ଭୁବନେଶ୍ୱର,୦୨/୦୧: ଶିଳ୍ପପତିଙ୍କୁ ବ୍ଲାକ୍ମେଲ କରି ଠକେଇ କରିବା ଘଟଣାରେ ହର୍ଷପ୍ରିୟା ମିଶ୍ର ଓରଫ ହଂସିକା ଓ ତାଙ୍କ ସହଯୋଗୀ ଅନିଲ୍ ମହାନ୍ତିଙ୍କୁ ଗିରଫ କରିଥିଲା ଇନ୍ଫୋସିଟି ଥାନା ପୁଲିସ୍ । ତଦନ୍ତ ସମୟରେ ପୁଲିସ୍ ହାତରେ ବିସ୍ଫୋରକ ତଥ୍ୟ ଲାଗିଛି । ହଂସିକା ନିଜକୁ ବ୍ୟବସାୟୀ ବୋଲି ପରିଚୟ ଦେଇ ଅନେକ ପ୍ରତିଷ୍ଠିତ ବ୍ୟବସାୟୀ ଓ ଶିଳ୍ପପତିଙ୍କୁ କୋଟି କୋଟି ଟଙ୍କା ଚୂନ ଲଗାଇଛନ୍ତି । ଯାହାର ପ୍ରମାଣ ପୁଲିସ୍ ହାତରେ ଲାଗିଛି । କେଉଁଠୁ ତଦନ୍ତ ଆରମ୍ଭ କରିବା ତାକୁ ନେଇ ଏବେ ଚିନ୍ତାରେ ପଡ଼ିଛି ପୁଲିସ ।
ହଂସିକା ଓ ଅନିଲ୍ଙ୍କ ଫୋନ୍ ଓ ଆକାଉଣ୍ଟ ଯାଞ୍ଚ କରିଛି ପୁଲିସ । ଅନିଲ୍ ବିଭିନ୍ନ ବ୍ୟବସାୟୀଙ୍କ ପାଖକୁ ଯାଉଥିଲେ । ତାଙ୍କ ପାଖରେ କୋଟି କୋଟି ଟଙ୍କା ନିବେଶ କରିବାକୁ ପ୍ରସ୍ତାବ ଦେଉଥିଲେ । ବ୍ୟବସାୟୀ ଜଣଙ୍କ ରାଜି ହେଲା ପରେ ଅନିଲ୍ ତାଙ୍କ ପାଖକୁ ହଂସିକାଙ୍କୁ ପଠାଉଥିଲେ । ଆଉ ପରିଚୟ ଦେଉଥିଲେ ହଂସିକା ହେଉଛନ୍ତି ତାଙ୍କ ପାର୍ଟନର । ବ୍ୟବସାୟୀଙ୍କ ସହ ବିଭିନ୍ନ ହୋଟେଲ୍ରେ ହଂସିକା ରହୁଥିଲେ । ପରେ ମଉକା ଦେଖି ପ୍ରତିଷ୍ଠିତ ବ୍ୟବସାୟୀଙ୍କୁ ବ୍ଲାକ୍ମେଲ୍ କରୁଥିଲେ । ଅଧିକାଂଶ ସମୟରେ ହଂସିକା ନିଜକୁ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପି.କେ ମିଶ୍ରଙ୍କ ଝିଅ ବୋଲି ପରିଚୟ ଦେବା ସହ ପିଏମ୍ଓରେ ଭଲ ସେଟିଂ ଅଛି କହି ଧମକ ଦେଇ ଟଙ୍କା ରୋଜଗାର କରୁଥିଲେ ।
୨୦୨୩ରେ ଅନିଲ୍ଙ୍କ ଜନ୍ମଦିନରେ ହଂସିକା ତାଙ୍କୁ ୨ କୋଟି ଟଙ୍କା ମୂଲ୍ୟର ଏକ କାର୍ ଓ ୩୦ ଲକ୍ଷ ଟଙ୍କାର ଏକ ହାତଘଣ୍ଟା ଉପହାର ଦେଇଥିଲେ । ଗତ ୨୩ ତାରିଖରେ ଅନିଲ୍ଙ୍କ ଜନ୍ମଦିନ ଥିଲା । ସେ ଦିନ ମଧ୍ୟ ତାଙ୍କୁ ଦେଢ଼ କୋଟି ଟଙ୍କାର ଏକ କାର୍ ଉପହାର ଦେଇଥିଲେ । ଶିଳ୍ପପତି, ବ୍ୟବସାୟୀ ଓ ରାଜନେତାଙ୍କ ଶହ ଶହ ଅଶ୍ଳୀଳ ଫଟୋ ହଂସିକାଙ୍କ ପାଖରେ ରହିଛି । ଯାହାକୁ ଅସ୍ତ୍ର କରି ଏହି ଦୁଇ ଅଭିଯୁକ୍ତ ସବୁ ଜାଗାରେ ନିଜର କାମ ହାସଲ୍ କରୁଥିଲେ । ଏହି ଦୁଇ ଜଣ ଗିରଫ ହେବା ପରେ ପୁଲିସ୍ ଆଶା କରିଥିଲା ଉଭୟଙ୍କ ବିରୋଧରେ ଅଭିଯୋଗର ଫର୍ଦ୍ଦ ଲମ୍ବିବ । ହେଲେ ଲୋକ ଲଜ୍ଜା ଭୟରେ କେହି ଏତଲା ଦେବାକୁ ଆସୁନାହାନ୍ତି । ପୁଲିସ୍ ନିଜ ଆଡୁ କିଛି ଲୋକଙ୍କୁ ଯୋଗାଯୋଗ କରିଥିଲା । ହେଲେ ସେମାନେ କୌଣସି ଅଭିଯୋଗ କରିବେ ନାହିଁ ବୋଲି କହିଛନ୍ତି ।
ସୂଚନା ମୁତାବକ, ୫୦ କୋଟିର ଡିଲ୍ ଫାଇନାଲ୍ ହେଲେ ୨୦% ଦେବେ ବୋଲି ପଟିଆର ଏକ ଶିଳ୍ପପତି ହଂସିକା ଓ ଅନିଲ୍ଙ୍କୁ କହିଥିଲେ। ଟଙ୍କା ମିଳିବା ପରେ ୨୦% କମିଶନ ନମିଳିବାରୁ ଶିଳ୍ପପତିଙ୍କୁ ବଦନାମ କରି ଦେବେ ବୋଲି ଧମକ ଦେବା ସହ ବ୍ଲାକ୍ମେଲ କରିଥିଲେ ଏହି ଦୁଇ ଅଭିଯୁକ୍ତ । ଏନେଇ ଇନଫୋସିଟି ଥାନାରେ ଅଭିଯୋଗ ହେଲା ପରେ ପୁଲିସ୍ ଦୁଇ ଜଣଙ୍କୁ ଗତ ୨୯ ତାରିଖରେ ଗିରଫ କରିଥିଲା । ଉଭୟଙ୍କୁ ରିମାଣ୍ଡରେ ଆଣିବାକୁ ଆବେଦନ କରିଛି ପୁଲିସ୍ ।
