କେନ୍ଦୁଝର ସଦର,୦୫/୦୮: ସାପ କାମୁଡାରେ ମୃତ୍ୟୁବରଣ କଲା ପରେ ଶବ ବ୍ୟବଚ୍ଛେଦ ହେଲା ବୋଲି ପରିବାର, ସାହି ଭାଇ ମୃତ ଦେହ ଘରକୁ ନେବାକୁ ବାରଣ କଲେ । ଗାଁରେ ଶେଷକୃତ୍ୟ ସମ୍ପନ୍ନ କରାଇବାକୁ ମନା କଲେ । ଏଭଳି ସ୍ଥିତିରେ ସ୍ୱେଚ୍ଛାସେବୀ ସଂଗଠନ ଭରସା ପରିବାରର ସଦସ୍ୟ ମୃତଦେହ ସତ୍କାର କରି ମାନବିକତା ଦେଖାଇଛନ୍ତି ।
ସୂଚନା ଅନୁଯାୟୀ, ସଦର ଥାନା ଅର୍ନ୍ତଗତ ପର୍ଜନପୁର ଗ୍ରାମର ବିଦେଶୀ ପାତ୍ର(୫୫)ଙ୍କୁ ଗତ ଶନିବାର ଏକ ଚିତିସାପ କାମୁଡି ଦେଇଥିଲା । ପରିବାର ଲୋକେ ଗୁରୁତର ଅବସ୍ଥାରେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲେ । ଚିକିତ୍ସାଧୀନ ଅବସ୍ଥାରେ ରବିବାର ସକାଳେ ବିଦେଶୀଙ୍କ ମୃତ୍ୟୁ ଘଟିଲା । ପଳାସପଙ୍ଗା ଫାଣ୍ଡି ଏସ୍ଆଇ ମାନସ ରଞ୍ଜନ ପଣ୍ଡା ମେଡିକାଲରେ ପହଞ୍ଚି ୬୩/୨୫ରେ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହିତ ଶବ ବ୍ୟବଚ୍ଛେଦ କରାଇଛନ୍ତି । ହେଲେ ଶବ ବ୍ୟବଚ୍ଛେଦ ହେବା ଯୋଗୁଁ ପରିବାର ସାହି ଭାଇ ମୃତଦେହ ନେବାକୁ ବାରଣ କରିଥିଲେ । ଏପରିସ୍ଥଳେ ବିଦେଶୀଙ୍କ ଝିଅ ନିରୋଦ ପାତ୍ର ଚିନ୍ତାରେ ପଡି ଯାଇଥିଲେ । ମେଡିକାଲ ଫାଣ୍ଡି ପୁଲିସ ରାଜେନ୍ଦ୍ର ନାରାୟଣ ସାହୁ, ଦୁର୍ଯ୍ୟୋଧନ ସାହୁ, ଦିନବନ୍ଧୁ ପାତ୍ର ଭରସା ପରିବାର ସଂଗଠନ ଟ୍ରଷ୍ଟକୁ ଜଣାଇଥିଲେ । ସଭାପତି ଲମ୍ବୋଧର ମହାନ୍ତଙ୍କ ନେତୃତ୍ୱରେ ରକ୍ତଦାତା ଏସ କେ ତାହିଦ, ଏମଡି ୱାସିମ୍, ଟୁଣି ମହାନ୍ତ, ଅଭିଳାଷ କୁମାର ଗିରି, ଶ୍ମଶାନ ରକ୍ଷକ ସିଦେ୍ଧଶ୍ୱର ନାୟକ ଧାଙ୍ଗରପଡା ସ୍ଥିତ ଆଦର୍ଶ ଶ୍ମଶାନରେ ବିଦେଶୀଙ୍କ ଶବ ସତ୍କାର କରାଇଛନ୍ତି ।
