ଚନ୍ଦନେଶ୍ଵର,୧୯/୦୬: ପାନୀୟ ଜଳ ପାଇଁ ହନ୍ତସନ୍ତ ହେଉଛନ୍ତି ଶତାଧିକ ଲୋକେ । ପୋଖରୀ ପାଣି ହି ଏକ ମାତ୍ର ସାହା ଭରସା । ଝାଡ଼ାବାନ୍ତିରେ ଆକ୍ରାନ୍ତ ନେଇ ଚିନ୍ତାରେ ପଡ଼ିଛନ୍ତି ଶତାଧିକ ପରିବାର । ବାଲେଶ୍ୱର ଜିଲ୍ଲା ଭୋଗରାଇ ହୁଗୁଳି ପଞ୍ଚାୟତ ଗାଜିପୁର ଗାଁରେ ପିଇବା ପାଣି ନେଇ ଏବେ ହନ୍ତସନ୍ତ ଶତାଧିକ ପରିବାର । ଗୋଟିଏ ପାଣି ଟ୍ୟାପ୍ ଉପରେ ନିର୍ଭର କରି ସମସ୍ତ ପରିବାର ଚଳୁଥିବା ବେଳେ ପ୍ରାୟ ୩ ମାସରୁ ଉର୍ଦ୍ଧ୍ୱ ହେବ ଉକ୍ତ ଟ୍ୟାପ୍ରେ ଆସୁନାହିଁ ପାନୀୟ ଜଳ । ପାଖରେ ଥିବା ଏକ ପୋଖରୀରୁ ପାଣି ନେଇ ଚଳୁଛନ୍ତି ଲୋକେ । ପିଲାମାନେ ବିଭିନ୍ନ ରୋଗରେ ଆକ୍ରାନ୍ତ ହେଉଥିବା ବେଳେ ଏବେ ରାଜ୍ୟରେ ଝାଡ଼ାବାନ୍ତି ନେଇ ସବୁଆଡେ ସମସ୍ୟା ଉପୁଜୁଥିବାରୁ ଚିନ୍ତାରେ ପଡ଼ିଛନ୍ତି ଗାଜିପୁର ବାସିନ୍ଦା ।
ଏନେଇ ବାରମ୍ବାର ସ୍ଥାନୀୟ ଜନପ୍ରତିନିଧି ଓ ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ ଏ ପର୍ଯ୍ୟନ୍ତ ସୁଧାର ଆସିନାହିଁ । ଗୁରୁବାର ଲୋକମାନେ ପାଣି ଟ୍ୟାପ୍ ସମୁଖରେ ପ୍ରତିବାଦ କରି କହିଛନ୍ତି ଅତି ଶୀଘ୍ର ଏହାର ସୁଧାର ନଆସିଲେ ଆନ୍ଦୋଳନ କରାଯିବ । ଅଞ୍ଚଳରେ କେହି ଝାଡ଼ାବାନ୍ତିରେ ଆକ୍ରାନ୍ତ ହେଲେ ସମ୍ପୃକ୍ତ ବିଭାଗ ଦାୟୀ ରହିବେ ବୋଲି କହିଛନ୍ତି ।
