ନୂଆଦିଲ୍ଲୀ ୧୨/୧୨: ଜନ୍ମଦିନ, ବିବାହ କିମ୍ବା ବିବାହବାର୍ଷିକୀ ଅବସରରେ ଲୋକେ ପାର୍ଟି ଦେଉଥିବା ସମସ୍ତେ ଜାଣନ୍ତି । ତେବେ ହରିଆଣାର ଜଣେ ଯୁବକ ମନ୍ଜିତ ଛାଡ଼ପତ୍ର ପାର୍ଟି ଦେଇ ଚର୍ଚ୍ଚାକୁ ଆସିଛନ୍ତି । ସେ ୨୦୨୦ରେ କୋମଲଙ୍କୁ ବିବାହ କରିଥିଲେ । ଦୁର୍ଭାଗ୍ୟକୁ ଉଭୟଙ୍କ ମଧ୍ୟରେ ମନୋମାଳିନ୍ୟ ଦେଖାଯାଇଥିଲା । ସଂପର୍କରେ ଜଟିଳତା ବଢ଼ିବା ପରେ ଶେଷରେ ସେମାନେ ଚଳିତବର୍ଷ ଛାଡ଼ପତ୍ର ନେଇଛନ୍ତି । ତେବେ ଛାଡ଼ପତ୍ର ପରେ ନିକଟରେ ମନଜିତ୍ ଏକ ବିବାହବିଚ୍ଛେଦ ପାର୍ଟି ରଖିଥିଲେ । ସେଥିରେ ତାଙ୍କର ବିବାହ ସମୟର ଫଟୋ, ବିବାହ ତାରିଖ ସହିତ ଛାଡ଼ପତ୍ରର ତାରିଖ ଥିବା ପୋଷ୍ଟର ପ୍ରଦର୍ଶିତ ହୋଇଥିଲା । ଏହି ଅବସରରେ ସେ କେକ୍ କାଟି ଖୁସି ପାଳନ କରିଥିଲେ ।
କେବଳ ସେତିକି ନୁହେଁ, ସେ ପାର୍ଟିକୁ ଏକ ପ୍ରତିମୂର୍ତ୍ତି ମଧ୍ୟ ଆଣିଥିଲେ ଯାହାକି ତାଙ୍କର ପୂର୍ବତନ ପତ୍ନୀଙ୍କର ପ୍ରତିନିଧିତ୍ୱ କରୁଥିଲା । ବେକରେ ଫୁଲମାଳ ପକାଇ ସେହି ପ୍ରତିମୂର୍ତ୍ତି ସହିତ ସେ ପୋଜ୍ ଦେଇ କିଛି ଫଟୋ ଉଠାଇଥିବାବେଳେ ତାହା ସୋସିଆଲ୍ ମିଡିଆରେ ଭାଇରାଲ୍ ହେଉଛି । ଏହା ପୂର୍ବରୁ ଚଳିତବର୍ଷ ଜଣେ ମହିଳା ବିବାହବିଚ୍ଛେଦ ପରେ ଏକ ଡ୍ୟାନ୍ସ ପାର୍ଟିର ଆୟୋଜନ କରିଥିଲେ । ସେଥିରେ ସେ ଲୋକପ୍ରିୟ ବଲିଉଡ୍ ଗୀତର ତାଳେ ତାଳେ ନୃତ୍ୟ କରିଥିଲେ । ତାଙ୍କର ସେହି ଡ୍ୟାନ୍ସ ପାର୍ଟିର ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହୋଇଥିଲା ।
