ନୂଆଦିଲ୍ଲୀ ୩୦/୮ : ଦେଶର ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ ରାଜସ୍ଥାନ ବିଧାନସଭାରେ ପେନସନ ପାଇଁ କରିଛନ୍ତି ଆବେଦନ। ଧନଖଡ ୧୯୯୩ ମସିହାରେ କଂଗ୍ରେସ ଟିକେଟରେ ଆଜମେର ଜିଲ୍ଲାର କିଶନଗଡ଼ ଆସନରୁ ବିଧାୟକ ନିର୍ବାଚିତ ହୋଇଥିଲେ। ବିଧାୟକ ହୋଇଥିବାରୁ ତାଙ୍କର ଏବେ ବିଧାନସଭାରୁ ପେନସନ ପାଇବାର ରହିଛି ଅଧିକାର।
ନିୟମ ଅନୁଯାୟୀ, ଜଗଦୀପ ଧନଖଡ ରାଜସ୍ଥାନ ବିଧାନସଭାରୁ ପ୍ରାୟ ୪୨ ହଜାର ଟଙ୍କା ମାସିକ ପେନସନ ପାଇବେ। ରାଜସ୍ଥାନରେ ନେତାମାନଙ୍କ ପାଇଁ ଦୁଇଗୁଣ ଏବଂ ତିନିଗୁଣ ପେନସନର ବ୍ୟବସ୍ଥା ଅଛି। ଏହି କାରଣରୁ ଅନେକ ପୂର୍ବତନ ନେତା ଏକକାଳୀନ ବିଭିନ୍ନ ପଦର ପେନସନ ନିଅନ୍ତି। ଏନେଇ ବିଧାନସଭା ବାଚସ୍ପତି ବାସୁଦେବ ଦେବନାନି ନିଶ୍ଚିତ କରିଛନ୍ତି ଯେ ଧନଖଡଙ୍କ ପେନସନ ଆବେଦନ ବିଧାନସଭା ଦ୍ୱାରା ଗ୍ରହଣ କରାଯାଇଛି । ପ୍ରକାଶ ଥାଉକି, ଜଗଦୀପ ଧନଖଡ଼ ହଠାତ୍ଜୁଲାଇ ୨୧ ତାରିଖରେ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ। ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଏକ ଚିଠି ଲେଖି ତାଙ୍କ ଇସ୍ତଫା ବିଷୟରେ ଜଣାଇଥିଲେ। ତାଙ୍କ ଚିଠିରେ ସେ ସ୍ୱାସ୍ଥ୍ୟଗତ କାରଣ ଦର୍ଶାଇ ଦେଇଥିଲେ ଇସ୍ତଫା । ଯଦିଓ ବିରୋଧୀ ଦଳ ପକ୍ଷରୁ ତାଙ୍କ ଇସ୍ତଫାକୁ ନେଇ ଅନେକ ପ୍ରଶ୍ନ ଉଠିଥିଲା। ଅନ୍ୟପକ୍ଷରେ, ନିକଟରେ ଗୃହମନ୍ତ୍ରୀ ଅମିତ ଶାହ ମଧ୍ୟ ଏକ ସାକ୍ଷାତକାରରେ ସ୍ପଷ୍ଟ କରିଥିଲେ ଯେ ଜଗଦୀପ ଧନଖଖଡ ସ୍ୱାସ୍ଥ୍ୟଗତ କାରଣରୁ ଇସ୍ତଫା ଦେଇଛନ୍ତି।
