ଜଳେଶ୍ଵର, ୨୬/୦୭ : ଉପରମୁଣ୍ଡରେ ପ୍ରବଳ ଲଘୁଚାପ ବର୍ଷା ଯୋଗୁଁ ଜଳକା ନଦୀରେ ବନ୍ୟା। ବସ୍ତା ମାଥାନି ଠାରେ ସତର୍କ ସୂଚନା ଉପରେ ପ୍ରବାହିତ ହେଉଛି ବନ୍ୟା ପାଣି। ମାଥାନି ଠାରେ ବିପଦ ସଙ୍କେତ ୬. ୫୦ମିଟର ଥିଲାବେଳେ ସକାଳ ୭ଟା ସୁଦ୍ଧା ବନ୍ୟା ଜଳ ୬. ୮୦ ମିଟର ଉପରେ ପ୍ରବାହିତ ହେଉଛି। ବନ୍ୟା ଆସିବା ଫଳରେ ବସ୍ତା ବ୍ଲକର ୭ଟି ପଞ୍ଚାୟତ ଓ ସଦର ବ୍ଲକର ୨ଟି ପଞ୍ଚାୟତ ପ୍ରଭାବିତ ହୋଇଛନ୍ତି। ବହୁ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି। ଚାଷ ଜମିରେ ବନ୍ୟା ପାଣି ଲହଡ଼ି ମାରୁଛି।
ଉପର ମୁଣ୍ଡର ଶୁଳିଆପଦା, ମୁରୁଡ଼ା, ରାସଗୋବିନ୍ଦ ବ୍ଲକରେ ପ୍ରବଳ ବର୍ଷା ଫଳରେ ଜଳକା ନଦୀରେ ବନ୍ୟା ଆସିଛି। ଫଳରେ ବସ୍ତା ବ୍ଲକର ୭ଟି ପଞ୍ଚାୟତ ମଥାନୀ, ବାହାର୍ଦା, ଦରଡ଼ା, ମୁକୁଳିଶି, ଚକୁରାଇ, ସଦାନନ୍ଦପୁର, ପତ୍ରଝଡା ସହିତ ସଦର ବ୍ଲକର ୨ଟି ପଞ୍ଚାୟତ ରସଲପୁର ଓ ଶ୍ରୀରାମପୁର ଆଦି ପଞ୍ଚାୟତରେ ବନ୍ୟା ପାଣି ପଶିଛି। ବହୁ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଛି। ତଳିଆ ଅଞ୍ଚଳ ଲୋକେ ଭୟଭୀତ ଅବସ୍ଥାରେ ଅଛନ୍ତି। ବନ୍ୟା ଆସିବା ଫଳରେ ବସ୍ତା ଓ ମାଥାନି ରାସ୍ତା ଉପରେ ୪ଫୁଟ ଉଚ୍ଚର ପାଣି ଚାଲୁଛି। ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଛି।
