ଠାକୁରମୁଣ୍ଡା,୦୭/୧୧: ବିଜ୍ଞାନର ବିକାଶ ସହିତ ସମତାଳରେ ଅନ୍ଧ ବିଶ୍ୱାସ ବସା ବାନ୍ଧି ଚାଲିଛି । କୌଣସି ଅସୁବିଧା ପାଇଁ ପୂଜା ପାଠର ଆଶ୍ରୟ ନିଆଯାଉଛି । ବିଶେଷକରି ଆଦିବାସୀ ଅଞ୍ଚଳରେ ସ୍ୱାସ୍ଥ୍ୟ ସମସ୍ୟା କ୍ଷେତ୍ରରେ ଡାକ୍ତରଖାନା ଯିବା ପରିବର୍ତ୍ତେ ଗୁଣିଆ, ବାବା ମାନଙ୍କ ପାଖରେ ଚିକିତ୍ସା ପାଇଁ ଭିଡ଼ ବଢୁଛି । ମାତ୍ର ବିଶ୍ୱାସ ଯେ ବିପଦ ଡାକି ଆଣୁଛି ତାର ହିସାବ କିଛି କମ୍ ନୁହେଁ । ଯାହାର ସଦ୍ୟ ନମୁନା ଦେଖିବାକୁ ମିଳିଛି ଠାକୁରମୁଣ୍ଡା ବ୍ଲକ କେଶଡିହା ଗ୍ରାମରେ । ଶରୀରରୁ କାଛୁ କୁଣ୍ଡିଆ ଭଲ କରିବା ପାଇଁ ଗୁଣିଆ ପାଖରେ ଆଶ୍ରୟ ନେଇ ଶେଷରେ ଦୁଷ୍କର୍ମର ଶିକାର ହୋଇ ପୀଡ଼ିତା ଥାନାର ଦ୍ୱାରସ୍ଥ ହୋଇଛନ୍ତି ।
ଠାକୁରମୁଣ୍ଡା ବ୍ଲକ ମହୁଲଡିହା ଥାନା ଅନ୍ତର୍ଗତ କେଶଡିହା ଗ୍ରାମରେ ଯୁବତୀକୁ ଦୁଷ୍କର୍ମ କରି ଜେଲ୍ ହାଜତକୁ ଗଲେ ବୃଦ୍ଧ ଗୁଣିଆ । ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଶରତ ଥାନା ରଜତନଗର ପଞ୍ଚାୟତର ଜନୈକା ଯୁବତୀ ନିଜ ମା’ଙ୍କ ସହ କେଶଡିହା ଗ୍ରାମକୁ ନିଜର ଦେହ ଅସୁସ୍ଥ ଥିବାରୁ ପୂଜା କରିବାକୁ ଆସିଥିଲେ । ଦେହରେ କାଛୁ କୁଣ୍ଡିଆ ଲାଗି ରହୁଥିବାରୁ ଯୁବତୀ ଜଣକ ଗୁଣିଆ ବାବାକୁ ମା’ ସହ ଭେଟି ପ୍ରତିକାର କରିବାକୁ କହିଥିଲେ । ଗୁଣିଆ ଜଣକ ଚିକିତ୍ସା ପାଇଁ ଅମାବାସ୍ୟା ତିଥିରେ ଆସିବାକୁ ପରାମର୍ଶ ଦେଇଥିଲେ । ଯୁବତୀ ଜଣକ ପରାମର୍ଶ ଅନୁଯାୟୀ ୨ ତାରିଖ ଦିନ କେଶଡିହାରେ ପହଞ୍ଚିଥିଲେ । ବିଳମ୍ବିତ ରାତିରେ ପୂଜା କରିବାକୁ ଯୁବତୀକୁ ଡାକିଥିଲେ ଗୁଣିଆ ବିଶେଶ୍ୱର ସୟ । ଅନ୍ଧକାର ଓ ବିଶ୍ୱାସର ସୁଯୋଗ ନେଇ ବିଶେଶ୍ୱର ଯୁବତୀକୁ ଯୌନ ଶୋଷଣ କରିଥିଲା । ୩ ତାରିଖରେ ଯୁବତୀ ଘରକୁ ଫେରିଯାଇ ନିଜ ମା'କୁ ଘଟଣା ସମ୍ପର୍କରେ ଅବଗତ କରିଥିଲେ । ପରିବାରର ପରାମର୍ଶ କ୍ରମେ ଗତକାଲି ଯୁବତୀ ମହୁଲଡିହା ଆସି ଥାନାରେ ଅଭିଯୋଗ କରିଥିଲେ । ମହୁଲଡିହା ଥାନା ପୁଲିସ ମାମଲା ରୁଜୁ କରି ଗୁଣିଆ ବିଶେଶ୍ୱର ସୟକୁ ଠାକୁରମୁଣ୍ଡା ଜେଏମ୍ଏଫ୍ସି କୋର୍ଟରେ ହାଜର କରିଥିଲେ । ଜାମିନ ନାମଞ୍ଜୁର ହେବାରୁ ଗୁଣିଆକୁ କରଞ୍ଜିଆ ଜେଲକୁ ପଠାଇ ଦିଆଯାଇଛି।
