ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ଅସ୍ତ୍ରବିରତି ପାଇଁ ରାଜି ହୋଇଛନ୍ତି । ଆମେରିକାର ମଧ୍ୟସ୍ଥତା ପରେ ଅସ୍ତ୍ରବିରତି ପାଇଁ ଦୁଇ ଦେଶ ସହମତି ପ୍ରକାଶ କରିଛନ୍ତି । ମେ ୧୨ରେ ଉଭୟ ଦେଶ ପୁଣି ଥରେ ଏହି ପ୍ରସଙ୍ଗରେ ଆଲୋଚନା କରିବେ । ଭାରତ ସରକାରଙ୍କ ପକ୍ଷରୁ କୁହାଯାଇଛି ଯେ, ଶନିବାର ସନ୍ଧ୍ୟା ୫ ଟା ପରେ ଦୁଇ ଦେଶ ମଧ୍ୟରେ ଲଢ଼େଇ ହେବ ନାହିଁ । ଏବେ ଦୁଇ ଦେଶ ମଧ୍ୟରେ ଅସ୍ତ୍ରବିରତି ଉପରେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଟ୍ୱିଟ୍ କରିଛନ୍ତି ।
ସେ ଲେଖିଛନ୍ତି ଯେ, ଭାରତ ଆତଙ୍କବାଦ ପ୍ରସଙ୍ଗରେ କୌଣସି ସାଲିସ କରିବ ନାହିଁ। ଭାରତ ଏବଂ ପାକିସ୍ତାନ ଆଜି ଗୁଳିମାଡ଼ ଏବଂ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ରାଜି ହୋଇଛନ୍ତି। ଭାରତ ନିରନ୍ତର ଭାବରେ ସମସ୍ତ ପ୍ରକାରର ଆତଙ୍କବାଦ ବିରୋଧରେ ଦୃଢ଼ ଏବଂ ଅଟଳ ମନୋଭାବ ଗ୍ରହଣ କରିଆସିଛି। ଏହା ଜାରି ରହିବ ।
ଏହା ପୂର୍ବରୁ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ କହିଥିଲେ ଯେ, ଗତ ୪୮ ଘଣ୍ଟା ମଧ୍ୟରେ ଉପରାଷ୍ଟ୍ରପତି ଭାନ୍ସ ଓ ମୁଁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଶାହବାଜ ସରିଫ, ବୈଦେଶିକ ମନ୍ତ୍ରୀ ଏସ ଜୟଶଙ୍କର, ସେନା ମୁଖ୍ୟ ଅସୀମ ମୁନିର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସମେତ ବରିଷ୍ଠ ଭାରତୀୟ ଏବଂ ପାକିସ୍ତାନୀ ଅଧିକାରୀଙ୍କ ସହ କଥା ହୋଇଛୁ। ଏହା ପୂର୍ବରୁ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଅସ୍ତ୍ରବିରତି ବିଷୟରେ ଟ୍ୱିଟ୍ କରିଥିଲେ। ପୂର୍ବରୁ ଭାରତ ସରକାର ନିଷ୍ପତ୍ତି ନେଇଥିଲେ ଯେ, ଭବିଷ୍ୟତରେ ଯେକୌଣସି ଆତଙ୍କବାଦୀ ଆକ୍ରମଣକୁ ଭାରତ ବିରୁଦ୍ଧରେ ଯୁଦ୍ଧ ବୋଲି ବିବେଚନା କରାଯିବ। ଅର୍ଥାତ୍ ଭାରତ ସରକାର ଆତଙ୍କବାଦ ପ୍ରସାର କରୁଥିବା ଦେଶକୁ ଜବାବ ଦେବେ ଏବଂ ଆତଙ୍କବାଦକୁ ସହ୍ୟ କରିବେ ନାହିଁ।
