ନୂଆଦିଲ୍ଲୀ,୫।୧୨: ଶମ୍ଭୁ ବର୍ଡରରେ ବହୁ ସଂଖ୍ୟାରେ ଏକାଠି ହୋଇ ଧାରଣାରେ ବସିଛନ୍ତି କୃଷକ। ସେମାନେ ଶୁକ୍ରବାର ମଧ୍ୟାହ୍ନ ୧୨ଟା ବେଳେ ଦିଲ୍ଲୀ ଅଭିମୁଖେ କରିବେ ପଦଯାତ୍ରା। ଏହାର ଦୁଇ ଦିନ ପୂର୍ବରୁ ହିଁ ଅମ୍ବାଲା ପୋଲିସ ଶୁମ୍ଭୁ ବର୍ଡରରେ ୧୪୪ ଧାରା ଲାଗୁ କରିଛି। ଗୁରୁବାର ଶମ୍ଭୁ ବର୍ଡରରେ କୃଷକମାନେ ଏକାଠି ହେବା ଆରମ୍ଭ କରିଛନ୍ତି। ଏହା ଭିତରେ ହରିୟାଣା ପୋଲିସ ଜେସିବି ସାହାଯ୍ୟରେ ସିମେଣ୍ଟର ବଡ ବଡ ପିଲାରରେ ବ୍ୟାରିକେଡିଂ କରିଛି। ଏହା ସହ ନୋଟିସ୍ ମଧ୍ୟ ଲଗାଇଛି। ସରକାର କୃଷକଙ୍କୁ ବାର୍ତ୍ତା ଦେଇଛନ୍ତି, ଦିଲ୍ଲୀରେ ଧାରଣା ଦେବାର ଅନୁମତି ତାଙ୍କୁ ମିଳିନି। ଏଭଳି ସ୍ଥିତିରେ ତାଙ୍କୁ ହରିୟାଣାରେ ମଧ୍ୟ ପ୍ରବେଶ କରିବାକୁ ଦିଆନଯାଉ।
ଶମ୍ଭୁ ବର୍ଡରରେ ଦିଲ୍ଲୀ-ଜଳନ୍ଧର ନ୍ୟାସନାଲ ହାଇଓ୍ବେକୁ ବ୍ଲକ କରିଛନ୍ତି ହରିୟାଣା ପୋଲିସ ଓ ପାରାମିଲିଟାରୀ ଫୋର୍ସର ଯବାନ। ଏହାଛଡା ପୁରା ଅଞ୍ଚଳର ସୁରକ୍ଷାକୁ ମଧ୍ୟ ବଢାଇ ଦିଆଯାଇଛି। ଓ୍ବାଟର କେନନ୍ ସହ ଯବାନଙ୍କ ସଂଖ୍ୟା ବଢାଇ ପଞ୍ଜାବରୁ ହରିୟାଣା ଆଡକୁ ଆସୁଥିବା କୃଷକଙ୍କୁ ରୋକିବାର ବନ୍ଦୋବସ୍ତ କରାଯାଇଛି। ପ୍ରଶାସନ କୃଷକଙ୍କୁ ଅପିଲ କରିଛନ୍ତି,ପ୍ରଦର୍ଶନ ଓ ପଦଯାତ୍ରା ଉପରେ ପୁଣିଥରେ ବିଚାର କରନ୍ତୁ। ପଦଯାତ୍ରା ପାଇଁ ପ୍ରଥମେ ଦିଲ୍ଳୀ ପୋଲିସଙ୍କଠାରୁ ମଞ୍ଜୁରୀ ନେବା ଦରକାର।
ସେପେଟ କୃଷକ ନେତା ସରଭନ ସିଂହ ପଣ୍ଢେର କହିଛନ୍ତି, ଆମକୁ କିଛି ଚିଠି ମିଳିନି, କିନ୍ତୁ ଏଥିରୁ ଜଣାପଡୁଛି ସରକାର ତାଙ୍କୁ ଦିଲ୍ଲୀ ଯିବାକୁ ଦେଉ ନାହାନ୍ତି। ଦିଲ୍ଲୀକୁ ପ୍ରତିଦିନ ଲକ୍ଷାଧିକ ଲୋକ ଯାଇଥାନ୍ତି, ସେମାନେ କ’ଣ ଅନୁମତି ନେଇ ଯାଇଥାନ୍ତି ? ଆମେ ଦିଲ୍ଲୀ ଯିବାକୁ ଅନୁମତି ମାଗିଲୁ, କିନ୍ତୁ ସେମାନେ ଅନୁମତି ଦେଲେନି। ଶୁକ୍ରବାର ୧୦୧ କୃଷକଙ୍କ ଦଳ ପଞ୍ଜାବ-ହରିୟାଣାର ଶମ୍ଭୁ ବର୍ଡରରୁ ଦିଲ୍ଲୀ ଅଭିମୁଖେ ବାହାରିବେ।
