ଲକ୍ଷ୍ନୌ: ଉତ୍ତର ପ୍ରଦେଶର ଅନେକ ଜିଲ୍ଲାରେ ବନ୍ୟା । ପ୍ରବଳ ବର୍ଷ ପରେ ବନ୍ୟା ଯୋଗୁଁ ସାଧାରଣ ଜୀବନ ଅସ୍ତବ୍ୟସ୍ତ ହୋଇପଡ଼ିଛି । ରାଜ୍ୟର ୧୪ଟି ଜିଲ୍ଲାରେ ବନ୍ୟା ବିତ୍ପାତ ଦେଖିବାକୁ ମିଳିଛି । ଲକ୍ଷ ଲକ୍ଷ ଲୋକଙ୍କୁ ପ୍ରଭାବିତ କରିଛି ବନ୍ୟା । ପାଣିପାଗ ବିଭାଗ ରବିବାର ରାଜ୍ୟର ଅନେକ ଜିଲ୍ଲାରେ ପ୍ରବଳ ବର୍ଷା, ପ୍ରବଳ ପବନ ଏବଂ ବଜ୍ରପାତର ସତର୍କତା ମଧ୍ୟ ଜାରି କରିଛି । ପ୍ରଭାବିତ ଜିଲ୍ଲାଗୁଡ଼ିକ ହେଉଛି, ପ୍ରୟାଗରାଜ, ଜାଲୌନ, ଅରାୟା, ହମିରପୁର, ଆଗ୍ରା, ମିର୍ଜାପୁର, ବାରଣାସୀ, କାନପୁର, ବଲିଆ ବାନ୍ଦିଆ, ଇଟାୱା, ଫତେହପୁର,କାନପୁର ନାଗର ଓ ଚିତ୍ରକୁଟ ।
ରିପୋର୍ଟ ଅନୁଯାୟୀ, ବନ୍ୟା ଯୋଗୁଁ ଅନେକ ସ୍ଥାନରେ ରାସ୍ତା ଏବଂ ସେତୁ କ୍ଷତିଗ୍ରସ୍ତ ହୋଇଛି । ଫଳରେ ଯାତାୟାତ ଠପ୍ ହୋଇଯାଇଛି। ଅନେକ ଘରେ ବନ୍ୟା ଜଳ ପଶି ଯାଇଥିବାରୁ ଲୋକଙ୍କୁ ସୁରକ୍ଷିତ ସ୍ଥାନରେ ଆଶ୍ରୟ ନେବାକୁ ପଡୁଛି । ବ୍ୟାପକ ଫସଲ ନଷ୍ଟ ହୋଇଥିବା ଚାଷୀ ଅସହ୍ୟ କ୍ଷତି ସହିଛନ୍ତି । ଗତ କିଛି ଦିନ ଧରି ରାଜ୍ୟରେ ପ୍ରବଳ ବର୍ଷା ଯୋଗୁଁ ଗଙ୍ଗା, ଯମୁନା, ରାମଗଙ୍ଗା, ଗୋମତୀ, ଶାରଦା ଏବଂ ରାପ୍ତୀ ଭଳି ଅନେକ ନଦୀ ବିପଦ ସଙ୍କେତରେ ପ୍ରବାହିତ ହେଉଛି ।
ବହରାଇଚ, ବଳରାମପୁର, ଲଖିମପୁର ଖେରୀ, ସୀତାପୁର, ବାରବାଙ୍କି, ଗୋଣ୍ଡା ଏବଂ ଶ୍ରାବସ୍ତି ଭଳି ଉତ୍ତର ଜିଲ୍ଲାଗୁଡ଼ିକରେ ବନ୍ୟା ପରି ପରିସ୍ଥିତି ସୃଷ୍ଟି ହୋଇପାରେ। ତଳିଆ ଅଞ୍ଚଳରେ ଜଳବନ୍ଦୀର ସମସ୍ୟା ଗୁରୁତର ହୋଇପାରେ । ଫଳରେ ରାସ୍ତାରେ ଯାତାୟାତ ବାଧାପ୍ରାପ୍ତ ହେବାସହ ଅଣ୍ଡରପାସ୍ ବନ୍ଦ ହେବାର ସମ୍ଭାବନା ରହିଛି ।
ଏହା ସହିତ ଗତ ୨୪ ଘଣ୍ଟା ମଧ୍ୟରେ ମୋରାଦାବାଦ (୨୭୦ ମିମି), ସମ୍ଭଲ (୨୧୦ ମିମି), ହରଦୋଇ (୧୭୦ ମିମି) ଏବଂ ବାରବାଙ୍କି (୩୨୦ ମିମି) ଜିଲ୍ଲାରେ ପ୍ରବଳ ବର୍ଷା ରେକର୍ଡ କରାଯାଇଛି । ଫଳରେ ଅନେକ ଗାଁରେ ବନ୍ୟା ଆଶଙ୍କା ବୃଦ୍ଧି ପାଇଛି। ପାଣିପାଗ ବିଭାଗ ସତର୍କ କରିଛି ଯେ, ସହରାଞ୍ଚଳରେ ଜଳବନ୍ଦୀ, ଗ୍ରାମାଞ୍ଚଳରେ ଫସଲ କ୍ଷତି ଏବଂ କଚ୍ଚା ରାସ୍ତା କ୍ଷତିଗ୍ରସ୍ତ ହୋଇପାରେ। ଏହି ଜିଲ୍ଲାଗୁଡ଼ିକରେ ବଜ୍ରପାତ ସହ ପବନ ଓ ବର୍ଷା ହେବାର ସମ୍ଭାବନା ରହିଛି |
