ନୂଆଦିଲ୍ଲୀ: ସରକାରୀ ଅର୍ଥ ହେରଫେର ମାମଲାରେ ଶ୍ରୀଲଙ୍କାର ପୂର୍ବତନ ରାଷ୍ଟ୍ରପତି ରାନିଲ ବିକ୍ରମାସିଂଘେ ଗିରଫ । ସମ୍ବାଦ ସରବରାହ ସଂସ୍ଥା ଏଏଫପିର ରିପୋର୍ଟ ଅନୁଯାୟୀ, ସେପ୍ଟେମ୍ବର ୨୦୨୩ରେ ଏକ ବ୍ରିଟିଶ ବିଶ୍ୱବିଦ୍ୟାଳୟରେ ତାଙ୍କ ପତ୍ନୀଙ୍କ ସମ୍ମାନାର୍ଥେ ଆୟୋଜିତ ଉତ୍ସବରେ ଯୋଗଦେବା ପାଇଁ ଲଣ୍ଡନ ଯାତ୍ରା ବିଷୟରେ ପଚରାଯିବା ପରେ ବିକ୍ରମସିଂଘେଙ୍କୁ ଅଟକ ରଖାଯାଇଥିଲା । ଜଣେ ଅଧିକାରୀ କହିଛନ୍ତି ଯେ, ତାଙ୍କୁ କଲମ୍ବୋ ଫୋର୍ଟ ମାଜିଷ୍ଟ୍ରେଟଙ୍କ ସମ୍ମୁଖରେ ହାଜର କରାଯିବ । ବିକ୍ରମାସିଂଘେଙ୍କ ଉପରେ ବ୍ୟକ୍ତିଗତ ଉଦ୍ଦେଶ୍ୟରେ ଦେଶର ସମ୍ବଳ ବ୍ୟବହାର କରିବାର ଅଭିଯୋଗ ହୋଇଛି । 

୨୦୨୩ ମସିହାରେ ହାଭାନାରୁ G-୭୭ ଶିଖର ସମ୍ମିଳନୀରେ ଯୋଗ ଦେଇ ଫେରିବା ସମୟରେ ରାନିଲ ବିକ୍ରମାସିଂଘେ ଲଣ୍ଡନରେ ଅଟକିଥିଲେ । ଏହି ସମୟରେ ବିକ୍ରମାସିଂଘେ ଏବଂ ତାଙ୍କ ପତ୍ନୀ ମୈତ୍ରୀ ୱଲଭରହାମ୍ପଟନ୍ ବିଶ୍ୱବିଦ୍ୟାଳୟର ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ । ବିକ୍ରମାସିଂଘେ କହିଥିଲେ ଯେ, ତାଙ୍କ ପତ୍ନୀ ତାଙ୍କ ଯାତ୍ରାର ଖର୍ଚ୍ଚ ନିଜେ ବହନ କରିଛନ୍ତି ଏବଂ ଏଥିରେ କୌଣସି ସରକାରୀ ଟଙ୍କା ବ୍ୟବହାର କରାଯାଇ ନାହିଁ । ପୁଲିସ ଅଭିଯୋଗ କରିଛି ଯେ, ବିକ୍ରମାସିଂଘେ ବ୍ୟକ୍ତିଗତ ଯାତ୍ରା ପାଇଁ ସରକାରୀ ଟଙ୍କା ବ୍ୟବହାର କରିଥିଲେ । ରାନିଲ ବିକ୍ରମାସିଂଘେଙ୍କ ଅଙ୍ଗରକ୍ଷୀଙ୍କୁ ମଧ୍ୟ ସରକାରୀ କୋଷାଗାରରୁ ଦରମା ଦିଆଯାଇଥିଲା । 

ସମାନ ମାମଲାରେ ବିକ୍ରମାସିଂଘେ ତାଙ୍କ ବୟାନ ରେକର୍ଡ କରିବା ପାଇଁ ସିଆଇଡି କାର୍ଯ୍ୟାଳୟରେ ପହଞ୍ଚିଥିଲେ । ସେଠାରୁ ତାଙ୍କୁ ଗିରଫ କରାଯାଇଥିବା ଜଣାପଡ଼ିଛି । ୨୦୨୨ରେ ତତ୍କାଳୀନ ରାଷ୍ଟ୍ରପତି ଗୋଟାବାୟା ରାଜପକ୍ଷେ ଦେଶ ଛାଡ଼ି ପଳାୟନ କରିବା ପରେ ବିକ୍ରମାସିଙ୍ଘେ  ଦାୟିତ୍ୱ ଗ୍ରହଣ କରିଥିଲେ । ସେତେବେଳେ ଦୁର୍ନୀତି ଅଭିଯୋଗକୁ ନେଇ ରାଜପକ୍ଷେଙ୍କ ବିରୋଧରେ ଶ୍ରୀଲଙ୍କାରେ ବିରୋଧ ପ୍ରଦର୍ଶନ ହୋଇଥିଲା । ୨୦୨୨ରେ ଶ୍ରୀଲଙ୍କାର ସବୁଠାରୁ ଖରାପ ଆର୍ଥିକ ସଙ୍କଟ ପରେ ଦେଶର ଅର୍ଥନୀତିକୁ ସ୍ଥିର କରିବା ପାଇଁ ବିକ୍ରମାସିଂଘେଙ୍କୁ ଶ୍ରେୟ ଦିଆଯାଏ । କିନ୍ତୁ ସେ ସେପ୍ଟେମ୍ବରରେ ପୁନଃନିର୍ବାଚନରେ ପରାସ୍ତ ହୋଇଥିଲେ ।