କୃଷ୍ଣପ୍ରସାଦ,୧୫।୪ : ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ପଣା ଯାତ୍ରା ପଡ଼ିଆରେ ଅଘଟଣ। ରୋଷେଇ କଲା ବେଳେ ଗ୍ୟାସ ଟାଙ୍କି ଫାଟି ଲାଗିଲା ନିଆଁ । ହୁତୁ ହୁତୁ ହୋଇ ଜଳିଗଲା ୫ ଦୋକାନ। ଏହା ଦେଖି ସ୍ଥାନୀୟ ଲୋକେ ନିଆଁ ଲିଭାଇବା ପାଇଁ ଚେଷ୍ଟା କରିଥିଲେ।
ପଣାଯାତ୍ରା ପଡିଆରେ ବ୍ୟବସାୟ କରୁଥିବା ଦୋକାନୀ ରୋଷେଇ କରୁଥିବା ବେଳେ ଗ୍ୟାସ ଟାଙ୍କି ଫାଟି ଅଗ୍ନିକାଣ୍ଡ ଘଟିଥିଲା । କ୍ଷଣକ ମଧ୍ୟରେ ନିଆଁ ନିକଟସ୍ଥ ଦୋକାନରେ ଲାଗିଯିବାରୁ ସେହି ଦୋକାନ ଗୁଡିକରେ ଥିବା ରୋଷେଇ ପାଇଁ ଉଦ୍ଦିଷ୍ଟ ଗ୍ୟାସ ଟାଙ୍କି ଗୁଡିକ ଠୋ ଠା ହୋଇ ଫାଟିଥିଲା ଦୋକାନ ମଧ୍ୟରେ ଥିବା ବ୍ୟବସାୟୀ ମାନେ ଭୟରେ ଦୌଡି ଥିଲେ । କ୍ଷଣକ ମଧ୍ୟରେ ନିଆଁର ପ୍ରକୋପ ଚତୁଃପାର୍ଶ୍ଵରେ ଖେଳିଯାଇଥିଲା । ଦୀର୍ଘ ଦେଢ ଘଣ୍ଟା ଧରି ନିକଟସ୍ଥ ବ୍ୟବସାୟୀ ମାନେ ଦମକଳ ବାହିନୀକୁ ଖବର ଦେବା ସହ ନଳକୂପରୁ ପାଣି ଆଣି ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ । ଖବର ପ୍ରସାରିତ ହେବା ପରେ ବଜାରରେ ଥିବା ଲୋକମାନେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ। ବହୁ ବିଳମ୍ବରେ ମାଲୁଦ ଦମକଳ ବାହିନୀ ପହଞ୍ଚିଥିଲା ।
ଅଗ୍ନିକାଣ୍ଡରେ ଗଞ୍ଜାମ ଓ କାକଟପୁର ଅଞ୍ଚଳର ୧୧ ଜଣ ବ୍ୟବସାୟୀ ବ୍ୟବସାୟ ଉଦ୍ଦେଶ୍ୟରେ ଆଣିଥିବା ଦୋକାନ ସାମଗ୍ରୀ ଜଳିପୋଡି ପାଉଁଶ ହୋଇଯାଇଥିଲା । ବ୍ୟବସାୟୀ ତ୍ରିଲୋଚନ ବେହେରା, ଦୀପକ ବେହେରା, ମାଧବ ବେହେରା ପ୍ରମୁଖ ବ୍ୟବସାୟୀ ଦୁଃଖରେ ଭାଙ୍ଗି ପଡିଥିଲେ। ଅଗ୍ନିକାଣ୍ଡରେ ଥାଳିଆ ଗିନା ଗ୍ଳାସ ଖେଳନା ସାମଗ୍ରୀ ଆଦି ଘରକରଣା ସାମଗ୍ରୀ ନିଆଁରେ ଠୋ ଠା ହୋଇ ଫାଟୁଥିବା ବେଳେ ସେଠାକୁ ଯିବାକୁ ଲୋକମାନେ ଭୟଭୀତ ହୋଇପଡିଥିଲେ ।
