କଟକ,୧୯/୧୨: ରେଳବାଇ ସଂସ୍ଥାରେ ଚାକିରି ପାଇଁ କିଏ ୫ ଲକ୍ଷ ତ ଆଉ କିଏ ୧୦ ଲକ୍ଷ ଟଙ୍କା ଦେଇଥିଲେ । ଟଙ୍କା ପାଇଲା ପରେ ରେଳବାଇ ସଂସ୍ଥାର ମୋହର ବାଜିଥିବା ନିଯୁକ୍ତି ପତ୍ର ବି ମିଳିଥିଲା । ମିଛିମିଛିକା ଟ୍ରେନିଂ ବି ଦିଆଗଲା । ହେଲେ କେଉଁଠି ନିଯୁକ୍ତି ନମିଳିବାରୁ ଠକେଇର ଶିକାର ହୋଇଥିବା ଜାଣିବାକୁ ପାଇଥିଲେ । ନିଯୁକ୍ତି ପତ୍ର ବି ଜାଲ୍ ବୋଲି ବି ଧରାପଡ଼ିଲା । ବାପା, ମା’ ପୁଅ ଏଭଳି ଠକେଇ ର୍ୟାକେଟ୍ ଚଲାଇଥିଲେ । ପୁଲିସ ଅଭିଯୁକ୍ତ ପୁଅକୁ ଗିରଫ କରିଥିବା ବେଳେ ବାପା, ମା’ ଫେରାର ଅଛନ୍ତି । ଗିରଫ ହୋଇ ଜେଲ୍ ଯାଇଥିବା ଅଭିଯୁକ୍ତର ନାଁ ଡାନିଏଲ୍ ରାଜ (୨୫) । ତାର ଘର ବିଡ଼ାନାସୀ ସୁଭଦ୍ରା ନଗର ଅଞ୍ଚଳରେ । ରାଜ୍ୟର ବିଭିନ୍ନ ଅଞ୍ଚଳରୁ ୫୦ରୁ ଅଧିକ ଚାକିରି ଆଶାୟୀ କଟକରେ ଏହି ଠକେଇ ର୍ୟାକେଟ୍ର ଶିକାର ହୋଇଛନ୍ତି ।
ଠକେଇର ଶିକାର ହୋଇଥିବା ଚାକିରି ଆଶାୟୀ ବାଲେଶ୍ୱରର ସୋର ଥାନା ଅଞ୍ଚଳର ସଞ୍ଜୀବ କୁମାର ରାଉତ ବିଡ଼ାନାସୀ ଥାନାରେ ଏ ସଂକ୍ରାନ୍ତରେ ଏତଲା ଦେଇଛନ୍ତି । ଏହି ଘଟଣାରେ ପୁଲିସ୍ ତନାଘନା ଆରମ୍ଭ କରିଛି । ଏହି ର୍ୟାକେଟ୍ର ଚେର ବହୁ ଗଭୀରରେ ଥିବା ଜଣାପଡ଼ିଛି । ଡାନିଏଲ୍ର ମା’ଙ୍କ ନାଁରେ ଗୁରୁତର ଅଭିଯୋଗ ଥିବା ପୁଲିସ୍ କହିଛି । ମାମଲାର ଗୁରୁତ୍ୱକୁ ଦୃଷ୍ଟିରେ ରଖି ଅଭିଯୁକ୍ତ ମହିଳାଙ୍କୁ ଖୋଜି ବାହାର କରିବା ପାଇଁ ବିଭିନ୍ନ ଆଡ଼େ ଚଢ଼ଉ ଜାରି ରଖିଛି ।
ପୁଲିସ୍ ସୂତ୍ରରୁ ପ୍ରକାଶ, କଟକରେ ରହୁଥିବା ଡାନିଏଲ୍ଙ୍କ ମା’ ନିଜକୁ ଇଷ୍ଟକୋଷ୍ଟ ରେଳବାଇର ଜଣେ ବରିଷ୍ଠ ଅଧିକାରୀଙ୍କ ବ୍ୟକ୍ତିଗତ ସଚିବ ବୋଲି କହି ଅନେକ ଲୋକଙ୍କ ଯୋଗାଯୋଗରେ ଥିଲେ । ଏମିତିକି ରେଳବାଇ ସଂସ୍ଥାର ବିଭିନ୍ନ କାର୍ଯ୍ୟାଳୟକୁ ତାଙ୍କର