ନୂଆଦିଲ୍ଲୀ,୦୬/୧୨: କ୍ରିକେଟ ଜଗତ ପାଇଁ ଡିସେମ୍ବର ୬ ତାରିଖ ବହୁତ ଖାସ୍ । ଏହି ଦିନ କେବଳ ଜଣେ ନୁହଁନ୍ତି ବରଂ ୪ ଜଣ ଷ୍ଟାର କ୍ରିକେଟରଙ୍କ ଜନ୍ମଦିନ । ଏହି ଲିଷ୍ଟରେ ଭାରତର ଷ୍ଟାର କ୍ରିକେଟର ଯଶପ୍ରୀତ ବୁମରା, ଅଲରାଉଣ୍ଡର ରବୀନ୍ଦ୍ର ଜାଡେଜା, ଶ୍ରେୟାସ ଆୟର ଓ ଆରପି ସିଂହ ରହିଛନ୍ତି । ଏହି ୪ ଖେଳାଳି ଜଣଙ୍କଠୁ ବଳି ଜଣେ । ନିଜ ନିଜ ଦକ୍ଷତାରେ ସଫଳ ସାବ୍ୟସ୍ତ ହୋଇଛନ୍ତି ଏହି ୪ ଷ୍ଟାର ପ୍ଲେୟାର । ଭାରତୀୟ କ୍ରିକେଟର ଗର୍ବ ଓ ଗୌରବ ୪ ଖେଳାଳି ଗୋଟିଏ ଦିନରେ ଜନ୍ମଦିନ ପାଳିଛନ୍ତି । ଫ୍ୟାନ୍ସଙ୍କ ନିକଟରୁ କ୍ରିକେଟରଙ୍କୁ ଛୁଟିଛି ଶୁଭେଚ୍ଛା ।
ଯଶପ୍ରୀତ ବୁମରା- ବୁମ୍ ବୁମ୍ ବୁମରା ଟ୍ୟାଗ ପାଇଥିବା ଷ୍ଟାର କ୍ରିକେଟର ଯଶପ୍ରୀତ ବୁମରା ୩୧ ବର୍ଷରେ ପାଦ ଥାପିଛନ୍ତି । ୟର୍କର କିଙ୍ଗ ବୁମରା ସବୁ ଫର୍ମାଟରେ ଜଣେ ସଫଳ ବୋଲର ସାବ୍ୟସ୍ତ ହୋଇଛନ୍ତି । ବିସିସିଆଇର ଏ ପ୍ଲସ ଗ୍ରେଡ ପ୍ଲେୟାର ବୁମରା ୧୯୯୩ ମସିହା ଆଜିର ଦିନରେ ଗୁଜୁରାଟର ଅହମ୍ମଦାବାଦରେ ଜନ୍ମଗ୍ରହଣ କରିଥିଲେ । ୨୦୧୬ରେ ଅଷ୍ଟ୍ରେଲିଆ ବିପକ୍ଷରେ ହ୍ବାଇଟ ବଲରେ ଡେବ୍ୟୁ କରିଥିଲେ । ସେହି ବର୍ଷ ଟି-ଟ୍ବେଣ୍ଟିରେ ମଧ୍ୟ ପଦାର୍ପଣ କରିଥିଲେ । ଏହାର ଦୁଇବର୍ଷ ପରେ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ ଭାରତୀୟ ସ୍କ୍ବାର୍ଡରେ ସିଲେକ୍ଟ ହୋଇଥିଲେ । ସବୁ ଫର୍ମାରେ ଚମତ୍କାର ପେସର ଭାବେ ନିଜକୁ ସାବ୍ୟସ୍ତ କରିବା ନେଇ ବେଶୀ ସମୟ ନେଇନଥିଲେ ବୁମରା । ୨୦୦ଟି ଅନ୍ତର୍ଜାତୀୟ ମ୍ୟାଚ ଖେଳି ୪୧୯ଟି ୱିକେଟ ନେଇଛନ୍ତି । ୨୦୨୪ ଆଇସିସି ପୁରୁଷ ଟି-ଟ୍ବେଣ୍ଟି ବିଶ୍ବକପ ବିଜୟୀ ଭାରତୀୟ କ୍ରିକେଟର ବୁମରା ବର୍ତ୍ତମାନ ଆଇସିସି ର୍ୟାଙ୍କିରେ ନମ୍ବର ୱାନ ବୋଲର ହୋଇଛନ୍ତି । ୨୦୨୪ ଆଇସିସି ଟି-ଟ୍ବେଣ୍ଟି ବିଶ୍ବକପ ବିଜୟୀ ଭାରତର ପ୍ଲାୟର ଅଫ୍ ଦି ଟୁର୍ଣ୍ଣାମେଣ୍ଟ ହୋଇଥିଲେ ବୁମରା ।
