ସୋର, ୨୯/୧୧ : ଦୋକାନରୁ ଚୋରି କରିବା ପରେ ନିଆଁ ଲଗାଇଦେଲେ ଦୁର୍ବୃତ୍ତ। ଗୁରୁବାର ବିଳମ୍ବିତ ରାତିରେ ସୋର ବ୍ଲକ ଶିଙ୍ଗାଖୁଣ୍ଟା ବଜାରରେ ଥିବା ଏକ ଗ୍ରୋସେରୀ ଦୋକାନରୁ ଦୁର୍ବୃତ୍ତମାନେ ଚୋରି କରିବା ପରେ ଦୋକାନରେ ନିଆଁ ଲଗାଇ ଦେଇଛନ୍ତି। ଫଳରେ ଲକ୍ଷାଧିକ ଟଙ୍କାର ଜିନିଷପତ୍ର ଜଳିପୋଡ଼ି ଛାରଖାର ହୋଇଯାଇଛି।

ସୂଚନାନୁଯାୟୀ, ସୋର ବ୍ଲକ ଶିଙ୍ଗାଖୁଣ୍ଟା ବଜାରରେ ଉପେନ୍ଦ୍ର ଦୀକ୍ଷିତଙ୍କ ଗ୍ରୋସେରୀ ଦୋକାନ ଅଛି। ଗତକାଲି ବିଳମ୍ବିତ ରାତିରେ କିଛି ଦୁର୍ବୃତ୍ତ ଦୋକାନର ସଟରକୁ ଗ୍ୟାସ କଟରରେ କାଟି ଚୋରି କରିଥିଲେ। ଏହାପରେ ଦୋକାନରେ ନିଆଁ ଲଗାଇଦେଇଥିଲେ। ଫଳରେ ଗ୍ରୋସେରୀ ଦୋକାନ ସହ ନିକଟରେ ଥିବା ଏକ ଇଲେକ୍ଟ୍ରି ଦୋକାନରେ ନିଆଁ ଲାଗି ଯାଇଥିଲା। ଖବର ପାଇ ସୋରରୁ ଦୁଇଟି ଦମକଳ ଗାଡି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ତେବେ ଦୁଇ ଦୋକାନ ସମ୍ପୂର୍ଣ୍ଣ ଜଳିପୋଡି ପାଉଁଶ ହୋଇଯାଇଛି।

ସୂଚନାଯୋଗ୍ୟ, ଗତ ୨୨ ତାରିଖରେ ଉପେନ୍ଦ୍ର ଦୋକାନ ବନ୍ଦ କରି ରାତିରେ ଘରକୁ ଯାଉଥିବା ବେଳେ ଚାରି ଜଣ ଯୁବକ ଦୁଇଟି ବାଇକରେ ଆସି ଭୁଜାଲିରେ ଆକ୍ରମଣ କରି ତାଙ୍କ ମୋବାଇଲ ଏବଂ ନଗଦ ଟଙ୍କା ଲୁଟି ନେଇଥିଲେ। ଏ ବାବଦରେ ଉପେନ୍ଦ୍ର ସୋର ଥାନାରେ ଅଭିଯୋଗ କରିଥିଲେ। କିନ୍ତୁ ପୁଲିସ କିଛି କାର୍ଯ୍ୟାନୁଷ୍ଠାନ ନନେବାରୁ ଦୁର୍ବୃତ୍ତମାନେ ତାଙ୍କ ଦୋକାନଟିକୁ ଜାଳି ଦେଇଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି।