ନୂଆଦିଲ୍ଲୀ,୨୪।୫: ହମାସ ଏବଂ ଇସ୍ରାଏଲ ଯୁଦ୍ଧ ଭିତରେ ଗାଜାର ସ୍ଥିତି ସଙ୍ଗୀନ । ଭୋକରେ ଅଧିକାଂଶ ଲୋକଙ୍କର ଜୀବନ ଯାଉଛି । ସ୍ଥିତି ଏତେ ଖରାପ ଯେ, ରିଲିଫ୍ ସାମଗ୍ରୀ ନେଇ ଯାଉଥିବା ଟ୍ରକ ଯିବା ଆସିବା କଷ୍ଟକର ହୋଇପଡିଛି। ଲୋକେମାନେ ରାସ୍ତାରୁ ହିଁ ଟ୍ରକ ଲୁଟି ନେଉଛନ୍ତି। ଇସ୍ରାଏଲର ଦୀର୍ଘ ସମୟ ଧରି କଟକଣା ପରେ ରିଲିଫ୍ ସାମଗ୍ରୀ ଥିବା ଟ୍ରକ ପଠାଯାଇଛି। ତେବେ ଭୋକ ଓ ଅଭାବରେ ଥିବା ଲୋକ ଏହାକୁ ଲୁଟି ନେଇଛନ୍ତି।
ଯୁଦ୍ଧ ପରେ ଗାଜା ସ୍ଥିତି ଶୋଚନୀୟ। ଭୋକ ଉପାସରେ ହଜାର ହଜାର ଲୋକେ। ଗୋଟିଏ ପଟେ ଇସ୍ରାଏଲର ଘନ ଘନ ଆକ୍ରମଣ ତ ଅନ୍ୟପକ୍ଷେ ଖାଦ୍ୟ ଅଭାବ। ଖାଇବାକୁ ନପାଇ ଅନେକ ଲୋକଙ୍କ ଜୀବନ ଗଲାଣି। ଜାତିସଂଘ ମୁଖ୍ୟ କହିଛନ୍ତି ରିଲିଫ୍ ସାମଗ୍ରୀ ଉପରେ ଇସ୍ରାଏଲକୁ ରୋକ ଲଗାଇବା ଉଚିତ ନୁହେଁ। ଏହା ଅମାନବୀୟ। ଓ୍ବାର୍ଲ୍ଡ ଫୁଡ୍ ପୋଗ୍ରାମ ପକ୍ଷରୁ କୁହାଯାଇଛି, ୨ ମାର୍ଚ୍ଚ ପରେ ଗାଜାକୁ ରିଲିଫ୍ ସାମଗ୍ରୀ ନେବାକୁ ଗାଜା ଅନୁମତି ଦେଇଥିଲା। ୪୦୦ ଟ୍ରକ୍ ମଧ୍ୟରୁ ୧୧୫ଟି ଗାଜାକୁ ଯିବାର ଅନୁମତି ମିଳିଥିଲା। ତେବେ ତା ମଧ୍ୟରୁ ୧୫ଟି ଟ୍ରକ୍କୁ ଲୋକେ ଲୁଟି ନେଇଛନ୍ତି।
ସେପଟେ ଗାଜାରେ ଇସ୍ରାଏଲ ନରସଂହାର ଆହୁରି ବଢାଇ ଦେଇଛି। ଜୋରଦାର ଆକ୍ରମଣ କରୁଛି। ଗାଜାର ସିଭିଲ୍ ଡିଫେନ୍ସ ଏଜେନ୍ସି ଅଧିକାରୀ ମହମ୍ମଦ ଅଲଗ ମୁଗାୟିର କହିଛନ୍ତି, ଶୁକ୍ରବାର ଗାଜା ଉପରେ ହୋଇଛି ଜୋରଦାର ହମଲା। ଇସ୍ରାଏଲର ଏୟାରଷ୍ଟ୍ରାଇକ୍ରେ ଅତି କମ୍ରେ ୭୧ ଜଣଙ୍କର ମୃତ୍ୟୁ ହୋଇଛି। ସେଭଳି ଅନେକ ଆହତ ହୋଇଛନ୍ତି। ଏହାଛଡା ବହୁଲୋକ ମଧ୍ୟ ନିଖୋଜ ଅଛନ୍ତି।