ଅବାଧ ପ୍ରବେଶ ମଧ୍ୟ ଥିଲା । ମହିଳାଙ୍କର ରେଳବାଇ ସଂସ୍ଥାକୁ ଧାଁଧପଡ଼ ଥିବାରୁ ଅନେକ ତାଙ୍କ ଉପରେ ବିଶ୍ୱାସ କରି ଚାକିରି ପାଇଁ ଯୋଗାଯୋଗରେ ଥିଲେ । ଚାକିରି ଆଶାୟୀମାନଙ୍କ ମନରେ ଅଧିକ ବିଶ୍ୱାସ ଓ ଭରସା ଜମାଇବା ପାଇଁ ସେ ଅନେକ ଶିକ୍ଷିତ ଯୁବକ/ଯୁବତୀଙ୍କୁ ଭୁବନେଶ୍ୱରରେ ନେଇ କିଛି ମହିଳା ଓ ପୁରୁଷଙ୍କ ସହ ମିଶାଉଥିଲେ । ଜଣେ ସନ୍ଦିଗଧ୍ ମହିଳା ନିଜକୁ ଆଇଏସ୍ ଅଫିସର ବୋଲି ପରିଚୟ ଦେଉଥିଲେ ।
ଯୋଜନାବଦ୍ଧ ଭାବେ ଏହି ର୍ୟାକେଟ୍ ଚାଲିଥିଲା । ଚାକିରି ଆଶାୟୀଙ୍କଠାରୁ ମୋଟା ଅଙ୍କର ଟଙ୍କା ନେଲା ପରେ ରେଳବାଇ ମୋହର ଲାଗିଥିବା ଏକ ଜାଲ୍ ନିଯୁକ୍ତିପତ୍ର ସେମାନଙ୍କୁ ଧରାଇ ଦିଆଯାଉଥିଲା । ଆଶାୟୀମାନଙ୍କ ମନରେ ଅଧିକ ବିଶ୍ୱାସ ସୃଷ୍ଟି ପାଇଁ ସେମାନଙ୍କ ଦକ୍ଷତା ବୃଦ୍ଧି ଆଳରେ ପଶ୍ଚିମବଙ୍ଗର କିଛି ରେଳ ଷ୍ଟେସନ୍ରେ ଘରୋଇ ଭାବେ ପ୍ରଶିକ୍ଷଣ ବି ଦିଆଯାଉଥିଲା । ତାଲିମ୍ ନାଁରେ କୋଲକାତା ସିଆଲ୍ଦା ଷ୍ଟେସନ୍ରେ ଚାକିରି ଆଶାୟୀମାନେ ମାସାଧିକ କାଳ ବେଠି ଖଟି ସାରିଲା ପରେ ମିଳିଥିବା ନିଯୁକ୍ତିପତ୍ର ସମ୍ପୂର୍ଣ୍ଣ ଜାଲ୍ ବୋଲି ଜାଣିବାକୁ ପାଇଥିଲେ । ସେହିକ୍ରମରେ ସଞ୍ଜୀବଙ୍କଠାରୁ ଡାନିଏଲ ଓ ତା ମା’ ୮ ଲକ୍ଷ ୫୦ ହଜାର ଟଙ୍କା ଠକି ନେଇଥିଲେ । ଏହି ର୍ୟାକେଟ୍ ସଞ୍ଜୀବଙ୍କ ପରି ୫୦ରୁ ଅଧିକ ଚାକିରି ଆଶାୟୀଙ୍କଠାରୁ କୋଟିଏ ଟଙ୍କା ଠକି ନେଇଥିବା ଖବର ମିଳିଛି । ବିଡ଼ାନାସୀରେ ରହୁଥିବା ଡାନିଏଲ୍ ଓ ତାଙ୍କ ମା ବାଲେଶ୍ୱର, ଭଦ୍ରକ, କଟକ ସମେତ ରାଜ୍ୟର ବିଭିନ୍ନ ଅଞ୍ଚଳରୁ ବହୁ ଶିକ୍ଷିତ ଯୁବକ ଯୁବତୀଙ୍କୁ ଠକିଥିବାର ପୁଲିସ୍ ଜାଣିବାକୁ ପାଇଛି । ପୂର୍ବରୁ ସମ୍ପୃକ୍ତ ମହିଳାଙ୍କ ନାଁରେ ୮ରୁ ଅଧିକ ଚାକିରି ଆଶାୟୀ ଜଗତପୁର ଥାନାରେ ଏତଲା ଦେଇଥିଲେ ।
