ନୂଆଦିଲ୍ଲୀ ୨୨/୦୬: ବ୍ରାଜିଲରେ ହଟ୍ ଏୟାର ବେଲୁନ୍ ଉଡ଼ାଣ ବେଳେ ଅଘଟଣ। ଦକ୍ଷିଣ ରାଜ୍ୟ ସାଣ୍ଟା କାଟାରିନାରେ ମଝି ଆକାଶରେ ଜଳିଗଲା ହଟ୍ ଏୟାର ବେଲୁନ । ନିମିଷକେ ଚାଲିଗଲା ୮ ଜଣଙ୍କ ଜୀବନ। ୧୩ ଜଣ ଗୁରୁତର ଆହତ ହସ୍ପିଟାଲରେ ଭର୍ତ୍ତି ।
ସୂଚନା ଅନୁଯାୟୀ, ଏହି ଦୁର୍ଘଟଣାଟି ଶନିବାର ସକାଳେ ଘଟିଥିଲା । ବେଲୁନରେ ମୋଟ ୨୧ ଜଣ ଥିଲେ। ଉଡ଼ାଣ ସମୟରେ ଭୂମିରୁ ପ୍ରାୟ ୧୦୦ ଫୁଟ ଉଚ୍ଚରେ ହଟ ବେଲୁନରେ ହଠାତ ନିଆଁ ଲାଗିଯାଇଥିଲା। ବେଲୁନରେ ବସିଥିବା ଲୋକମାନେ ତଳେ ପଡ଼ିଯାଇଥିଲେ। ଏହି ଦୁର୍ଘଟଣାରେ ୮ ଜଣଙ୍କର ମୃତ୍ୟୁ ହୋଇଥିବା ବେଳେ ୧୩ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ତେବେ ବେଲୁନରେ ନିଆଁ ଲାଗିବାର କାରଣ ଏପର୍ଯ୍ୟନ୍ତ ଜଣାପଡିନାହିଁ । ତଦନ୍ତ ଜାରି ରହିଛି।
