ଚନ୍ଦନେଶ୍ଵର, ୨୧/୬ : ସୁବର୍ଣ୍ଣରେଖା ନଦୀରେ ପ୍ରଥମ ବନ୍ୟା ପରେ ଭୋଗରାଇ ବ୍ଲକର ୧୦ରୁ ଊର୍ଦ୍ଧ୍ବ ପଞ୍ଚାୟତର ହଜାର ହଜାର ଲୋକ ପ୍ରଭାବିତ ହୋଇଛନ୍ତି । କୁଲ୍ହା, ପନ୍ତେଇ, ଆରୁହାବୃତ୍ତି, ମନୁନଗର, ଖୋଲାବାଡ଼ିଆ ଆଦି ଗ୍ରାମରେ ଘରେ ବନ୍ୟା ଜଳ ପଶି ଆସବାବପତ୍ର ଭାସି ଯାଇଥିବାବେଳେ ଦୁଇ ଦିନ ହେବ ଘର ଛାତ ଉପରେ ଧାନକୁ ସୁରକ୍ଷିତ ରଖି ଅଖିଆ ଅପିଆ ବସିଛନ୍ତି ପରିବାର ଲୋକେ। ଗତ ଦୁଇ ଦିନ ହେବ ଏପରି ସ୍ଥିତି ଥିବାବେଳେ ଏ ପର୍ଯ୍ୟନ୍ତ କୌଣସି ଏକ ବୋଟର ସୁବିଧା ନାହିଁ, ଏପରିକି ପାନୀୟ ଜଳ, ସ୍ୱାସ୍ଥ୍ୟ ସେବା, ଶୁଖିଲା ଖାଦ୍ୟ କିଛି ବି ଏ ପର୍ଯ୍ୟନ୍ତ ବନ୍ୟା ବିପନ୍ନଙ୍କ ପାଖରେ ପହଂଚି ପାରିନାହିଁ । ସେପଟେ ଭୋଗରାଇ ବ୍ଲକ ଖାଳଝରି ସୁଇଚ ଗେଟରେ ଫାଟ। ୩ଟି ଗେଟ ଦେଇ ବାହାରୁଛି ପ୍ରବଳ ପାଣି । ସମ୍ପୂର୍ଣ୍ଣ ଭାଙ୍ଗିଲେ ଭୋଗରାଇରେ ୧୮ଟି ପଞ୍ଚାୟତ ବାହ୍ୟ ଜଗତରୁ ବିଚ୍ଛିନ୍ନ ହୋଇଯିବ । ଗେଟରେ ଫାଟ ଦେଖି ଲୋକ ଛାନିଆ ଥିବାବେଳେ ଦୀର୍ଘ ସମୟ ପାଣି ବାହାରିଲେ ମଧ୍ୟ ଜଳସେଚନ ବିଭାଗ ଏ ପର୍ଯ୍ୟନ୍ତ ପାଣି ରୋକିବାରେ ବିଫଳ ହୋଇଛି । ସୁଇଚ ଗେଟ ସମ୍ପୂର୍ଣ୍ଣ ଭାଙ୍ଗିଲେ ୧୮ଟି ପଞ୍ଚାୟତର ଲୋକେ ପୁଣି ବନ୍ୟା ଜଳରେ ପ୍ରଭାବିତ ହେବେ ।
ଶହ ଶହ ପରିବାର ଏଭଳି ଅବସ୍ଥାରେ ଜୀବନ ଅତିବାହିତ କରୁଥିବାବେଳେ କିଛି ପରିବାର ନଦୀ ବନ୍ଧ ଉପରେ ନିଜର ଛୁଆ ପିଲା ଗୃହ ପାଳିତ ପଶୁକୁ ନେଇ ଏକ ତମ୍ବୁ ମାରି ଅପରିଷ୍କାର ଜାଗାରେ ରାନ୍ଧି ଖାଦ୍ୟ ଖାଉଛନ୍ତି । ରାଜ୍ୟରେ ଝାଡ଼ା ବାନ୍ତି ବ୍ୟାପି ଥିବାର ଡର ଓ ସରିସୃପର ଡର ଥିଲେ ମଧ୍ୟ ନିଜ ଜୀବନକୁ ବାଜି ଲଗାଇ ନଦୀ ବନ୍ଧ ଉପରେ ଜୀବନ କାଟୁଛନ୍ତି ଶହଶହ ପରିବାର । ସୂର୍ଯ୍ୟର ଆଲୋକରେ ଦିନ ବେଳା ଶାନ୍ତିରେ ଲୋକେ ଥିବାବେଳେ ରାତିର କିଟିମିଟି ଅନ୍ଧାରରେ କେମିତି ଘର ଦ୍ୱାର କଥା ଭୁଲି ବନ୍ଧ ଉପରେ ଶାନ୍ତିରେ ଶୋଇବେ ସେଇ ଚିନ୍ତାରେ ଏବେ ଭୋଗରାଇର ହଜାର ହଜାର ପରିବାର । ସେପଟେ ବ୍ଲକରେ ୧୧୦ହେକ୍ଟର ପରିବା ଚାଷ ସଂପୂର୍ଣ୍ଣ ନଷ୍ଟ ହୋଇଥିବା ଉଦ୍ୟାନ ବିଭାଗ ପକ୍ଷରୁ ସୂଚନା । ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି ଏବଂ ସବୁ ବିଭାଗ ତତ୍ପର ମଧ୍ୟ ରହିଛନ୍ତି । ଜରୁରୀକାଳୀନ ପରିସ୍ଥିତି ହେଲେ ରେସ୍କ୍ୟୁ କରାଯିବ ବୋଲି ବନ୍ୟା ଅଞ୍ଚଳରେ ଦାୟିତ୍ୱରେ ଥିବା ଏକଜିକ୍ୟୁଟିଭ ଇଞ୍ଜିନିୟର ପପୁ ଭୂୟାଁ କହିଛନ୍ତି ।
