ନୂଆଦିଲ୍ଲୀ,୧୪।୯: ଭାରତ ଓ ପାକିସ୍ତାନ ଭିତରେ ଏସିଆ କପ୍ ୨୦୨୫ର ମହାମୁକାବିଲା ଯେତେ ପାଖେଇ ଆସୁଛି, ସୋସିଆଲ ମିଡିଆରେ ଏହି ମ୍ୟାଚ୍କୁ ବୟକଟ କରାଯିବାର ଦାବି ହେଉଛି। ରବିବାର ମଧ୍ୟ ‘ବୟକଟ୍ ଇଣ୍ଡିଆ ଭର୍ସେସ୍ ପାକିସ୍ତାନ’ ଟ୍ରେଣ୍ଡ କରୁଛି। ତେବେ ଏହି ରିପୋର୍ଟରେ ଦାବି କରାଯାଇଛି ଯେ, ଯୁକ୍ତିତର୍କ କେବଳ ଜନତାଙ୍କ ପର୍ଯ୍ୟନ୍ତ ସୀମିତ ନାହିଁ। ବଂର ଏହାର ପ୍ରଭାବ ଭାରତୀୟ ଟିମ୍ର ଖେଳାଳିଙ୍କ ପର୍ଯ୍ୟନ୍ତ ପହଁଞ୍ଚି ଯାଇଛି। ରିପୋର୍ଟ ଅନୁସାରେ, ସୂର୍ଯ୍ୟକୁମାର ଯାଦବ, ଶୁଭମନ ଗିଲ୍ ଓ ଟିମ୍ ସହ ଅନ୍ୟ ଯୁବ ଖେଳାଳି ଏହି ଚର୍ଚ୍ଚାରୁ ମାନସିକ ରୂପରେ ପ୍ରଭାବିତ ହୋଇଛନ୍ତି। ସେମାନେ ଭିତରୁ ଖୁବ୍ ଚିନ୍ତିତ ଅଛନ୍ତି।
ଟାଇମ୍ସ ଅଫ୍ ଇଣ୍ଡିଆ ରିପୋର୍ଟ ଅନୁଯାୟୀ, ଏହି ଉତ୍ତେଜନାପୂର୍ଣ୍ଣ ପରିବେଶକୁ ଦୃଷ୍ଟିରେ ରଖି, ଖେଳାଳିମାନେ ଟିମ୍ର ହେଡ୍ କୋଚ୍ ଗୌତମ ଗମ୍ଭୀର ଏବଂ ଅନ୍ୟାନ୍ୟ ସପୋର୍ଟ ଷ୍ଟାଫ୍ଙ୍କ ସହ କଥା ହୋଇଥିଲେ ଏବଂ ଏହି ପରିସ୍ଥିତିର ମୁକାବିଲା କରିବା ପାଇଁ ମାର୍ଗଦର୍ଶନ ଲୋଡିଥିଲେ। ଯଦିଓ ଏହି ଖେଳାଳିମାନେ ପୂର୍ବରୁ ପାକିସ୍ତାନ ବିପକ୍ଷରେ ମ୍ୟାଚ୍ ଖେଳିଛନ୍ତି, କିନ୍ତୁ ଏଥର ପରିସ୍ଥିତି ଭିନ୍ନ। ପଡ଼ିଆ ବାହାରର ପରିବେଶ ମଧ୍ୟ ଖେଳାଳିମାନଙ୍କ ପାଇଁ ଅସ୍ବାଭାବିକ ଏବଂ ଚ୍ୟାଲେଞ୍ଜିଂ ହୋଇଯାଇଛି।
ଏହି ହାଇ-ଭୋଲଟେଜ୍ ମ୍ୟାଚ୍ ପୂର୍ବରୁ ଦଳର କୋଚ୍ କିମ୍ବା ଅଧିନାୟକ ସାମ୍ବାଦିକ ସମ୍ମିଳନୀରେ ଆସନ୍ତି, କିନ୍ତୁ ଏଥର ତାହା ହୋଇନାହିଁ। ଟିମ୍ ମ୍ୟାନେଜମେଣ୍ଟ ଆସିଷ୍ଟାଣ୍ଟ କୋଚ୍ ରେୟାନ ଟେନ୍ ଡେଶକାଟେଙ୍କୁ ମିଡିଆ ଆଗକୁ ପଠାଇଥିଲା। ଏହା ସ୍ପଷ୍ଟ ଭାବରେ ଦର୍ଶାଉଛି ଯେ ଡ୍ରେସିଂ ରୁମର ପରିବେଶ ସ୍ୱାଭାବିକ ନୁହେଁ। ଯେତେବେଳେ ଦେଶକେଟ୍ଙ୍କୁ ସାମ୍ବାଦିକ ସମ୍ମିଳନୀରେ ପଚରାଗଲା ଖେଳାଳିମାନେ ସେମାନଙ୍କର ଭାବନାକୁ ପଡ଼ିଆକୁ ନେଇଯିବେ କି ? ସେ ଉତ୍ତର ଦେଇଥିଲେ, 'ହଁ, ମୁଁ ଭାବୁଛି ସେମାନେ କରିବେ।' ସେ ଆହୁରି କହିଥିଲେ, 'ଏହା ଏକ ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗ। ମୋର କୌଣସି ସନ୍ଦେହ ନାହିଁ ଯେ ଆମର ଖେଳାଳିମାନେ ଭାରତର ସାଧାରଣ ଲୋକଙ୍କ ଭାବନା ଏବଂ ଭାବନାକୁ ସମ୍ପୂର୍ଣ୍ଣ ଭାବରେ ବୁଝନ୍ତି ଏବଂ ଅନୁଭବ କରନ୍ତି। ଏସିଆ କପ୍ ଦୀର୍ଘ ସମୟ ଧରି ଅନିଶ୍ଚିତତା ସ୍ଥିତିରେ ଥିଲା। ଗୋଟିଏ ସମୟରେ ଆମେ ଭାବୁଥିଲୁ ଯେ ଏହି ଟୁର୍ଣ୍ଣାମେଣ୍ଟ ହେବ ନାହିଁ। ଆପଣ ଜାଣନ୍ତି, ସରକାରଙ୍କ ଯେଉଁ ନୀତି, ତାହା ଆମ ପାଇଁ ସ୍ପଷ୍ଟ।' ହେଡ କୋଚ୍ ଗୌତମ ଗମ୍ଭୀର ଖେଳାଳିଙ୍କୁ କ’ଣ ବାର୍ତ୍ତା ଦେଇଛନ୍ତି ତାହା ମଧ୍ୟ କହିଥିଲେ ଡେଶକାଟେ। ସେ କହିଥିଲେ ଗୌତମ ଗମ୍ଭୀରଙ୍କ ବାର୍ତ୍ତା ସମ୍ପୂର୍ଣ୍ଣ ବୃତ୍ତିଗତ ।ସେ ଖେଳାଳିମାନଙ୍କୁ କହିଛନ୍ତି, ଯାହା ଆମ ନିୟନ୍ତ୍ରଣରେ ନାହିଁ ସେଗୁଡ଼ିକ ପ୍ରତି ଧ୍ୟାନ ଦିଅ ନାହିଁ। ନିଜର ଭାବନାକୁ ଅଲଗା ରଖି କେବଳଖେଳଉପରେ ସମ୍ପୂର୍ଣ୍ଣ ଧ୍ୟାନ ଦେବା ଉଚିତ।
