ନୂଆଦିଲ୍ଲୀ, ୧୯।୩: ମାର୍ଚ୍ଚ ମାସ ଆରମ୍ଭରୁ ପ୍ରଚଣ୍ଡ ଖରା ସାଙ୍ଗକୁ ଜାରି ରହିଛି ଗୁଳୁଗୁଳି । ପ୍ରବଳ ଗରମରୁ ଆରାମ ପାଇବା ଲାଗି ଲୋକେ ଥଣ୍ଡା ପାନୀୟ ପିଇବା ଆରମ୍ଭ କରିଦେଲେଣି । ଏହି ଥଣ୍ଡା ପାନୀୟକୁ ନେଇ ନିକଟରେ ଚେତାବନୀ ଦେଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ । ଯଦି ଥଣ୍ଡା ପାନୀୟ ପିଉଛନ୍ତି ଏବେଠୁ ହିଁ ତୁରନ୍ତ ଏହାକୁ ପିଇବା ବନ୍ଦ କରନ୍ତୁ । କୋଲଡ୍ରିଙ୍କ୍ସ ଶରୀରରେ ଜଳର ପରିମାଣକୁ ହ୍ରାସ କରିବା ସହ ଏହା ସ୍ୱାସ୍ଥ୍ୟ ପାଇଁ ବିପଦପୂର୍ଣ୍ଣ ବି ହୋଇପାରେ । ଏନେଇ ଚେତାବନୀ ଜାରି କରିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଜଳବାୟୁ ପରିବର୍ତ୍ତନ ଏବଂ ମାନବ ସ୍ୱାସ୍ଥ୍ୟ କାର୍ଯ୍ୟକ୍ରମ ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ ଗରମ ସମୟରେ କାର୍ବୋନେଟେଡ୍ ଥଣ୍ଡା ପାନୀୟ ପିଇବା ଦ୍ୱାରା ଅଧିକ ଝାଳ ବାହାରିଥାଏ, ଯାହା ଶରୀରରେ ଜଳର ପରିମାଣକୁ ହ୍ରାସ କରିଥାଏ । ଏଥିପାଇଁ ଏକାଧିକ ସ୍ୱାସ୍ଥ୍ୟ ସମସ୍ୟା ଦେଖାଦେଇପାରେ । ଏହା ବ୍ୟତୀତ ଅତ୍ୟଧିକ ଗରମ ହେଉଥିଲେ, ଚା’ ଏବଂ କଫିରେ କ୍ୟାଫିନ୍ ବି ପିଇବା ମଧ୍ୟ ସ୍ୱାସ୍ଥ୍ୟ ପ୍ରତି ହାନିକାରକ । ଏହା ଶରୀରର ତାପମାତ୍ରା ବୃଦ୍ଧି କରି ଡିହାଇଡ୍ରେସନର ଆଶଙ୍କା ବଢ଼ାଇପାରେ । ମଧ୍ୟାହ୍ନ ୧୨ଟାରୁ ଅପରାହ୍ନ ୩ଟା ମଧ୍ୟରେ ସିଧାସଳଖ ସୂର୍ଯ୍ୟକିରଣଠାରୁ ଦୂରେଇ ରୁହନ୍ତୁ କୋଲ୍ଡ ଡ୍ରିଙ୍କ୍ସରେ ଅଧିକ ପରିମାଣର କ୍ୟାଫିନ୍ ଏବଂ ଚିନି ଥାଏ, ଯାହା ଶରୀରରୁ ଶୀଘ୍ର ଝାଳ ବାହାର କରିପାରେ ।
ଥଣ୍ଡା ପାନୀୟ ଶରୀରରେ ଆବଶ୍ୟକୀୟ ଖଣିଜ ପଦାର୍ଥ ଏବଂ ଇଲେକ୍ଟ୍ରୋଲାଇଟ୍ସ ହ୍ରାସ କରିପାରେ, ଯାହା ଥକ୍କାପଣ, ମୁଣ୍ଡବିନ୍ଧା ଏବଂ ଦୁର୍ବଳତାର କାରଣ ହୋଇପାରେ । କୋଲଡ୍ରିଙ୍କ୍ସ ପିଇବା ପରେ ବାରମ୍ୱାର ଶୋଷ ଲାଗିଥାଏ, କିନ୍ତୁ, ଏହା ଶରୀରରେ ପାଣିର ଆବଶ୍ୟକତା ପୂରଣ କରିପାରେନାହିଁ । ଏଥିପାଇଁ ଶରୀରରେ ପାଣିର ଅଭାବ ପରିଲକ୍ଷିତ ହୁଏ । ଏହାବ୍ୟତୀତ ଶରୀରରେ ପାଣିର ଅଭାବରୁ ବ୍ଲଡ୍ ପ୍ରେସର, ହୃଦ୍ସ୍ପନ୍ଦନ ବଢ଼ିପାରେ । ଶରୀରରେ ପାଣିର ଅଭାବରୁ କାରଣରୁ ଖରାଦିନେ ଶୀଘ୍ର ଅଂଶୁଘାତ ଶିକାର ହୋଇପାରନ୍ତି । ଦୁର୍ବଳ ଲାଗିବା ସହ ମୁଣ୍ଡ ବୁଲାଇବା ଭଳି ସମସ୍ୟା ଦେଖାଦେଇପାରେ । କିଡନୀ ଓ ମସ୍ତିଷ୍କ କୋଷିକାରେ କ୍ଷତି ପହଞ୍ଚାଇପାରେ । ସିଗାରେଟ୍, ବିଡ଼ି, ମଦ୍ୟପାନ କରୁଥିବା ବ୍ୟକ୍ତିଙ୍କଠାରେ ଡିହାଇଡ୍ରେସନ ସମସ୍ୟା ଥିଲେ ଶରୀରରେ ରକ୍ତ ଜମାଟ ବାନ୍ଧି ହାର୍ଟ ଆଟାକ ଭଳି ଆଶଙ୍କା ବଢ଼ିପାରେ ।
