ତେଲକୋଇ,୨୩/୦୮: ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ତେଲକୋଇ ଅଞ୍ଚଳ ବେହାଲ ହୋଇ ପଡ଼ିଛି । ବିଭିନ୍ନ ନଦୀ ନାଳ ଫୁଲିବା ସହିତ ସମଗ୍ର ତେଲକୋଇ ବ୍ଲକ ଅଞ୍ଚଳ ଯୋଗାଯୋଗ ବିଚ୍ଛିନ୍ନ ହୋଇ ପଡ଼ିଛି । ଶୁକ୍ରବାର ଅପରାହ୍ଣରୁ ଲଗାଣ ବର୍ଷା ହେବା ଫଳରେ ସମାକୋଇ ନଦୀ ପୋଲ ଉପରେ ଶନିବାର ଭୋରୁ ୩ଟାରୁ ୩ରୁ ୪ ଫୁଟ ଉଚ୍ଚରେ ବନ୍ୟା ଜଳ ପ୍ରବାହିତ ହେଉଥିବା ଦେଖିବାକୁ ମିଳିଛି ।
ସେହିପରି ହନୁମନ୍ତିଆ, ନୂଆଗଡ ଟେନାର, କରଦାଙ୍ଗୀ ଘୁରୁଡ଼ିଆ, ପିଟା ନାଳୀ ଆଦର୍ଶ ବିଦ୍ୟାଳୟକୁ ସଂଯୋଗ କରୁଥିବା ପୋଲ ଉପରେ ମଧ୍ୟ ବନ୍ୟା ଜଳ ପ୍ରବାହିତ ହେଉଛି । ଫଳରେ ତେଲକୋଇରୁ କଟକ, ଭୁବନେଶ୍ୱର, ଢେଙ୍କାନାଳ, ଅନୁଗୁଳ, ତାଳଚେର ଏବଂ ତେଲକୋଇରୁ ଜଗମୋହନପୁର ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇ ପଡ଼ିଛି । ପିଟା ନାଳୀ ସ୍ଥିତ ପୋଲ ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ଆଦର୍ଶ ବିଦ୍ୟାଳୟ ଓ ସାପଲାଞ୍ଜି ଗ୍ରାମକୁ ଯୋଗାଯୋଗ ବିଛିନ୍ନ ହୋଇଛି । ଅନ୍ୟପଟେ ରାଇସୁଆଁ ଅଞ୍ଚଳରେ ମଧ୍ୟ କେତେକ ପୋଲ ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ଉକ୍ତ ଅଞ୍ଚଳରେ ମଧ୍ୟ ଗମନାଗମନ ଓ ଯୋଗାଯୋଗ ପ୍ରଭାବିତ ହୋଇଥିବା ସୂଚନା ରହିଛି ।
ତେଲକୋଇ ବ୍ଲକର ଖୁଣ୍ଟା ପଡ଼ା, ଦେଉଳ ଡିହା, କରଦାଙ୍ଗୀ, ଭିମକାଣ୍ଡ, ପୋଡାଙ୍ଗ, ସିରିଗିଡା, ଆକୁଳ, କରମଙ୍ଗି, ବିମଳା, ପୁରୁଜୁଡ଼ା, ରାଇସୁଆଁ, କାଳିଆ ହତା ଆଦି ପଞ୍ଚାୟତର ଶତାଧିକ ଗାଁ ତେଲକୋଇ ବ୍ଲକ ମୁଖ୍ୟାଳୟରୁ ବିଚ୍ଛିନ୍ନ ରହିଛି । ଫଳରେ ଉକ୍ତ ଅଞ୍ଚଳରେ ଜରୁରୀ କାଳୀନ ସେବା ପ୍ରଭାବିତ ହୋଇଛି । ହନୁମନ୍ତିଆ ପୋଲ ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ଦୋବଲା ପାଳ, ଛାମୁଣ୍ଡା, ଜଗମୋହନପୁରରୁ ବିଞ୍ଜ ବାହାଳ ଆଦି ପଞ୍ଚାୟତର ୧୫ ରୁ ଉର୍ଦ୍ଧ୍ୱ ଗ୍ରାମ ବ୍ଲକ ମୁଖ୍ୟାଳୟରୁ ଯୋଗାଯୋଗ ବିଚ୍ଛିନ୍ନ ହୋଇ ରହିଛି । ଏଠାରେ ମଧ୍ୟ ଜରୁରୀ କାଳୀନ ସେବା ପ୍ରଭାବିତ ହୋଇଛି ।
କେତେକ ଅମାନିଆ ବନ୍ୟା ଜଳ ବହୁ ଥିବା ପୋଲ ଦେଇ ବିପଦ ସଙ୍କୁଳ ଭାବେ ଯିବା ଆସିବା କରୁଛନ୍ତି । ତେଲକୋଇ ବ୍ଲକ ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ କଡା ନଜର ରଖା ଯାଇଛି। ଶନିବାର ସକାଳ ସୁଦ୍ଧା ତେଲକୋଇ ରେ ୧୦୩ ମିଲି ମିଟର ବର୍ଷା ହୋଇଥିବା ପ୍ରଶାସନ ପକ୍ଷରୁ ରେକର୍ଡ କରାଯାଇଛି । ଶନିବାର ପୂର୍ବାହ୍ଣ ରୁ ବର୍ଷା ସାମାନ୍ୟ କମିଥିବାରୁ ନଦୀରେ ଜଳ ସ୍ତର ମଧ୍ୟ କ୍ରମଶଃ କମୁଥିବା ଦେଖା ଯାଇଛି । ମାତ୍ର ଯୋଗାଯୋଗ ଓ ଲୋକଙ୍କ ଜୀବନ ଯାତ୍ରା ସୁଗମ ହୋଇ ନାହିଁ ।
