ନ୍ୟୁୟର୍କ,୧୧/୦୬ : ଆଜିଠୁ ଆରମ୍ଭ ହେବାକୁ ଯାଉଛି ଫିଫା ବିଶ୍ୱକପ୍ର ୨୩ତମ ସଂସ୍କରଣ । ଐତିହାସିକ ଆଜଟେକା ଷ୍ଟାଡ଼ିୟମ୍ରେ ଆୟୋଜକ ମେକ୍ସିକୋ ଓ ଦକ୍ଷିଣ ଆଫ୍ରିକା ମଧ୍ୟରେ ଉଦଘାଟନୀ ମୁକାବିଲା ଖେଳାଯିବ । ଏହା ପୂର୍ବରୁ ଏକ ରଙ୍ଗା ରଙ୍ଗ ଉଦଯାପନୀ ଉତ୍ସବର ଆୟୋଜନ କରାଯିବ । ମ୍ୟାଚ ସମୟର ୯୦ ମିନିଟ୍(ଦେଢ ଘଣ୍ଟା) ପୂର୍ବରୁ ଉଦଘାଟନୀ ଉତ୍ସବ ଆରମ୍ଭ ହେବ ।
ଉଦଘାଟନୀ ଉତ୍ସବରେ ମୁଖ୍ୟ ଆକର୍ଷଣ ସାଜିବେ ସାକିରା ଓ ବୁର୍ନା ବୟ । ଉଭୟ ବିଶ୍ୱକପ୍ ସଙ୍ଗୀତ ‘ଦାଇ ଦାଇ’ରେ କଣ୍ଠଦାନ କରିଛନ୍ତି । ଏମାନଙ୍କୁ ଏକାଧିକ ଥର ଗ୍ରାମୀ ଆୱାର୍ଡ ଜିତିଥିବା ମେକ୍ସିକୋର ରକ୍ ବ୍ୟାଣ୍ଡ ଗ୍ରୁପ୍ ‘ବ୍ୟାଣ୍ଡ ମାନା’ ଉଦଘାଟନୀ ଉତ୍ସବରେ ଅନ୍ୟତମ ଆକର୍ଷଣ ସାଜିବେ । ଏହା ବ୍ୟତୀତ ପପ ଷ୍ଟାର ଆଲିଜାନ୍ଦ୍ରୋ ଫର୍ଣ୍ଣାଣ୍ଡେଜ, ଗାୟିକା ବେଲିଣ୍ଡା, ମେକ୍ସିକୋର ପାରମ୍ପରିକ ମ୍ୟୁଜିକ୍ ପରିବେଷଣ କରୁଥିବା ଲସ୍ ଏଞ୍ଜଲ୍ସ ଜ୍ୟୁଲ୍ସ, ଦକ୍ଷିଣ ଆଫ୍ରିକାର କଣ୍ଠ ଶିଳ୍ପୀ ଟାୟଲା ପ୍ରମୁଖ ଉଦଘାଟନୀ ଉତ୍ସବରେ ଯୋଗ ଦେବେ । ମାତ୍ର ୧୬ ମିନିଟ୍ ୩୦ ସେକେଣ୍ଡ ମଧ୍ୟରେ ଉଦଘାଟନୀ ଉତ୍ସବ ଶେଷ କରାଯିବ । ଆସନ୍ତାକାଲି ବିଶ୍ୱକପ ପାଇଁ ମେକ୍ସିକୋ ସରକାର ଛୁଟି ଘୋଷଣା କରିଛନ୍ତି ।
