ନୂଆଦିଲ୍ଲୀ,୯।୭: ରାଜସ୍ଥାନର ରତନଗଡ଼ରେ ଫାଇଟର ପ୍ଲେନ୍ କ୍ରାସ୍। ରାଜଲଦେସର ନିକଟରେ ବାୟୁସନାର ବିମାନ ଦୁର୍ଘଟଣାଗ୍ରସ୍ତ ହୋଇଥିବା ବେଳେ ପାଇଲଟଙ୍କ ସହ ୨ ଜଣଙ୍କର ମୃତ୍ୟୁ ହୋଇଛି। କ୍ରାସ୍ ସୂଚନା ମିଳିବା ମାତ୍ରେ ପୋଲିସ ଓ ପ୍ରଶାସନର ଟିମ୍ ଘଟଣାସ୍ଥଳରେ ପହଁଞ୍ଚିଛନ୍ତି।
ଦୁର୍ଘଟଣା ସଂପର୍କରେ ସ୍ଥାନୀୟ ଲୋକଙ୍କ କହିବା ଅନୁଯାୟୀ, ହଠାତ୍ ଆକାଶରେ ଏକ ଜୋରଦାର ଶବ୍ଦ ଶୁଣିବାକୁ ମିଳିଥିଲା। କ’ଣ ଘଟିଲା ଭାବି ବାହାରକୁ ଆସିବାପରେ କ୍ଷେତରୁ ନିଆଁ ଏବଂ ଧୂଆଁ ଉଠୁଥିଲା। ଏହାପରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିବା ଜଣାପଡ଼ିଥିଲା। ଏହାର ଖଣ୍ଡବିଖଣ୍ଡିତ ଅଂଶ କ୍ଷେତରେ ପଡିଥିଲା।
ଭାନୁଦା ଗାଁରେ ଏହି ଦୁର୍ଘଟଣା ଘଟିଥିବା ସୂଚନା ରହିଛି। ଦୁର୍ଘଟଣା ପରେ ପୁଲିସ୍ ଓ ପ୍ରଶାସନିକ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରି ଦେଇଛନ୍ତି। ପ୍ଲେନ କ୍ରାସ୍ ପରେ ସ୍ଥାନୀୟ ଲୋକେ ଭୟଭୀତ ହୋଇଛନ୍ତି। ପୋଲିସ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରିବା ସହ ଲୋକଙ୍କୁ କୌଣସି ପ୍ରକାର ଗୁଜବକୁ ବିଶ୍ବାସ ନକରିବାକୁ ଅପିଲ କରିଛି।
