ନୂଆଦିଲ୍ଲୀ ୧୩/୧୨: ଗୁଗଲ୍ର ନୂଆ ଉତ୍ପାଦ ‘ୱିଲୋ’କୁ ନେଇ ସବୁଠି ଚର୍ଚ୍ଚା । ଏଲନ ମସ୍କ ମଧ୍ୟ ଏହାକୁ ନେଇ ଗୁଗଲ୍ ସିଇଓ ସୁନ୍ଦର ପିଚାଇଙ୍କ ସହ ଆଲୋଚନା କରୁଛନ୍ତି । ଏହି ଉତ୍ପାଦ ହେଉଛି ଗୁଗଲ୍ ୱିଲୋ ଚିପ୍ । ଚଳିତ ସପ୍ତାହ କମ୍ପାନି ଏହାକୁ ଆଣିଛି । ଗୁଗଲ୍ ୱିଲୋ କମ୍ପାନିର କ୍ୱାଣ୍ଟମ୍ ଚିପ୍, ଯାହା ସବୁଠୁ ଜଟିଳ କାମକୁ ମିନିଟ୍ରେ କରିପାରେ । ଏହି ଚିପ୍ ସାହାଯ୍ୟରେ ପାରାଲାଲ୍ ୟୁନିଭର୍ସ ଓ ମଲ୍ଟିଭର୍ସ ଭଳି ଅବଧାରଣା ଉପରେ ଚର୍ଚ୍ଚା ଆରମ୍ଭ ହୋଇଛି । ଭବିଷ୍ୟତରେ ଏହି ଚିପ୍ ବହୁତ କିଛି ବଦଳାଇ ପାରିବ ବୋଲି ବିଶ୍ୱାସ କରାଯାଉଛି । ୱିଲୋକୁ ଆଗାମି ପିଢ଼ିର ଚିପ୍ ମଧ୍ୟ କୁହାଯାଉଛି । ଏହାକୁ ସେଣ୍ଟ୍ ବାରବାରା ସ୍ଥିତ କମ୍ପାନିର କ୍ୱାଣ୍ଟମ୍ ଲ୍ୟାବ୍ରେ ପ୍ରସ୍ତୁତ କରାଯାଇଛି । ସବୁଠୁ ଜଟିଳ ଗାଣିତିକ ସମସ୍ୟାକୁ ଏହା ମାତ୍ର କିଛି ମିନିଟ୍ ମଧ୍ୟରେ ସମାଧାନ କରିପାରେ । ଯେଉଁ ସମସ୍ୟାର ସମାଧାନ ଲାଗି ବର୍ତ୍ତମାନର ସୁପର କମ୍ପ୍ୟୁଟରକୁ ବ୍ରହ୍ମାଣ୍ଡର ବୟସଠୁ ମଧ୍ୟ ଅଧିକ ସମୟ ଲାଗିବ, ତାକୁ ଏହି ଚିପ୍ ମାତ୍ର ୫ ମିନିଟ୍ରେ ସମାଧାନ କରିବ ।
ଚିପ୍ ଉନ୍ମୋଚନ ସହିତ ଗୁଗଲ୍ ସିଇଓ ସୁନ୍ଦର ପିଚାଇ ଲେଖିଛନ୍ତି ‘ଏହା ୱିଲୋ, ଆମର ନୂଆ କ୍ୱାଣ୍ଟମ୍ କମ୍ପ୍ୟୁଟିଙ୍ଗ୍ ଚିପ୍ । ଏଥିରେ ଆମେ ଅଧିକ କ୍ୟୁବିଟ୍ସ ଉପଯୋଗ କରିଛୁ । ଏହା ଦ୍ୱାରା ତ୍ରୁଟି ସଂଖ୍ୟାକୁ ହ୍ରାସ କରାଯାଇ ପାରିବ । ଏହା କ୍ୱାଣ୍ଟମ୍ କ୍ଷେତ୍ରର ସମସ୍ୟାକୁ ଦୂର କରିପାରିବ । କ୍ୱାଣ୍ଟମ୍ କମ୍ପ୍ୟୁଟିଙ୍ଗ୍ରେ ଏହାର ଉପଯୋଗ ହେବ । ଗୁଗଲ୍ ଅନୁସାରେ, ବର୍ତ୍ତମାନର ସବୁଠୁ ଶକ୍ତିଶାଳୀ କମ୍ପ୍ୟୁଟର ଯେଉଁ କାମକୁ ୧୦ ସେପ୍ଟିଲିଅନ୍ (୧୦ରେ ୨୫ଟି ଶୂନ) ବର୍ଷରେ କରିବେ, ୱିଲୋ ତାକୁ କେବଳ ୫ ମିନିଟ୍ରେ କରିଦେବ । ୧୦ ସେପ୍ଟିଲିଅନ୍ ସେହି ସଂଖ୍ୟା, ଯାହାଠୁ ବ୍ରହ୍ମାଣ୍ଡର ବୟସ ଛୋଟ । କ୍ୱାଣ୍ଟମ୍ କମ୍ପ୍ୟୁଟିଙ୍ଗ୍ କ୍ୱାଣ୍ଟମ୍ ମେକାନିକ୍ସର ସିଦ୍ଧାନ୍ତ ଉପରେ କାମ କରେ, ଯାହା ପାରମ୍ପରିକ କମ୍ପ୍ୟୁଟର୍ର କ୍ଷମତାଠୁ ଯେକୌଣସି ସମସ୍ୟାର ସମାଧାନ କରିପାରେ । ସରଳ ଭାଷାରେ କହିଲେ, ପାରମ୍ପରିକ କମ୍ପ୍ୟୁଟର ବିଟ୍ସରେ କାମ କରେ । ଏଥିରେ ସୂଚନାକୁ ଶୂନ ବା ୧ ରୂପେ ପ୍ରୋସେସ୍ କରାଯାଏ ।
ଅନ୍ୟପକ୍ଷେ, କ୍ୱାଣ୍ଟମ୍ କମ୍ପ୍ୟୁଟିଙ୍ଗ୍ରେ କ୍ୟୁବିଟ୍ସର ଉପଯୋଗ ହୁଏ । ଏଥିରେ ଶୂନ ବା ୧ କିମ୍ବା ଉଭୟ ଏକସଙ୍ଗେ ରହିପାରନ୍ତି । ଏହି ପ୍ରକ୍ରିୟାକୁ ସୁପର୍ପୋଜିସନ୍ କୁହାଯାଏ । ଏହି କ୍ୟୁବିଟ୍ସ ଯୋଗୁ କ୍ୱାଣ୍ଟମ୍ କମ୍ପ୍ୟୁଟର ଅନେକ ଗଣନା ଏକସଙ୍ଗେ କରିପାରନ୍ତି । ଫଳରେ ଜଟିଳ ସମସ୍ୟାଗୁଡ଼ିକୁ ସହଜରେ ସମାଧାନ କରାଯାଇ ପାରିବ । ୱିଲୋର ସବୁଠୁ ବଡ଼ ଆହ୍ୱାନ ହେଉଛି ବାସ୍ତବ ଜୀବନରେ ଏହାର ଲାଭକୁ ଦର୍ଶାଇବା । ଗୁଗଲ୍ ଅନୁସାରେ, ଏହି ଚିପ୍ ଏଆଇ, ଔଷଧ, ଏନର୍ଜି ସିଷ୍ଟମ୍ ଓ ଫ୍ୟୁଜନ୍ ଏନର୍ଜି ରିସର୍ଚ୍ଚରେ ଖୁବ୍ ସହାୟକ ହେବ । ଖାସ୍କରି ଏଆଇ କ୍ଷେତ୍ରରେ ଖୁବ୍ ସହାୟକ ହେବ । ଏକ ଏଆଇ ମଡେଲକୁ ତାଲିମ ଦେବା ଲାଗି ତାକୁ ବହୁତ ତଥ୍ୟ ଦେବାକୁ ପଡ଼େ । ଏହି ମାମଲାରେ କ୍ୱାଣ୍ଟମ୍ କମ୍ପ୍ୟୁଟର ସହାୟକ ହୋଇପାରିବେ । କାରଣ ଏଗୁଡ଼ିକ ତଥ୍ୟକୁ ଅଧିକ ଦ୍ରୁତ ବେଗରେ କମ୍ପ୍ୟୁଟ୍ କରିପାରିବେ ।
କ୍ୱାଣ୍ଟମ୍ କମ୍ପ୍ୟୁଟିଙ୍ଗ୍ରେ ତ୍ରୁଟି ଏକ ବଡ଼ ଚ୍ୟାଲେଞ୍ଜ୍ । ଏଥିରେ କ୍ୟୁବିଟ୍ସର ପ୍ରଭାବ ପରସ୍ପର ଉପରେ ପଡ଼େ । ଏହି ସ୍ଥିତିରେ କୌଣସି କ୍ୟୁବିଟ୍ସରେ ସମସ୍ୟା ଆସିଲେ, ପୂରା ଗଣନାରେ ଗଡ଼ବଡ଼ ହୋଇଯିବ । ଅନ୍ୟପକ୍ଷେ, ଯେତେ ଅଧିକ କ୍ୟୁବିଟ୍ସ ଉପଯୋଗ ହେବ, ସେତେ ଭୁଲ ହେବାର ଆଶଙ୍କା ବଢ଼ିବ । ଗୁଗଲ୍ ଏହି ଚିପ୍ରେ ୧୦୫ କ୍ୟୁବିଟ୍ସ ଉପଯୋଗ କରିଛି । କ୍ୟୁବିଟ୍ସ ସହିତ ୱିଲୋ ଦୁଇଟି ବେଞ୍ଚ୍ମାର୍କକ୍ୱାଣ୍ଟମ୍ ଏରର୍ କରେକ୍ସନ୍ ଓ ର୍ୟାଣ୍ଡମ୍ ସର୍କିଟ୍ ସାମ୍ପଲିଙ୍ଗ୍ରେ ଶ୍ରେଷ୍ଠ ଇନ୍-କ୍ଲାସ୍ ପ୍ରଦର୍ଶନ କରୁଛି ।
