କଟକ,୧୪/୦୩: ହୋଲି ପର୍ବ ପାଳନ ପରିପ୍ରେକ୍ଷୀରେ ଅଗ୍ନିଶମ ବିଭାଗ ପକ୍ଷରୁ ଏକ ପ୍ରସ୍ତୁତି ବୈଠକ ବସିଥିଲା । ହୋଲି ଦିନ ନଦୀ ଗାଧୁଆରେ ଅଘଟଣ ରୋକିବା ପାଇଁ ବୈଠକରେ ନିଷ୍ପତ୍ତି ହୋଇଛି । ଉଭୟ କାଠଯୋଡି ଓ ମହାନଦୀର ବିଭିନ୍ନ ଘାଟ ଗୁଡିକରେ ସ୍ୱତନ୍ତ୍ର ଉଦ୍ଧାରକାରୀ ଟିମ ମୁତୟନ କରାଯିବାକୁ ନିଷ୍ପତ୍ତି ହୋଇଛି ।
ମୁଖ୍ୟତଃ ମହାନଦୀର କାଳିଆବୁଦା ନିକଟସ୍ଥ ଘାଟ, ଯୋବ୍ରା, ମାଲାଗାଦାମ ଥାନା ନିକଟ, ବାଲିଯାତ୍ରା ତଳ ପଡିଆ, ହାଡିଆପଠା ସଂଲଗ୍ନ ଘାଟ, ଏନସିସି ନ୍ୟାଭି କାର୍ଯ୍ୟାଳୟ, ଚହଟା, ଧବଳେଶ୍ୱର ଗଡା, ଭୁଆଶୁଣି ଗଡା ଓ ନରାଜ ନିକଟ ଘାଟରେ ଉଦ୍ଧାରକାରୀ ଦଳ ସଜାଗ ରହିବ । ସେହିପରି କାଠଯୋଡିରେ ପାଣି ନଥିଲେ ମଧ୍ୟ ରିଂବନ୍ଧରେ ରେସ୍କ୍ୟୁ ଟିମ ଆଲର୍ଟରେ ରହିବ । ବକ୍ସିବଜାର, ବିଡାନାସୀ ଓ ଚାଉଳିଆଗଞ୍ଜ ଅଗ୍ନିଶମ କେନ୍ଦ୍ର ପକ୍ଷରୁ ଗୋଟିଏ କରି ୟୁନିଟ କାର୍ଯ୍ୟକ୍ଷମ ହେବ । ତେବେ ନିଶାଦ୍ରବ୍ୟ ସେବନ କରି ନଦୀ ମଧ୍ୟକୁ ପ୍ରବେଶ ନକରିବାକୁ ଅଗ୍ନିଶମ ଅଧିକାରୀ ସଞ୍ଜିବ ବେହେରା ପରାମର୍ଶ ଦେଇଛନ୍ତି ।
ଅନ୍ୟପଟେ, ପୁଲିସ ପକ୍ଷରୁ ମଧ୍ୟ ସହରରେ ୧୫ ପ୍ଲାଟୁନ ଫୋର୍ସ ମୁତୟନ କରାଯିବ । ହୋଲି ଦିନ କୌଣସି ଅଭିଯୋଗ ପାଇବାର ୧୫ ମିନି୍ଟ ଭିତରେ ଅଭିଯୋଗାକରୀଙ୍କ ସହିତ ଯୋଗାଯୋଗ କରି ପୁଲିସ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି ।
