ନୂଆଦିଲ୍ଲୀ: ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବେ ଲଣ୍ଡନ ଗସ୍ତରେ ଅଛନ୍ତି। ଏହି ସମୟରେ ଜୟଶଙ୍କର ଭାରତର ଶତ୍ରୁ ଦେଶ ମାନଙ୍କୁ ମୌଖିକ ଆକ୍ରମଣ କରିଚାଲିଛନ୍ତି। ତାଙ୍କର ଏହି ଆକ୍ରମଣାତ୍ମକ ମନୋଭାବ ପୁଣିଥରେ ଦେଖିବାକୁ ମିଳିଛି। ବୁଧବାର ଲଣ୍ଡନରେ ଚଥମ ହାଉସ ଥିଙ୍କ-ଟ୍ୟାଙ୍କ ଅଧିବେଶନକୁ ସମ୍ବୋଧିତ କରି ଜୟଶଙ୍କର କହିଥିଲେ ଯେ, ପାକିସ୍ତାନ ଦ୍ୱାରା ଅବୈଧ ଭାବରେ ଅଧିକୃତ କାଶ୍ମୀରର ଚୋରି ହୋଇଥିବା ଅଂଶ ଫେରି ପାଇବା ପରେ ହିଁ କାଶ୍ମୀର ବିବାଦର ସମାଧାନ ହେବ। ତାଙ୍କର ଏହି ବୟାନ ପରେ ପାକିସ୍ତାନ ଭୟଭୀତ ହୋଇଯାଇଛି।
ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ମନ୍ତବ୍ୟ ପରେ, ପାକିସ୍ତାନ ବୈଦେଶିକ କାର୍ଯ୍ୟାଳୟର ମୁଖପାତ୍ର ଶଫକତ ଅଲି ଖାନ ଏକ ସାମ୍ବାଦିକ ସମ୍ମିଳନୀ କରି ଜୟଶଙ୍କରଙ୍କ ମନ୍ତବ୍ୟକୁ ପ୍ରତ୍ୟାଖ୍ୟାନ କରିଛନ୍ତି ଏବଂ ଭାରତକୁ କାଶ୍ମୀରର ଯେଉଁ ଅଂଶ ଅଧିକୃତ କରିଛି ତାହାକୁ ଖାଲି କରିବାକୁ କହିଛନ୍ତି । ଖାନ କହିଛନ୍ତି,"ମାର୍ଚ୍ଚ ୫ ତାରିଖରେ ଲଣ୍ଡନର ଚଥମ ହାଉସରେ ଆୟୋଜିତ ଏକ କାର୍ଯ୍ୟକ୍ରମରେ ଭାରତୀୟ ବୈଦେଶିକ ମନ୍ତ୍ରୀଙ୍କ ଦ୍ୱାରା ଜମ୍ମୁ ଏବଂ କାଶ୍ମୀର ଉପରେ ଦିଆଯାଇଥିବା ମନ୍ତବ୍ୟକୁ ଆମେ ଖାରଜ କରୁଛୁ। ସେ କହିଛନ୍ତି କି, "ଆଜାଦ ଜମ୍ମୁ କାଶ୍ମୀର ବିଷୟରେ ଭିତ୍ତିହୀନ ଦାବି କରିବା ପରିବର୍ତ୍ତେ, ଭାରତ ଗତ ୭୭ ବର୍ଷ ଧରି କବଜା କରିଆସୁଥିବା ଜମ୍ମୁ କାଶ୍ମୀରର ଏକ ବଡ଼ ଅଞ୍ଚଳକୁ ଖାଲି କରିବା ଉଚିତ।"
ବ୍ରିଟେନ ଗସ୍ତରେ ଥିବା ଜୟଶଙ୍କର ଚଥମ ହାଉସରେ ଆୟୋଜିତ ଏକ କାର୍ଯ୍ୟକ୍ରମରେ କହିଥିଲେ ଯେ, ଧାରା ୩୭୦ ହଟାଇବା ପ୍ରଥମ ପଦକ୍ଷେପ। କାଶ୍ମୀରରେ ବିକାଶ, ଅର୍ଥନୈତିକ କାର୍ଯ୍ୟକଳାପ ଏବଂ ସାମାଜିକ ନ୍ୟାୟ ପୁନରୁଦ୍ଧାର କରିବା ଦ୍ୱିତୀୟ ପଦକ୍ଷେପ ଏବଂ ଅଧିକ ଭୋଟର ମତଦାନ ସହିତ ନିର୍ବାଚନ ପରିଚାଳନା ତୃତୀୟ ପଦକ୍ଷେପ। କାଶ୍ମୀର ସମସ୍ୟାର "ସମାଧାନ" ବିଷୟରେ ଜଣେ ଶ୍ରୋତାଙ୍କ ପ୍ରଶ୍ନର ଉତ୍ତର ଦେଇ ବୈଦେଶିକ ମନ୍ତ୍ରୀ କହିଥିଲେ,"ମୁଁ ଭାବୁଛି ଆମେ ଯାହା ଅପେକ୍ଷା କରିଛୁ ତାହା ହେଉଛି ପାକିସ୍ତାନର ଅବୈଧ ଦଖଲରେ ଥିବା କାଶ୍ମୀରର ଚୋରି ହୋଇଥିବା ଅଂଶର ଫେରିବା। ଯେତେବେଳେ ଏହା ହେବ,ମୁଁ ଆପଣଙ୍କୁ ପ୍ରତିଶ୍ରୁତି ଦେଉଛି ଯେ କାଶ୍ମୀର ସମସ୍ୟାର ସମାଧାନ ହୋଇଯିବ। ଭାରତ ବାରମ୍ବାର ପାକିସ୍ତାନକୁ କହିଛି ଯେ ଜମ୍ମୁ-କାଶ୍ମୀର ଦେଶର ଏକ ଅବିଚ୍ଛେଦ୍ୟ ଅଙ୍ଗ ଥିଲା ଏବଂ ସବୁବେଳେ ରହିବ।
