।
ଏହା ସହ ସେ କହିଛନ୍ତି, ଆମ ସରକାରରେ ରହିବାକୁ ସିନ୍ଦେଙ୍କୁ ଗତକାଲି ଅନୁରୋଧ କରିଥିଲି । ମୁଁ ଆଶା କରୁଛି ସେ ରହିବେ । ମୁଖ୍ୟମନ୍ତ୍ରୀ ପଦ ଆମ ଭିତରେ ଏକ ବୁଝାମୁଣା କିନ୍ତୁ ଆମେ ପୂର୍ବଭଳି ସବୁ ମିଳିମିଶି ସରକାର ଚଳାଇବୁ ।’ ଏହା ପରେ ସିନ୍ଦେଙ୍କ ପ୍ରତିକ୍ରିୟା ମଧ୍ୟ ସାମ୍ନାକୁ ଆସିଛି । ସେ କହିଛନ୍ତି, ଅଢ଼େଇ ବର୍ଷ ପୂର୍ବେ ଫଡ଼ନାଭିସ୍ ମୁଖ୍ୟମନ୍ତ୍ରୀ ଲାଗି ମୋ ନାଁ ସୁପାରିଶ କରିଥିଲେ । ବର୍ତ୍ତମାନ ଆମେ ତାଙ୍କ ନାଁ ମୁଖ୍ୟମନ୍ତ୍ରୀ ଲାଗି ସୁପାରିଶ କରିଛୁ ।
ଏହା ପୂର୍ବରୁ ବିଜେପିର ନିଷ୍ପତ୍ତିକୁ ବିରୋଧ କରିବେ ନାହିଁ ବୋଲି ଏକନାଥ ସିନ୍ଦେ କହିଥିଲେ । ମହାରାଷ୍ଟ୍ର ନିର୍ବାଚନରେ ମହାୟୁତିକୁ ବଡ଼ ବିଜୟ ମିଳିଥିଲେ ସୁଦ୍ଧା ମୁଖ୍ୟମନ୍ତ୍ରୀ ପଦକୁ ନେଇ ସସପେନ୍ସ ଲାଗି ରହିଥିଲା । କିନ୍ତୁ ଆଜି ଫଡ଼ନାଭିସ୍ ମହାରାଷ୍ଟ୍ରର ପରବର୍ତ୍ତୀ ମୁଖ୍ୟମନ୍ତ୍ରୀ ହେବେ ବୋଲି ସ୍ପଷ୍ଟ ହୋଇଯାଇଛି । ସେପଟେ ଫଡ଼ନାଭିସ୍ ମୁଖ୍ୟମନ୍ତ୍ରୀ ହେବାକୁ ନେଇ ସିନ୍ଦେ ଗୋଷ୍ଠୀରେ ଅସନ୍ତୋଷ ମଧ୍ୟ ରହିଛି । ମହାରାଷ୍ଟ୍ରରେ ବିହାର ଫର୍ମୁଲା କାହିଁକି ଲାଗୁ କରାଗଲା ନାହିଁ ବୋଲି ଶିବସେନାର ନେତା ପ୍ରଶ୍ନ କରିଛନ୍ତି । ବିହାର ନିର୍ବାଚନରେ ବିଜେପି ଭଲ କରିଥିଲେ ମଧ୍ୟ ନୀତୀଶ କୁମାର ମୁଖ୍ୟମନ୍ତ୍ରୀ ହୋଇଥିଲେ । ସିନ୍ଦେ ବିଜେପିର ନିଷ୍ପତ୍ତିକୁ ଗ୍ରହଣ କରିବେ ବୋଲି ସ୍ପଷ୍ଟ କରିଥିଲେ ବି କିଛି ଦଳୀୟ ନେତା ନାରାଜ ଥିବା କୁହାଯାଉଛି ।
