ଜୟପୁର/ କୋରାପୁଟ ୨୮/୧୦: ଖାଦ୍ୟରେ ବିଷକ୍ରିୟା! ଏଥିଯୋଗୁ ଗୁରୁତର ଅସୁସ୍ଥ ହୋଇପଡ଼ିଛନ୍ତି ପୂର୍ବତନ ମନ୍ତ୍ରୀ ପଦ୍ମିନୀ ଦିଆନ୍ । ତାଙ୍କ ସମେତ ପରିବାରର ୪ଜଣ ଗୁରୁତର ହୋଇଥିଲେ । ସେମାନଙ୍କ ମଧ୍ୟରୁ ପଦ୍ମିନୀଙ୍କ ନଣନ୍ଦ ପାର୍ବତୀ ମାଝୀ(୨୮)ଙ୍କ ଚିକିତ୍ସାଧୀନ ଅବସ୍ଥାରେ ଜୟପୁରରେ ଥିବା ଜିଲ୍ଲା ହସ୍ପିଟାଲ୍ରେ ଦେହାନ୍ତ ହୋଇଯାଇଛି। ପଦ୍ମିନୀ ଏବଂ ଅନ୍ୟ ୨ଜଣ ମହିଳାଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ୍ କଲେଜ ଓ ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି ।
ମିଳିଥିବା ସୂଚନା ଅନୁଯାୟୀ, ଆଜି ନଣନ୍ଦ ପାର୍ବତୀ, ଦେଢ଼ଶାଶୂ ରମ୍ବତୀ ଦିଆନ(୫୭) ଏବଂ ଶାନ୍ତି ଚାଲାଣ(୩୦)ଙ୍କ ସହ ମଧ୍ୟାହ୍ନ ଭୋଜନ କରିଥିଲେ କୋଟପାଡ଼ର ପୂର୍ବତନ ବିଜେଡି ବିଧାୟିକା ତଥା ମନ୍ତ୍ରୀ ପଦ୍ମିନୀ । ଅପରାହ୍ଣ ପ୍ରାୟ ୨ଟା ବେଳେ ଅର୍ଥାତ୍ ଖାଦ୍ୟ ଖାଇବା ପରେ ପରେ ସମସ୍ତେ ବାନ୍ତି କରି ଅସୁସ୍ଥ ହୋଇପଡ଼ିଥିଲେ । ସଙ୍ଗେ ସଙ୍ଗେ ସେମାନଙ୍କୁ କୋଟପାଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଇଞ୍ଜେକ୍ସନ୍ ଏବଂ ଔଷଧ ଦିଆଯିବା ପରେ ବି ବାନ୍ତି ଥମି ନଥିଲା । ଅବସ୍ଥା ଜଟିଳ ହେବାରେ ଲାଗିଥିଲା । ଏହା ଦେଖି ଡାକ୍ତରମାନେ ସେମାନଙ୍କୁ କୋରାପୁଟ ମେଡିକାଲ୍ କଲେଜ ନେଇଯିବା ପାଇଁ ପରାମର୍ଶ ଦେଇଥିଲେ । ବାଟରେ ଅବସ୍ଥା ଗୁରୁତର ହେବାରୁ ଏଠାରେ ଥିବା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ପାର୍ବତୀଙ୍କ ମୃତ୍ୟୁ ହୋଇଯାଇଥିଲା । ପରେ ଡାକ୍ତର ପଦ୍ମିନୀ, ରମ୍ବତୀ ଓ ଶାନ୍ତିଙ୍କୁ କୋରାପୁଟ ସ୍ଥାନାନ୍ତର ପାଇଁ ପରାମର୍ଶ ଦେଇଥିଲେ । କୋରାପୁଟ ମେଡିକାଲ୍ ତରଫରୁ ମିଳିଥିବା ସୂଚନା ଅନୁଯାୟୀ, ସେମାନଙ୍କ ଚିକିତ୍ସା ଜାରି ରହିଛି । ରମ୍ବତୀଙ୍କ ଅବସ୍ଥା ସଙ୍ଗୀନ ରହିଛି । ତାଙ୍କୁ ଅକ୍ସିଜେନ୍ ଦିଆଯାଇ ଚିକିତ୍ସା କରାଯାଉଛି । ପଦ୍ମିନୀ ଓ ଶାନ୍ତିଙ୍କ ଅବସ୍ଥାରେ ସୁଧାର ଆସୁଛି ।
ଉଲ୍ଲେଖଥାଉକି, ମଧ୍ୟାହ୍ନ ଭୋଜନରେ ସେମାନେ କୁଆଡ଼େ ଆମଟ୍(ଆମ୍ବିଳ) ଖାଇଥିଲେ । ଶୁଖିଲା ବାଉଁଶ କରଡ଼ି ପଡ଼ି ତାହା ପ୍ରସ୍ତୁତ କରାଯାଇଥିଲା । ଭାତ ସହ ଏହାକୁ ଖାଇ ସାରିବା ପରେ ପରେ ଆରମ୍ଭ ହୋଇଯାଇଥିଲା ପ୍ରବଳ ବାନ୍ତି । ଜଣଙ୍କ ପରେ ଜଣେ କରି ୪ଜଣ ଗୁରୁତର ଅସୁସ୍ଥ ହୋଇପଡ଼ିଥିଲେ ।
