ଭବାନୀପାଟଣା,୧୪/୧୧: କଳାହାଣ୍ଡି ଜିଲ୍ଲା ଜାରିଂ ହାଇଟେକ୍ ନର୍ସରୀର ସେଲଭି କଲଚର୍ ରିସର୍ଚ୍ଚ ୱିଙ୍ଗ ଫରେଷ୍ଟର ସଞ୍ଜୟ ନାୟକ ଗତ ସେପ୍ଟେମ୍ବର ୧୮ ତାରିଖରେ ଆତ୍ମହତ୍ୟା କରିଥିଲେ । ଏହି ମାମଲାରେ ଛନ୍ଦି ହୋଇଥିବା ରାୟଗଡ଼ା ଡିଏଫ୍ଓ (ରିସର୍ଚ୍ଚ ୱିଙ୍ଗ) ଦେବେନ୍ଦ୍ର ବେହେରାଙ୍କୁ ହାଇକୋର୍ଟରୁ ମିଳିଥିବା ଆନ୍ତରୀଣ ସର୍ତ୍ତମୂଳକ ସୁରକ୍ଷା ଜାମିନ ଅବଧି ଗତ ୧୧ ତାରିଖ ଶେଷ ହୋଇଛି । ଘଟଣାର ତଦନ୍ତ କରୁଥିବା ଭବାନୀପାଟଣା ଟାଉନ୍ ପୁଲିସ୍ ପକ୍ଷରୁ ହାଇକୋର୍ଟରେ ମାମଲାର ସମସ୍ତ କେସ୍ ଡାଏରି ଦାଖଲ କରାଯାଇଛି । ଏହାର ଟିକନିଖ ଯାଞ୍ଚପରେ କୋର୍ଟ ଶୁଣାଣି କରିବେ ।
ଅପରପକ୍ଷେ, ମାମଲାର ତଦନ୍ତ କରୁଥିବା ଭବାନୀପାଟଣା ସଦର ଏସଡିପିଓ ସୁନାରାମ ହେମ୍ବ୍ରମଙ୍କ ପଦୋନ୍ନତି ହେବାସହ ଭୁବନେଶ୍ୱର କମିଶନରେଟ ପୁଲିସ୍କୁ ବଦଳି ହୋଇଛି । ସେହିପରି ତଦନ୍ତ ଅଧିକାରୀ (ଆଇଓ) ସବ୍ଇନ୍ସପେକ୍ଟର ତପନ କାଲୋଙ୍କ ମଧ୍ୟ ଜୁନାଗଡ଼ ଥାନାକୁ ବଦଳି ହୋଇଛି । ଏବେ ମାମଲାର ତଦନ୍ତ ଭବାନୀପାଟଣା ଟାଉନ ଥାନାଧିକାରୀ ଯଶୋବନ୍ତ ହିଆଲ କରିବେ ବୋଲି ଏସ୍ଡିପିଓ ଶ୍ରୀ ହେମ୍ବ୍ରମ ପ୍ରକାଶ କରିଛନ୍ତି ।
