ନୂଆଦିଲ୍ଲୀ ୦୯/୦୪: ବ୍ରିଟେନରେ ପ୍ରଥମ ଥର ଏକ ପ୍ରତିରୋପିତ ଗର୍ଭାଶୟ ଜରିଆରେ କନ୍ୟା ସନ୍ତାନ ଜନ୍ମ ହୋଇଛି । ଶିଶୁକୁ ଜନ୍ମ ଦେଇଥିବା ମା’ ହେଉଛନ୍ତି ୩୬ ବର୍ଷୀୟା ଗ୍ରେସ୍ ଡେଭିଡ୍ସନ୍ । ଜନ୍ମରୁ ତାଙ୍କର ଗର୍ଭାଶୟ କାମ କରୁନଥିଲା । ୨୦୨୩ ମସିହାରେ ଭଉଣୀଙ୍କ ଗର୍ଭାଶୟ ତାଙ୍କଠାରେ ପ୍ରତିରୋପଣ କରାଯାଇଥିଲା । ତାହା ବ୍ରିଟେନର ଏକମାତ୍ର ସଫଳ ଗର୍ଭାଶୟ ପ୍ରତିରୋପଣ ଥିଲା ।
ସଫଳ ଗର୍ଭାଶୟ ପ୍ରତିରୋପଣର ୨ ବର୍ଷ ପରେ ଗ୍ରେସ୍ ଗତ ଫେବ୍ରୁଆରୀରେ ନିଜର ପ୍ରଥମ ସନ୍ତାନ ଜନ୍ମ ଦେଲେ । ଭଉଣୀଙ୍କଠୁ ଦାନରେ ଗର୍ଭାଶୟ ପାଇଥିବାରୁ ତାଙ୍କ ନାମ ଅନୁସାରେ ଗ୍ରେସ୍ ଓ ତାଙ୍କ ସ୍ୱାମୀ ୩୭ ବର୍ଷୀୟ ଆଙ୍ଗସ୍ ଝିଅର ନାଁ ଦେଇଛନ୍ତି ଏମି । ଜନ୍ମବେଳେ ଏମିର ଓଜନ ୨ କିଲୋରୁ ଟିକିଏ ଅଧିକ ଥିଲା । ଦମ୍ପତି ପ୍ରଥମେ ନିଜର ପରିଚୟ ଦେବାକୁ ଚାହୁଁନଥିଲେ । କିନ୍ତୁ ସନ୍ତାନ ଜନ୍ମ ପରେ ଉଭୟ ଗଣମାଧ୍ୟମକୁ ଜଣାଇଛନ୍ତି । ଗ୍ରେସ୍ଙ୍କ ଗର୍ଭାଶୟ ପ୍ରତିରୋପଣ ପରଠୁ ଆଉ ୩ଟି ଗର୍ଭାଶୟ ପ୍ରତିରୋପଣ ଡାକ୍ତର କରିଛନ୍ତି । ପରୀକ୍ଷାମୂଳକ ଭାବେ ୧୫ ଗର୍ଭାଶୟ ପ୍ରତିରୋପଣ ସେମାନଙ୍କ ଲକ୍ଷ୍ୟ ।
ଗ୍ରେସ୍ ‘ମେୟର-ରୋକିଟାନ୍ସ୍କି-କୁଷ୍ଟର-ହସର୍’ ନାମକ ବିରଳ ସିଣ୍ଡ୍ରୋମ୍ରେ ପୀଡ଼ିତ । ଏଥିରେ ଗର୍ଭାଶୟ ନ ଥାଏ କିମ୍ବା ପୂର୍ଣ୍ଣ ବିକଶିତ ହୋଇନଥାଏ । ୨୦୧୪ରେ ସ୍ୱିଡେନ୍ରେ ଗର୍ଭାଶୟ ପ୍ରତିରୋପଣ ମାଧ୍ୟମରେ ପ୍ରଥମ ସନ୍ତାନ ଜନ୍ମ ହୋଇଥିଲା । ସେବେଠୁ ଆମେରିକା, ଚୀନ୍, ଫ୍ରାନ୍ସ, ଜର୍ମାନୀ, ଭାରତ ଓ ତୁର୍କୀ ଆଦି ୧୨ରୁ ଅଧିକ ଦେଶରେ ଏଭଳି ପ୍ରାୟ ୧୩୫ ପ୍ରତିରୋପଣ ହୋଇଛି । ଏହା ଜରିଆରେ ୬୫ ଶିଶୁ ଜନ୍ମ ହୋଇଛନ୍ତି ।
