ମୁମ୍ବାଇ,୧୯/୦୬:ଓଟିଟି ରିଲିଜ ପରେ ଅଡୁଆରେ' କେସରୀ ଚାପ୍ଟର ୨'। ପଶ୍ଚିମବଙ୍ଗରେ ଫିଲ୍ମ ନିର୍ମାତାଙ୍କ ବିରୋଧରେ ରୁଜୁ ହୋଇଛି ମାମଲା। ସ୍ୱାଧୀନତା ସଂଗ୍ରାମ ସହ ଜଡିତ ଐତିହାସିକ ତଥ୍ୟକୁ ବିକୃତ କରାଯାଇଥିବା ଅଭିଯୋଗରେ ରୁଜୁ ହୋଇଛି ଏହି ମାମଲା ।ସେକ୍ଟର ୪ର ନବପଲ୍ଲୀର ବାସିନ୍ଦା ରଣଜିତ ବିଶ୍ୱାସ ଏହି ଅଭିଯୋଗ ଦାଖଲ କରିଛନ୍ତି ।
ସେ କହିଛନ୍ତି ଯେ, ମୁଜାଫରପୁର ଷଡଯନ୍ତ୍ର ମାମଲା ସହିତ ଜଡିତ ଏକ କୋର୍ଟ ରୁମ୍ ସିନ୍ ସମୟରେ ଫିଲ୍ମରେ ବିପ୍ଳବୀ ଖୁଦିରାମ ବୋଷ ଏବଂ ବରିନ୍ଦ୍ର କୁମାର ଘୋଷଙ୍କୁ ଭୁଲ ଭାବରେ ଦର୍ଶାଯାଇଛି । ବିଶ୍ୱାସଙ୍କ ଅଭିଯୋଗ ଅନୁଯାୟୀ,ଫିଲ୍ମରେ ସେମାନଙ୍କୁ ଅମୃତସରର 'ଖୁଦିରାମ ସିଂହ'ଏବଂ 'ବୀରେନ୍ଦ୍ର କୁମାର'ଭାବରେ ଦର୍ଶାଯାଇଛି । ଫାଶୀ ଦିଆଯାଇଥିଲେ ମଧ୍ୟ ବିପ୍ଳବୀମାନଙ୍କ ନାମକୁ ଭୁଲ ଭାବରେ ଉପସ୍ଥାପନ କରିବା ସେମାନଙ୍କ ପ୍ରତି ଅପମାନ । ସେ ଆହୁରି ଅଭିଯୋଗ କରିଛନ୍ତି ଯେ ଏହି ଜିନିଷଗୁଡ଼ିକ ଭୁଲ ସୂଚନା ପ୍ରସାରଣ କରେ ଏବଂ ଲଢ଼େଇକୁ ପ୍ରୋତ୍ସାହିତ କରେ । ଅଭିଯୋଗ ଆଧାରରେ,ପୋଲିସ ଭାରତୀୟ ଦଣ୍ଡ ସଂହିତାର ଧାରା ୩୫୨,୩୫୩(୧), ଏବଂ ୩୫୩(୨) ଅନୁଯାୟୀ ଏକ ମାମଲା ରୁଜୁ କରିଛି ।
ତେବେ 'କେସରୀ ଚାପ୍ଟର ୨'ରେ ଅକ୍ଷୟ କୁମାର ମୁଖ୍ୟ ଭୂମିକାରେ ଅଭିନୟ କରିଥିବା ବେଳେ ତାଙ୍କ ସହିତ ଆର ମାଧବନ ଏବଂ ଅନନ୍ୟା ପାଣ୍ଡେ ମଧ୍ୟ ଫିଲ୍ମରେ ମୁଖ୍ୟ ଭୂମିକାରେ ଅଛନ୍ତି । ଏହି ଫିଲ୍ମଟି ଅମୃତସରର ଜାଲିଆନାୱାଲା ବାଗ ଘଟଣାର ଉପରେ ଆଧାରିତ ଯାହାର ନିର୍ଦ୍ଦେଶନା କରଣ ସିଂହ ତ୍ୟାଗୀ ଦେଇଛନ୍ତି । ଏହି ଫିଲ୍ମଟି ୧୮ ଏପ୍ରିଲରେ ସିନେମା ହଲରେ ମୁକ୍ତିଲାଭ କରିଥିଲା ।
