ଭଞ୍ଜନଗର,୦୪/୦୮: ମୋବାଇଲ୍ରୁ ମୋବାଇଲକୁ ଭାଇରାଲ୍ ହେଉଛି ଭିଡିଓ । ଆଉ ତାକୁ ନେଇ ଭଞ୍ଜନଗର ସହରରେ ମଧ୍ୟ ଚର୍ଚ୍ଚା ଜୋର୍ ଧରୁଛି । ଏଥିରେ ଦେଖିବାକୁ ମିଳୁଛି ଯେ ଜଣେ ରୋଡ୍ ରୋମିଓଙ୍କୁ ଜଣେ ଟ୍ୟୁସନ୍ ଛାତ୍ରୀ ପେଟେଣ୍ଟ ମେଡିସିନ୍ ତରିକାରେ ଉତ୍ତମ ମଧ୍ୟମ ଦେଉଛନ୍ତି । ସହରର ୟୁବି ହାଇସ୍କୁଲ ନିକଟ ରାସ୍ତାରେ ମହିଳା କଲେଜ ଆଗରେ ଯୁବକଙ୍କୁ ଅତର୍କିତ ଆକ୍ରମଣ କରୁଛନ୍ତି ଛାତ୍ରୀ । ଯୁବକ ଜଣକ ଖସି ପଳାଇବାକୁ ଉଦ୍ୟମ କରୁଥିବାବେଳେ ଛାତ୍ରୀ ଜଣକ ତାର ସାର୍ଟକୁ ଧରି ମୁହଁରେ ଗୁଡ଼ାଇ ବେଶ୍ କିଛି ସମୟ ଉତ୍ତମ ମଧ୍ୟମ ଦେଉଛନ୍ତି । ଚାପୁଡ଼ା ବିଧା ସହ ଗୋଇଠା ମାଡ଼ରେ ଲହୁଲୁହାଣ ହୋଇଥିଲେ ମଧ୍ୟ ଯୁବକ ଜଣକ ଛାତ୍ରୀଙ୍କ ହାବୁଡ଼ରୁ ଖସି ପାରୁନାହାନ୍ତି । ସେହି ରାସ୍ତାରେ ଚଳପ୍ରଚଳ କରୁଥିବା ଲୋକ ଏଥିରେ ହସ୍ତକ୍ଷେପ କରିଥିଲେ ମଧ୍ୟ ଛାତ୍ରୀଙ୍କ ଶକ୍ତ ପଞ୍ଛାରୁ ରୋଡ୍ ରୋମିଓଙ୍କୁ ମୁକୁଳାଇ ପାରୁନାହାନ୍ତି । ଶେଷରେ ନିକଟସ୍ଥ ଏକ ଘରୋଇ ଅନୁଷ୍ଠାନର କିଛି କର୍ମଚାରୀ ଯୁବକଙ୍କୁ ଛାତ୍ରୀଙ୍କ କବଳରୁ ଉଦ୍ଧାର କରିଛନ୍ତି । ଘଟଣାଟି ଦିନେ ଦୁଇ ଦିନ ତଳର ବୋଲି ଆଲୋଚନା ହେଉଛି । ଏହି ଭିଡିଓ ଏବେ ଭଞ୍ଜନଗର ସହରରେ ଭାଇରାଲ୍ ହେବାରେ ଲାଗିଛି । ମହିଳା କଲେଜ ଆଗରେ ଏକ କମ୍ପ୍ୟୁଟର୍ ଏକାଡେମୀ ଅଛି । ତାହା ସାମନାରେ ଘଟିଥିବା ଏହି ଘଟଣାର ଭିଡିଓ ଉତ୍ତୋଳନ କରି କେହି ଜଣେ ଭାଇରାଲ୍ କରିଛି ।
ମହିଳା କଲେଜ ରାସ୍ତାରେ ପ୍ରତ୍ୟହ ଶହ ଶହ ଛାତ୍ରୀ କଲେଜକୁ ଯିବା ଆସିବା କରୁଥିବା ବେଳେ ସେହି ରାସ୍ତାରେ ଏକ କମ୍ପ୍ୟୁଟର୍ ଏକାଡେମୀକୁ ମଧ୍ୟ ବହୁ ସଂଖ୍ୟାରେ ଛାତ୍ରଛାତ୍ରୀ ଆସୁଛନ୍ତି । ତେବେ ଏହି ରାସ୍ତାରେ କଲେଜ ସମୟରେ ଅନେକ ଯୁବକ ଅଯଥାରେ ଭିଡ଼ ଜମାଇବା ସହ ଛାତ୍ରୀଙ୍କୁ କମେଣ୍ଟ୍ ମାରୁଥିବା ଅଭିଯୋଗ ଦୀର୍ଘ ଦିନରୁ ହୋଇ ଆସୁଛି । ସ୍ଥାନୀୟ ପୁଲିସ ଏହି ରାସ୍ତାରେ ପାଟ୍ରୋଲିଂ କଡ଼ାକଡ଼ି କରୁଥିଲେ ମଧ୍ୟ ରୋଡ୍ ରୋମିଓଙ୍କୁ କିନ୍ତୁ ସାବାଡ଼ କରିବାରେ ପୁରା ସଫଳ ହୋଇପାରିନାହିଁ । କିଛି ରୋଡ୍ ରୋମିଓଙ୍କ ଉପଦ୍ରବରେ ଅନେକ ଛାତ୍ରୀ ଅତିଷ୍ଠ ହେଉଛନ୍ତି । ଅନେକ ଲୋକଲଜ୍ଜାରେ କିଛି କହିବାକୁ ସାହାସ କରୁନାହାନ୍ତି । ତଥାପି ଜଣେ ଛାତ୍ରୀ ନିଜର ସାହାସ ଦେଖାଇ ରୋଡ୍ ରୋମିଓଙ୍କୁ ଧରି ସାବାଡ଼ କରିବା ଘଟଣାକୁ ବିଭିନ୍ନ ମହଲରୁ ସ୍ୱାଗତ କରାଯାଇଛି । ଭଞ୍ଜନଗର ଭଳି ଛୋଟିଆ ସହରରେ ରୋଡ୍ ରୋମିଓଙ୍କୁ ସାବାଡ଼ କରିବା ନିହାତି ଜରୁରି ହୋଇପଡ଼ିଛି । ନଚେତ୍ ଆଗକୁ କୌଣସି ଅପ୍ରୀତିକର ପରିସ୍ଥିତି ଯେ ନଘଟିବ ତାହା କିଏ କହିପାରିବ ବୋଲି ବରିଷ୍ଠ ନାଗରିକ ମଞ୍ଚ ସଭାପତି ସୋମନାଥ ନାୟକ ପ୍ରତିକ୍ରିୟାରେ କହିଛନ୍ତି ।
