ନୂଆଦିଲ୍ଲୀ,୨୩/୦୮: ୨୦ ବର୍ଷରୁ ଅଧିକ ପୁରୁଣା ଗାଡ଼ିଗୁଡ଼ିକର ପଞ୍ଜୀକରଣ ଦେୟ ବଢ଼ାଇଛନ୍ତି କେନ୍ଦ୍ର ସରକାର । ବର୍ତ୍ତମାନ ରହିଥିବା ଫି’ ତୁଳନାରେ ଏହା ପ୍ରାୟ ଦୁଇ ଗୁଣା ହୋଇଯାଇଛି । ଏଭଳି ଗାଡ଼ିଗୁଡ଼ିକର ବ୍ୟବହାରକୁ କମାଇ ପ୍ରଦୁଷଣ ନିୟନ୍ତ୍ରଣ କରିବା ଏ ନିଷ୍ପତ୍ତିର ଉଦ୍ଦେଶ୍ୟ । ଦେଶରେ ପ୍ରଦୁଷଣରେ ଏହି ଗାଡ଼ିଗୁଡ଼ିକର ଯୋଗଦାନ ରହିଛି ୪୦% ।
ସଡ଼କ ମନ୍ତ୍ରାଳୟ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, ୨୦ ବର୍ଷରୁ ଅଧିକ ପୁରୁଣା ମୋଟରସାଇକେଲ୍ଗୁଡ଼ିକର ପଞ୍ଜୀକରଣ ରିନ୍ୟୁ ବାବଦ ଦେୟ ୧୦୦୦ ଟଙ୍କାରୁ ୨୦୦୦ ଟଙ୍କାକୁ ବଢ଼ିଛି । ସେହିଭଳି ତିନିଚକିଆ କ୍ଷେତ୍ରରେ ଏହା ୩,୫୦୦ ଟଙ୍କାରୁ ବଢ଼ି ୫,୦୦୦ ଟଙ୍କା ହୋଇଛି । ହାଲୁକା ମୋଟର୍ ଯାନର ପଞ୍ଜୀକରଣ ରିନ୍ୟୁ ବାବଦ ଦେୟ ୧୦,୦୦୦ ଟଙ୍କାକୁ ବଢ଼ାଯାଇଛି ।
ସେହିଭଳି ଆମଦାନି ହୋଇଥିବା ଦୁଇଚକିଆ ଏବଂ ତିନିଚକିଆର ପଞ୍ଜୀକରଣ ରିନ୍ୟୁ ଫି’ ୨୦,୦୦୦ ଟଙ୍କାକୁ ବୃଦ୍ଧି କରାଯାଇଛି । ପୁରୁଣା ଇମ୍ପୋର୍ଟେଡ୍ କାର୍ର ପଞ୍ଜୀକରଣ ରିନ୍ୟୁ ବାବଦ ଫି’କୁ ବର୍ତ୍ତମାନର ୧୦,୦୦୦ ଟଙ୍କାରୁ ବଢ଼ାଯାଇ ୮୦,୦୦୦ ଟଙ୍କା କରାଯାଇଛି । ଏହି ଫି’ ସହିତ ଜିଏସ୍ଟି ମିଶାଯାଇ ନ ଥିବା ସଡ଼କ ପରିବହନ ଏବଂ ରାଜପଥ ମନ୍ତ୍ରାଳୟ ପକ୍ଷରୁ ଜାରି ବିଜ୍ଞପ୍ତିରେ ଉଲ୍ଲେଖ କରାଯାଇଛି ।