ରବୀନ୍ଦ୍ର ଜାଡେଜା- ୩୬ ବର୍ଷରେ ପାଦ ଥାପିଛନ୍ତି ଭାରତୀୟ କ୍ରିକେଟର ଅଲରାଉଣ୍ଡର ରବୀନ୍ଦ୍ର ଜାଡେଜା । ସାର୍ ଜାଡେଜା ଟ୍ୟାଗ ପାଇଥିବା ରବୀନ୍ଦ୍ର ଭାରତୀୟ ଦଳର ସବୁଠୁ ବଡ ମ୍ୟାଚ ୱିନେକ ପ୍ଲେୟାର । ୭୭ଟି ଟେଷ୍ଟ ମ୍ୟାଚ ଖେଳି ୩୧୯ ୱିକେଟ ହାସଲ କରିଛନ୍ତି । ୩୨୩୫ ରନ କରିଛନ୍ତି । ମୋଟ ୩୪୮ଟି ଅନ୍ତର୍ଜାତୀୟ ମ୍ୟାଚ ଖେଳି ସେଥିରେ ୬୫୦୬ ରନ ହାସଲ କରିଛନ୍ତି ସାର୍ ଜାଡେଜା । ଏହା ସହିତ ମୋଟ ୫୯୩ଟି ୱିକେଟ ନେଇଛନ୍ତି । ୨୦୧୩ ଆଇସିସି ଚମ୍ପିଆନ୍ସ ଟ୍ରଫି ଓ ୨୦୨୪ ଆଇସିସି ପୁରୁଷ ଟି-ଟ୍ବେଣ୍ଟି କପ ବିଜେତା ଭାରତୀୟ ଦଳରେ ସାମିଲ ଥିଲେ ଜାଡେଜା । ଭାରତର ଘାତକ ବାମହାତୀ ସ୍ପିନର ଜାଡେଜା ବ୍ୟାଟିଂ ଓ ଫିଲ୍ଡିଂରେ ଦମଦାର ପ୍ରଦର୍ଶନ କରିଛନ୍ତି ।
ଶ୍ରେୟାସ ଆୟର- ରିଜେକସନରୁ ଏବେ କୋଟିପତି ଖେଳାଳି ହୋଇଥିବା ଶ୍ରେୟାସ ଆୟରଙ୍କ ସଫଳତା କାହାଣୀ ସ୍ବତନ୍ତ୍ର । ୩୦ ବର୍ଷରେ ପାଦ ଥାପିଛନ୍ତି ଏହି ଷ୍ଟାର କ୍ରିକେଟର । ଶ୍ରେୟାରଙ୍କ ଜୀବନ ବହୁତ ସଂଘର୍ଷପୂର୍ଣ୍ଣ । ପିଲାଟି ଦିନୁ କଠିନ ପରିଶ୍ରମ କରି ଜଣେ ସଫଳ କ୍ରିକେଟର ହୋଇଛନ୍ତି ଶ୍ରେୟାସ । ଦିନେ ରିଜେକ୍ଟ ହୋଇଥିଲେ ଏବେ ଆଇପିଏଲର ଦ୍ବିତୀୟ ମହଙ୍ଗା ପ୍ଲେୟାର ହୋଇଛନ୍ତି । ୧୯୯୪ ଆଜିର ଦିନରେ ମୁମ୍ବାଇରେ ଜନ୍ମଗ୍ରହଣ କରିଥିଲେ ଶ୍ରେୟାସ । କଠିନ ପରିଶ୍ରମ ବଳରେ ଟିମ ଇଣ୍ଡିଆରେ ସାମିଲ ହୋଇଥିବା ଶ୍ରେୟାସ ୨୦୧୪ରେ ଅଣ୍ଡର-୧୯ ବିଶ୍ବକପରେ ଖେଳିଥିଲେ । ୨୦୧୭ରେ ଶ୍ରୀଲଙ୍କା ବିପକ୍ଷରେ ଦିନିକିଆରେ ଡେବ୍ୟୁ କରିଥିଲେ । ଆୟର ୧୪ଟି ଟେଷ୍ଟ ମ୍ୟାଚ ଖେଳି ମୋଟ ୮୧୧ ରନ କରିଛନ୍ତି । ସେହିପରି ୬୨ଚି ଦିନିକିଆ ଖେଳି ୨୪୨୧ ରନ କରିଛନ୍ତି । ୫୧ଟି ଟିଟ୍ବେଣ୍ଟି ଖେଳି ୧୧୦୪ ରନ କରିବାରେ ସଫଳ ହୋଇଛନ୍ତି ଷ୍ଟାର କ୍ରିକେଟର ।
ଆରପି ସିଂହ- ରାଇବରେଲୀରେ ଜନ୍ମିତ ଭାରତୀର ପୂର୍ବତନ କ୍ରିକେଟର ଆରପି ସିଂହ ୩୯ ବର୍ଷରେ ପାଦ ଥାପିଛନ୍ତି । ଆରପି ସିଂହଙ୍କ ପୁରା ନାମ ରୁଦ୍ର ପ୍ରତାପ ସିଂହ । ବାଂଲାଦେଶ ବିପକ୍ଷରେ ଅଣ୍ଡର-୧୯ ବିଶ୍ବକପରେ ୮ଟି ୱିକେଟ ନେଇ ଶିରୋନାମକୁ ଆସିଥିଲେ ଆରପି ସିଂହ । ଏହି ଷ୍ଟାର ଖେଳାଳି ୧୪ଟି ଟେଷ୍ଟ ମ୍ୟାଚ ଖେଳି ୪୦ ୱିକେଟ ନେଇଛନ୍ତି । ସେହିପରି ୫୮ଟି ଦିନିକିଆରେ ୬୯ଟି ୱିକେଟ ଅକ୍ତିଆର କରିଛନ୍ତି । ୧୦ଟି ଟି-ଟ୍ବେଣ୍ଟି ଖେଳି ୧୫ଟି ୱିକେଟର ନେବାର ସଫଳ ହୋଇଥିଲେ ଆରପି ସିଂହ ।
