ନୂଆଦିଲ୍ଲୀ: ସର୍ବନିମ୍ନ ସହାୟକ ମୂଲ୍ୟ (ଏମଏସ୍ପି) ଏବଂ ଅନ୍ୟ କେତେକ ଦାବି ନେଇ ଆନ୍ଦୋଳନ କରୁଥିବା କୃଷକ ଶନିବାର ଶମ୍ଭୁ ବର୍ଡରରୁ ଦିଲ୍ଲୀ ଅଭିମୁଖେ ଯାତ୍ରା ଆରମ୍ଭ କରିଛନ୍ତି । ବ୍ୟାରିକେଡ୍ ହଟାଇବାକୁ ଚେଷ୍ଟା କରିବାରୁ ଆନ୍ଦୋଳନରତ କୃଷକଙ୍କ ଉପରେ ପୋଲିସ ଲୁହବୁହା ଗ୍ୟାସ ଏବଂ ଓ୍ବାଟର କ୍ୟାନନର ବ୍ୟବହାର କରିଛି । ଏଥିରେ ଅନେକ କୃଷକ ଆହତ ହୋଇଥିବା ଜଣାପଡ଼ିଛି । ଏହା ପରେ ଦିଲ୍ଲୀ ଚଲୋ ରାଲି ସ୍ଥଗିତ ରଖାଯାଇଛି ।
ଏହାରି ମଧ୍ୟରେ ଚାଷୀ ନେତା ସରଓ୍ବନ ସିଂହ ପନ୍ଧେର ଦେଶବ୍ୟାପୀ ଟ୍ରାକ୍ଟର ରାଲି କରିବାକୁ ଆହ୍ବାନ ଦେଇଛନ୍ତି । ସେ କହିଛନ୍ତି, ‘ଡିସେମ୍ବର ୧୬ (ସୋମବାର)ରେ ପଞ୍ଜାବ ବ୍ୟତୀତ ଦେଶର ବାକି ରାଜ୍ୟରେ ଟ୍ରାକ୍ଟର ମାର୍ଚ୍ଚ ହେବ । ଏହା ପରେ ଡିସେମ୍ବର ୧୮ରେ ୧୨ରୁ ୩ଟା ପର୍ଯ୍ୟନ୍ତ ପଞ୍ଜାବରେ ରେଳ ରୋକ କରାଯିବ ।’ ସେ କୃଷକମାନଙ୍କୁ ପ୍ଲାଟଫର୍ମ ଏବଂ ରେଳ ଫାଟକ ସବୁ ବନ୍ଦ କରିବାକୁ ଆହ୍ବାନ କରିଛନ୍ତି । ସେପଟେ ହରିୟାଣାରେ ପୋଲିସର କାର୍ଯ୍ୟାନୁଷ୍ଠାନ ଯୋଗୁଁ ୧୭-୧୮ କୃଷକ ଆହତ ହୋଇଛନ୍ତି ବୋଲି ସେ ଦାବି କରିଛନ୍ତି ।
କୃଷକ ନେତା ଆହୁରି କହିଛନ୍ତି ଯେ, ‘ଆମ ଦେଶର ୫୦ ପ୍ରତିଶତ ଲୋକ ଚାଷ ସହ ଜଡ଼ିତ । ସେମାନଙ୍କ ସ୍ବରକୁ ଚାପି ଦିଆଯାଇ ପାରିବ ନାହିଁ । ମିଳିତ କୃଷକ ମୋର୍ଚ୍ଚାର ସଂଯୋଜକ ଜଗଜୀତ ସିଂହ ଖନୌରି ଆମରଣ ଅନଶନରେ ବସିଛନ୍ତି । ତାଙ୍କର ସ୍ବାସ୍ଥ୍ୟବସ୍ଥା ଖରାପ ହେଉଥିବା ନେଇ ସମସ୍ତେ ଜାଣିଛନ୍ତି । ଏପରିକି ଏକଥା ପ୍ରଧାନମନ୍ତ୍ରୀ ମୋଦୀ ଜଣାଅଛି ।’ କୃଷକ ନେତା ସରଓ୍ବନ ସିଂହ ପନ୍ଧେର କହିଛନ୍ତି ଯେ, ଦୁନିଆ ଦେଖୁଛି କିଭଳି ପଞ୍ଚମ ବୃହତ୍ତ ଅର୍ଥନୀତିରେ କୃଷକଙ୍କ ବିରୋଧରେ କଳ-ବଳ-କୌଶଳ ବ୍ୟବହାର କରାଯାଉଛି । ଶମ୍ଭୁ ବର୍ଡରରେ ଆମକୁ ସମର୍ଥନ ଦେବାକୁ ପ୍ରାୟ ୧୦ ହଜାର ଲୋକ ଆସିଥିଲେ । ଲୁହବୁହା ଗ୍ୟାସ୍ ଛାଡ଼ି ସେମାନଙ୍କୁ ଗୁରୁତର କରିବାକୁ ଅପଚେଷ୍ଟା କରାଯାଇଛି ବୋଲି ସରଓ୍ବନ ସିଂହ ଅଭିଯୋଗ କରିଛନ୍ତି ।
