ନୂଆଦିଲ୍ଲୀ,୨୦/୧୦: ଆମେରିକାରେ ପୁଣି ଫୁଟିଲା ଗୁଳି । ମିସିସିପିର ଲେକ୍ସଟନ୍ଠାରୁ ପ୍ରାୟ ତିନି କିଲୋମିଟର ଦୂରରେ ଥିବା ହୋମସ୍ କାଉଣ୍ଟି କନ୍ସୋଲିଡେଡ୍ ସ୍କୁଲରେ ହୋଇଛି ଗୁଳିମାଡ । ସ୍କୁଲରେ ଫୁଟବଲ ମ୍ୟାଚ ପରେ ପାଳନ ହେଉଥିଲା ବିଜୟ ଉତ୍ସବ । ପ୍ରାୟ ଦୁଇ ଶହରୁ ୩ ଶହ ଲୋକ ଏହି ବିଜୟ ଉତ୍ସବ ପାଳନ କରୁଥିବା ବେଳେ ଦୁଇ ଜଣ ବନ୍ଧୁକଧାରୀ ସ୍କୁଲ ଭିତରେ ପଶି ଆଖିବୁଜା ଗୁଳିମାଡ କରିଥିଲେ । ଫଳରେ ଏଥିରେ ୩ ଜଣଙ୍କର ମୃତ୍ୟୁ ହୋଇଥିବା ବେଳେ ୮ଜଣ ଗୁରୁତର ଆହତ ହୋଇଛନ୍ତି ।
ଏନେଇ ହୋମସ୍ କାଉଣ୍ଟିଂର ସରିଫ୍ ୱିଲି ମାର୍ଚ୍ଚ କହିଛନ୍ତି ଯେ, ଏହି ଉତ୍ସବରେ ଯୋଗ ଦେଇଥିବା କିଛି ଲୋକଙ୍କ ମଧ୍ୟରେ ବଚସା ଯୋଗୁଁ ଗୁଳି ବିନିମୟ ହୋଇଥିଲା । କିନ୍ତୁ ଗୁଳିଚାଲାଣର ପ୍ରକୃତ କାରଣ କଣ ବର୍ତ୍ତମାନ ଯାଏଁ ଜଣାପଡିନି । ଏନେଇ ଘଟଣାର ତଦନ୍ତ ଜାରି ରଖିଛି ପୋଲିସ । ସେହିପରି ଅନ୍ୟପଟେ ଜର୍ଜିଆର ସାପେଲୋ ଦ୍ୱୀପରେ ଏକ ଡଙ୍ଗା ଦୁର୍ଘଟଣାରେ ପ୍ରାୟ ୭ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଜିନହୁଆ ନ୍ୟୁଜ୍ ଏଜେନ୍ସି ରିପୋର୍ଟ ଅନୁୟାୟୀ, ଡଙ୍ଗାରେ ଉତ୍ସବ ପାଳନ ପାଇଁ ଲୋକମାନେ ଡଏକାଠି ହୋଇଥିଲେ। କିନ୍ତୁ ଡଙ୍ଗା ଭାରସାମ୍ୟ ହରାଇ ପାଣିରେ ବୁଡିଯାଇଥିଲା । ଫଳରେ ପାଣିରେ ବୁଡ଼ି ୭ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟମାନଙ୍କ ଉଦ୍ଧାର କାର୍ଯ୍ୟ ଜାରି ରହିଛି ।
