ଚନ୍ଦନେଶ୍ବର,୨୨/୦୫: ଦୁର୍ବୁତ୍ତଙ୍କ ନିଆଁରେ ଜଳି ପୋଡ଼ି ପାଉଁଶ ହେଲା ଲକ୍ଷାଧିକ ଟଙ୍କାର ପାନ ବରଜ । ହତାଶ ହୋଇ ପଡ଼ିଛନ୍ତି ପରିବାର । ନିଆଁ ଲାଗିବାର କାରଣ ଅସ୍ପଷ୍ଟ ରହିଥିବା ବେଳେ ଉଦ୍ୟାନ ବିଭାଗର ଜାରି ରହିଛି ତଦନ୍ତ । ତେବେ ବାଲେଶ୍ବର ଜିଲ୍ଲା ଭୋଗରାଇ ଗମ୍ଭାରିଆ ଗାଁରୁ ସାମ୍ନାକୁ ଆସିଛି ଏହି ଘଟଣା ।
ଭୋଗରାଇ ବ୍ଲକ ବାଡ଼ସରିସା ଗ୍ରାମର ରାମକୃଷ୍ଣ ଜେନା ଦୀର୍ଘ ବର୍ଷ ଗମ୍ଭାରିଆ ଗ୍ରାମରେ ପାନ ବରଜ କରି ଆସୁଥିଲେ । ସେହି ପାନ ବରଜ ଉପରେ ନିର୍ଭର କରି ପରିବାର ପ୍ରତି ପୋଷଣ କରନ୍ତି ରାମକୃଷ୍ଣଙ୍କ ପରିବାର । ଘରର ବଡ଼ ପୁଅଙ୍କ ଗତକାଲି ବିବାହ ଭୋଜି ଥିବା ବେଳେ ପରିବାରର ସମସ୍ତେ ଚନ୍ଦନେଶ୍ୱର ସ୍ଥିତ ଯାତ୍ରୀ ନିବାସରେ ଭୋଜିରେ ବ୍ୟସ୍ତ ଥିଲେ। ଆଉ ସେହି ସମୟରେ ନିଜ ପରିଶ୍ରମର ପାନ ବରଜ ହୁତୁହୁତୁ ହୋଇ ଜଳୁଥିଲା । ସ୍ଥାନୀୟ ଲୋକମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିବା ବେଳେ ପରିବାରକୁ ଏ ବାବଦରେ ଖବର ଦେଇଥିଲେ । ମାତ୍ର ପରିବାର ଲୋକ ଘଟଣାସ୍ଥଳରେ ପହଂଚିବା ପରେ ସମସ୍ତ ପାନ ବରଜ ପୋଡ଼ି ପାଉଁଶ ହୋଇଥିଲା । ଏ ବାବଦରେ ତାଳସାରି ସାମୁଦ୍ରିକ ଥାନାରେ ଅଭିଯୋଗ ହେବା ସହିତ ଘଟଣାର ତଦନ୍ତ ଆରମ୍ଭ ହୋଇଛି।
