ନୂଆଦିଲ୍ଲୀ,୨୦/୮: ଗୁଜୁରାଟ ଅହମ୍ମଦାବାଦର ଏକ ଘରୋଇ ସ୍କୁଲରେ ଅଘଟଣ।ନବମ ଶ୍ରେଣୀ ଛାତ୍ରର ଆକ୍ରମଣରେ ଦଶମ ଶ୍ରେଣୀ ଛାତ୍ର ମୃତ। ଛାତ୍ରଙ୍କୁ ଛୁରି ଭୁସି ହତ୍ୟା କରାଯାଇଥିବା ଅଭିଯୋଗ। ସ୍କୁଲରେ ପଶି ଭଙ୍ଗାରୁଜା କଲେ ଉତ୍ତ୍ୟକ୍ତ ପରିବାର । 

ସୂଚନା ମୁତାବକ, ମଙ୍ଗଳବାର ଦିନ  ଅହମ୍ମଦାବାଦର ଖୋଖରାରେ ଅବସ୍ଥିତ ଏକ ଘରୋଇ ସ୍କୁଲରେ ଦଶମ ଶ୍ରେଣୀର ଛାତ୍ର ୧୫ ବର୍ଷୀୟ ନୟନଙ୍କୁ ୯ମ ଶ୍ରେଣୀର ଜଣେ ଛାତ୍ର ଛୁରୀରେ ଆକ୍ରମଣ କରିଥିଲେ। ନୟନଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ଡାକ୍ତରଖାନାକୁ ନିଆଯାଇଥିଲା।  କିନ୍ତୁ ସେଠାରେ ଚିକିତ୍ସାଧିନ ଅବସ୍ଥାରେ ନୟନଙ୍କ ମୃତ୍ୟୁ ହୋଇଥିଲା। ତେବେ ମୃତ ଛାତ୍ରଟି ସିନ୍ଧି ସମ୍ପ୍ରଦାୟର ହୋଇଥିବା ବେଳେ ଅଭିଯୁକ୍ତ ଛାତ୍ରଟି ମୁସଲମାନ, ଯାହା ଫଳରେ  ସାମ୍ପ୍ରଦାୟିକ ଉତ୍ତେଜନା ଦେଖିବାକୁ ମିଳିଛି। ଅନ୍ୟପଟେ ଏହି ଘଟଣାକୁ ନେଇ ବୁଧବାର ଦିନ ଉତ୍ତ୍ୟକ୍ତ ଲୋକେ ସ୍କୁଲରେ ଭଙ୍ଗାରୁଜା କରିଥିଲେ।  ସ୍କୁଲ କର୍ମଚାରୀମାନଙ୍କୁ ମଧ୍ୟ ମାଡ଼ ମରାଯାଇଥିଲା। ଏନେଇ ସ୍କୁଲରେ ପୁଲିସ ଫୋର୍ସ ମୁତୟନ କରାଯାଇଛି। ଏଥିସହ ନୟନଙ୍କୁ ଆକ୍ରମଣ କରିଥିବା ନବମ ଶ୍ରେଣୀ ଛାତ୍ରକୁ ପୁଲିସ ଅଟକ ରଖିଛି। ସେହିପରି ଅଭିଯୁକ୍ତ ଛାତ୍ରଙ୍କ ବ୍ୟତୀତ, ଅଭିଭାବକମାନେ ସ୍କୁଲର ପ୍ରଧାନଶିକ୍ଷକ ଏବଂ ପରିଚାଳନା ବିରୋଧରେ ମାମଲା ରୁଜୁ କରିବାକୁ ଦାବି କରିଛନ୍ତି। ପ୍ରତିବାଦ କରୁଥିବା ଜଣେ ଅଭିଭାବକ କହିଛନ୍ତି ଯେ ,ଆମିଷ ଖାଦ୍ୟକୁ ନେଇ ଦୁଇ ଛାତ୍ରଙ୍କ ମଧ୍ୟରେ ଝଗଡ଼ା ହୋଇଥିଲା।ଛାତ୍ରଙ୍କ ମୃତ୍ୟୁ ପରେ, ସିନ୍ଧି ସମ୍ପ୍ରଦାୟ, ଅଭିଭାବକ, ହିନ୍ଦୁ ସଂଗଠନ ଏବଂ ABVP ସ୍କୁଲରେ ପହଞ୍ଚି ଭଙ୍ଗାରୁଜା କରିଥିଲେ।