ଭୁବନେଶ୍ୱର,୦୭/୦୮: ହସ୍ତତନ୍ତ ବୁଣାକାରଙ୍କ ପାଇଁ ଖୁସି ଖବର । କାରିଗମାନଙ୍କ ଘରେ ନିର୍ମାଣ ହେବ ତନ୍ତଶାଳ । ଏଥିପାଇଁ ସରକାର ହିତାଧିକାରୀ ଚିହ୍ନଟ ସହ ପାଣ୍ଠି ଯୋଗାଇ ଦେବେ । ଏହାଦ୍ୱାରା କାରିଗରମାନେ ବୁଣାବୁଣି ଓ ଆନୁସଙ୍ଗିକ କାମ ସୁରୁଖୁରୁରେ କରିପାରିବେ। ଏ ସଂପର୍କିତ ନୂଆ ଯୋଜନା ଖୁବଶୀଘ୍ର ରାଜ୍ୟରେ ଆରମ୍ଭ କରିବାକୁ ନୀତିଗତ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର ।
ରାଜ୍ୟରେ ପ୍ରାୟ ୧.୨୫ ଲକ୍ଷ ବୁଣାକାର ଲୁଗାପଟା ବୁଣାବୁଣି କରି ପରିବାର ଭରଣ ପୋଷଣ କରୁଛନ୍ତି । ପାରମ୍ପରିକ ଭାବେ ସେମାନେ ଏହି କାମ କରି ଆସୁଥିଲାବେଳେ ସେମାନଙ୍କ ପାଇଁ ତନ୍ତଶାଳ ଜରୁରି । ସରକାର ବହୁ ବୁଣାକାରଙ୍କୁ ଇନ୍ଦିରା ଆବାସ, ବିଜୁ ପକ୍କା ଘର ଅବା ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଯୋଗାଇଛନ୍ତି । ହେଲେ ଯେତିକି ସ୍ଥାନରେ ଘର ହୋଇଛି ସେଠି ତନ୍ତଶାଳ ବସାଇବା ସହକଞ୍ଚାମାଲ ଓ ରଙ୍ଗ ଆଦି ରଖିବା ସମ୍ଭବ ହେଉନି । ବହୁ ବୁଣାକାର ଉନ୍ନତମାନର ହସ୍ତତନ୍ତ ସାମଗ୍ରୀ ପାଇଁ ଯନ୍ତ୍ରପାତି ମଧ୍ୟ ବ୍ୟବହାର କରିବାକୁ ଚାହୁଁଛନ୍ତି । ମାତ୍ର ନିଜ ଘରେ ସ୍ଥାନ ଅଭାବ ସେମାନଙ୍କ ପାଇଁ ବଡ଼ ବାଧକ ସାଜିଛି । ଏହାକୁ ଦୃଷ୍ଟିରେ ରଖି ସରକାର ଏଣିକି ବୁଣାକାରମାନଙ୍କ ଘରେ ତନ୍ତଶାଳ ନିର୍ମାଣ ପାଇଁ ଆର୍ଥିକ ସହାୟତା ଯୋଗାଇ ଦେବେ । ଆଦିବାସୀ ଓ ପଛୁଆ ଜିଲ୍ଲାରେ ହିତାଧିକାରୀଙ୍କୁ ୧ ଲକ୍ଷ ୩୦ ହଜାର ଏବଂ ଅନ୍ୟ ଜିଲ୍ଲାରେ ୧ ଲକ୍ଷ ୨୦ ହଜାର ଟଙ୍କାର ସରକାରୀ ସହାୟତା ମିଳିବ । ବୁଣାକାରଙ୍କ ଘରର ପ୍ରଥମ ମହଲାରେ ଏହି ତନ୍ତଶାଳ ନିର୍ମାଣ ହେବ । ଏହା ବୁଣାକାର ଓ ଶ୍ରମିକଙ୍କ ଦକ୍ଷତା ବୃଦ୍ଧି ସହ ବର୍ଷା, ଅଗ୍ନିକାଣ୍ଡରୁ ସୁରକ୍ଷା ଦେବ । ଯୋଗ୍ୟ ହିତାଧିକାରୀ ଚୟନ ପାଇଁ ସରକାର ମାର୍ଗଦର୍ଶିକା ପ୍ରସ୍ତୁତ କରିଛନ୍ତି ।
ଏହି ମାର୍ଗଦର୍ଶିକା ଅନୁଯାୟୀ, ହସ୍ତତନ୍ତ ଜନଗଣନାରେ ସର୍ଭେ ଡାଟାବେସରେ ଯେଉଁ ବୁଣାକାରଙ୍କ ନାମ ଥିବ ସେ ପରିବାରରୁ ଜଣକୁ ଏ ସହାୟତା ମିଳିବ । ପରିବାରର କେହି ସରକାରୀ ଚାକିରି କରିନଥିବେ ଏବଂ ପରିବାରର ଆୟ ବାର୍ଷିକ ୩ ଲକ୍ଷ ଟଙ୍କାରୁ ଅଧିକ ହୋଇ ନଥିବ । ପରିବାରର ୫୦ ପ୍ରତିଶତ ଆୟ ହସ୍ତତନ୍ତ କାମରୁ ହିଁ ହେବା ଜରୁରି । ସଂପୃକ୍ତ ପରିବାର ନାମରେ ଜମିର ମାଲିକାନା ଥିବା ଆବଶ୍ୟକ । ପ୍ରଥମ ମହଲାରେ ତନ୍ତଶାଳ ନିର୍ମାଣ ପୂର୍ବରୁ ତଳ ମହଲାର ନିର୍ମାଣ କେତେ ସୁଦୃଢ଼ ଅଛି ତାହା ସରକାରୀ ଇଂଜିନିୟର ଯାଞ୍ଚ କରିବେ ।
ଯୋଗ୍ୟ ହିତାଧିକାରୀ ଚିହ୍ନଟ ପରେ ‘ଆବାସ’ ଭଳି ୪ଟି ପର୍ଯ୍ୟାୟରେ ଏହି ପାଣ୍ଠି ମିଳିବ । ୨୪୦ ବର୍ଗଫୁଟର ପକ୍କା ଛାତ ଘର ନିର୍ମାଣ ହୋଇ ତନ୍ତଶାଳ ବସିବ । ଯେଉଁ ବୁଣାକାରମାନେ ପ୍ରଥମ କିସ୍ତି ପାଇବାର ୩ ମାସ ମଧ୍ୟରେ ସଂପୂର୍ଣ୍ଣ କାମ ଶେଷ କରିବେ ତାଙ୍କୁ ୨୦ ହଜାର ଏବଂ ୪ ମାସରେ ସାରିଲେ ଅଧିକ ୧୦ ହଜାର ଟଙ୍କାର ପ୍ରୋତ୍ସାହନ ରାଶି ଦେବେ ସରକାର । ୬ ମାସ ମଧ୍ୟରେ କିନ୍ତୁ ସରକାର ଏ ତନ୍ତଶାଳ ନିର୍ମାଣ ଶେଷ କରିବାକୁ ଯୋଜନାରେ ପ୍ରସ୍ତାବ ରଖିଛନ୍ତି ।
