ବାଂଶପାଳ, ୧୭/୧୦ : କେନ୍ଦୁଝର ଜିଲ୍ଲା ବାଂଶପାଳ ବ୍ଲକର ଜଳଡିହା ଗାଁରେ ହେବ ସୁନାଖଣି। ସରକାର ସମୁଦାୟ ୨୫ଟି ସ୍ଥାନରୁ ୧୧ଟି ସ୍ଥାନରେ ସୁନାର ନମୂନା ସଂଗ୍ରହ କରିଛନ୍ତି। ଜଳଡିହା ସୁନାଖଣି ଜଙ୍ଗଲରେ ୮୦ମିଟର ମାଟିତଳେ ଉନ୍ନତ ମାନର ସୁନା ଗଚ୍ଛିତ ଥିବା ସୂଚନା ମିଳିବା ପରେ ଏଠାରେ ସୁନାଖଣି ହେବା ନେଇ ଆଶା ପ୍ରକାଶ ହୋଇଛି। ଯାହାକୁ ନେଇ ସ୍ଥାନୀୟ ବାସିନ୍ଦା ଖୁସିବ୍ୟକ୍ତ କରିଛନ୍ତି।
ବାଂଶପାଳ ବ୍ଲକ ତରମାକାନ୍ତ ପଞ୍ଚାୟତର ଜଳଡିହା ଗାଁ ନିକଟ ଜଙ୍ଗଲରେ ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ ତରଫରୁ ମାଟି ତଳୁ ସୁନାର ନମୁନା ସଂଗ୍ରହ କରାଯାଉଛି। ବର୍ତ୍ତମାନ ଏଠାରେ ୨ଟି ସ୍ଥାନରେ ସୁନାର ନମୁନା ସଂଗ୍ରହ କାର୍ଯ୍ୟ ଜାରି ରହିଥିବା ବେଳେ, ଆସନ୍ତା ମାର୍ଚ୍ଚ ମାସ ସୁଦ୍ଧା ଜଙ୍ଗଲର ୨୫ଟି ସ୍ଥାନ ଖୋଳି ସୁନାର ନମୁନା ସଂଗ୍ରହ କରାଯିବା ବୋଲି ସୂଚନା ମିଳିଛି। ଏଠାରୁ ସଂଗୃହିତ ସୁନାର ନମୁନା ଭଲ ବୋଲି ଜଣାପଡିଛି। ଯାହାକୁ ନେଇ ଜଳଡିହା ଗାଁରେ ସୁନାଖଣି ହେବା ନେଇ ଆଶା ପ୍ରକାଶ ପାଇଛି।
ଆଦିବାସୀ ବହୁଳ ବାଂଶପାଳ ବ୍ଲକର ଲୋକେ ରୋଜଗାର ପାଇଁ ମୁଖ୍ୟତଃ ବଣଜଙ୍ଗଲ ଉପରେ ନିର୍ଭର କରିଥାନ୍ତି। ବହୁ ବର୍ଷ ପୂର୍ବରୁ ଲୋକେ ଏହି ଜଙ୍ଗଲର ମାଟିତଳୁ ସୁନା ସଂଗ୍ରହ କରୁଥିବା ଯୋଗୁଁ ଏହି ଜଙ୍ଗଲର ନାଁ ସୁନାଖଣି ଜଙ୍ଗଲ ରହିଛି। ୮୦ଦଶକରୁ ସରକାରଙ୍କ ଦ୍ବାରା ଏହି ଜଙ୍ଗଲରେ ସୁନାର ନମୁନା ସଂଗ୍ରହ କାର୍ଯ୍ୟ ଆରମ୍ଭ ହୋଇ କିଛି ବର୍ଷ ଧରି ବନ୍ଦ ରହିଥିଲା। ହେଲେ, ଗତ ୨ବର୍ଷ ଧରି ଏଠାରେ ଜିଓଲୋଜିକାଲ୍ ସର୍ଭେ ଅଫ୍ ଇଣ୍ଡିଆ ତରଫରୁ ସୁନାର ନମୁନା ସଂଗ୍ରହ କାର୍ଯ୍ୟ ତ୍ବରାନ୍ବିତ କରାଯାଇଛି। ଏଠାକାର ସୁନାର ମାନ ଉନ୍ନତ ଧରଣର ଜଣାପଡିବା ପରେ, ଲୋକଙ୍କ ମନରେ ଏଠାରେ ସୁନାଖଣି ହେବା ନେଇ ଆଶା ସଞ୍ଚାର ହୋଇଛି। ତେବେ ୮୦ ମିଟର ଡ୍ରିଲିଂ କରିବା ପରେ ଏଠାରୁ ସଂଗୃହିତ ହେଉଥିବା କୋର୍ ଗୁଡିକୁ କଲିକତା ସ୍ଥିତ ଲାବୋରେଟରୀକୁ ପରୀକ୍ଷା ପାଇଁ ପଠାଯାଉଛି। ପରୀକ୍ଷା ପରେ କେତେ ପରିମାଣର ସୁନା ଅଛି ଜଣା ପଡିବ ବୋଲି ଜିଏସଆଇ ପକ୍ଷରୁ ସୂଚନା ମିଳିଛି। ତେବେ ଜଳଡିହା ଗାଁରେ ସୁନାଖଣି ହେଲେ, କେନ୍ଦୁଝର ଜିଲ୍ଲା ତଥା ରାଜ୍ୟର ବିକାଶରେ ନୂଆ ଅଧ୍ୟାୟ ଯୋଡି ହେବ ବୋଲି ମତ ପ୍ରକାଶ ପାଇଛି।
