ଚନ୍ଦନେଶ୍ୱର,୨୧/୦୬: ଭୋଗରାଇ ବ୍ଲକରେ ରବିଧାନ କିଣାକୁ ନେଇ ବଢୁଛି ଚାଷୀ ଅସନ୍ତୋଷ । ବ୍ଲକରେ ୧୯ ସମବାୟ ସମିତି ଓ ଗୋଟିଏ ଜିପିଏଲଏଫ ମାଧ୍ୟମରେ ସରକାର ଧାନ କିଣୁଛନ୍ତି । ମାତ୍ର ସବୁଠି ଧାନ କିଣାରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ଆସୁଛି । କଟଣି ଛଟଣିକୁ ଚାଷୀ ସହ୍ୟ କରିବା ସହିତ ଟାର୍ଗେଟର ଅଧା ଧାନ ବିକୁଛନ୍ତି । ତଥାପି ମିଲରମାନଙ୍କ ଖାମଖିଆଲ ନୀତି ଚାଷୀଙ୍କ ଆଖିରୁ ନିଦ ହଜାଇ ଦେଉଛି । ଭୋଗରାଇର ସର୍ବାଧିକ ଧାନ କ୍ରୟ ହେଉଥିବା ଦାହୁଣଦା ସେବା ସମବାୟ ସମିତିରେ ଚାଷୀଙ୍କ ଅସନ୍ତୋଷ ତେଜୁଛି । ଧାନ ବିକ୍ରିକୁ ଆଉ ମାତ୍ର ୧୦ଦିନ ବାକି ଥିବା ବେଳେ ୮୫୯ଜଣ ଚାଷୀ ଏପର୍ଯ୍ୟନ୍ତ ଧାନ ବିକ୍ରି କରି ପାରି ନାହାନ୍ତି । ମିଲରଙ୍କ ଏଭଳି କାର୍ଯ୍ୟକଳାପକୁ ନେଇ ଆଗାମୀ ଦିନରେ ଚାଷୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।
ବିବରଣୀରୁ ପ୍ରକାଶ, ଦାହୁଣଦା ସେବା ସମବାୟ ସମିତିରେ ୧୨୮୭ଜଣ ଚାଷୀ ଧାନ ବିକ୍ରି ପାଇଁ ନାମ ପଞ୍ଜିକୃତ କରିଥିଲେ । ୍େୱାନଙ୍କ ମଧ୍ୟରୁ ୧୨୮୪ଜଣଙ୍କୁ ଟୋକନ ମିଳିବା ସହିତ ପାଖାପାଖି ୪୭ ହଜାର କ୍ୱିଣ୍ଟାଲ ଧାନ କ୍ରୟ ଟାର୍ଗେଟ ଥିଲା । ଏଥିପାଇଁ ୧୦ଜଣ ମିଲରଙ୍କୁ ନିଯୁକ୍ତ କରା ଯାଇଥିଲା । ମାତ୍ର ୧୯ ତାରିଖ ସୁଦ୍ଧା ୪୨୫ଜଣ ଚାଷୀଙ୍କ ଠାରୁ ସାଢ଼େ ୧୧ ହଜାର କ୍ୱିଣ୍ଟାଲ ଧାନ କିଣାଯାଇଛି । ଟାର୍ଗେଟ କମ ଥିବାରୁ ଏସଏଲପିସି ଓ ଚାଷୀ କମିଟିର ନିଷ୍ପତ୍ତିକ୍ରମେ ଚାଷୀଙ୍କ ଟୋକନର ୬୦ପ୍ରତିଶତ ଧାନ କିଣା ଯାଉଛି । ପ୍ରତିଦିନ ୧ ହଜାର କ୍ୱିଣ୍ଟାଲ ଧାନ କ୍ରୟ ହେବାର ସରକାରୀ ନିୟମ ରହିଥିବା ବେଳେ ମିଲରମାନେ ଗୋଟିଏ ଗାଡ଼ିରେ ମାତ୍ର ୨୫୦ କ୍ୱିଣ୍ଟାଲ ଧାନ ନେଇ ଚାଲି ଯାଉଛନ୍ତି । ଏବେବି ସମିତି ଅଧୀନରେ ୮୫୯ଜଣ ଚାଷୀ ଧାନ ବିକ୍ରି ପାଇଁ ଅପେକ୍ଷା କରିଛନ୍ତି ।
ଏଭଳି ପରିସ୍ଥିତିରେ ତୁରନ୍ତ ମିଲରମାନେ ପହଞ୍ଚି ସମସ୍ତ ଚାଷୀଙ୍କ ଠାରୁ ଧାନ କିଣିବା ପାଇଁ ଚାଷୀ କମିଟିର ସଦସ୍ୟ ବନ ବିହାରୀ ଦାସ, ମନ୍ମଥ ମହାନ୍ତି, ମନୋରଞ୍ଜନ ମାଝୀ, ବିଜୟ ଦାସ, ଗୌରାଙ୍ଗ ଦାସ ପ୍ରମୁଖ ଦାବି କରିଛନ୍ତି । ବାଲେଶ୍ୱର ଜିଲ୍ଲାପାଳ ଘଟଣା ଉପରେ ଗୁରୁତ୍ୱ ଦେଇ କାର୍ଯ୍ୟାନୁଷ୍ଠାନ ପାଇଁ ଚାଷୀମାନେ ନିବେଦନ କରିଛନ୍ତି । ସମସ୍ତ ଚାଷୀଙ୍କ ଠାରୁ ମିଲର ଧାନ କ୍ରୟ ନକଲେ ସେମାନେ ସମିତି ସମ୍ମୁଖରେ ଅନଶନରେ ବସିବେ ବୋଲି ଚେତାବନୀ ଦେଇଛନ୍ତି ।
