ଚମ୍ପୁଆ, ୦୨/୧୧: ଝାଡଖଣ୍ଡ ସୀମା ବୈତରଣୀ ନଦୀ କଙ୍ଗିରା ମୁହାଣରେ ଅବସ୍ଥିତ ନୀଳକଣ୍ଠ ମହାଦେବ ମନ୍ଦିରର ଶିବ ଲିଙ୍ଗକୁ ଶୁକ୍ରବାର କେହି ଅସାମାଜିକ ବ୍ୟକ୍ତି ଭାଙ୍ଗି ଦେଇଛି । ଯେଉଁଥିପାଇଁ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଶୁକ୍ରବାର ଚମ୍ପୁଆ ସୀମାନ୍ତ ଝାଡ଼ଖଣ୍ଡର ଜୟନ୍ତୀ ଗଡରେ ହିନ୍ଦୁ ସଙ୍ଗଠନ ଓ ସ୍ଥାନୀୟ ଲୋକେ ଜାତୀୟ ରାଜପଥକୁ ଟାୟାର ଜଳାଇ ଅବରୋଧ କରିବା ସହ ବିରୋଧ ପ୍ରଦର୍ଶନ କରିଛନ୍ତି । ଜୟନ୍ତୀ ଗଡରେ ଶୁକ୍ରବାର ସନ୍ଧ୍ୟାରୁ ବିରୋଧ ପ୍ରଦର୍ଶନ ଆରମ୍ଭ ହୋଇଥିବା ବେଳେ ଶନିବାର ଚମ୍ପୁଆରେ ମଧ୍ୟ ତାର ପ୍ରଭାବ ପଡିଛି । ସ୍ଥାନୀୟ ଜନସାଧାରଣ ଚମ୍ପୁଆ ବସ ଷ୍ଟାଣ୍ଡ ନିକଟରେ ରାସ୍ତା ଅବରୋଧ କରିବା ସହ ବିକ୍ଷୋଭ ପ୍ରଦର୍ଶନ କରିବା ସହ ଚମ୍ପୁଆ ବନ୍ଦ କରିଛନ୍ତି । ଏହା ଯୋଗୁ ଚମ୍ପୁଆରେ ଗାଡ଼ି ମୋଟର, ସ୍କୁଲ କଲେଜ, କୋର୍ଟ କଚେରୀ, ବ୍ୟାଙ୍କ୍ ସମେତ ସରକାରୀ ଓ ବେସରକାରୀ କାର୍ଯ୍ୟାଳୟ ଗୁଡ଼ିକ ବନ୍ଦ ରହିଛି ।
ବୈତରଣୀ ନଦୀ କଙ୍ଗିରା ମୁହାଣରେ ଅବସ୍ଥିତ ଶତାଧିକ ବର୍ଷ ପୁରୁଣା ଏହି ମନ୍ଦିରରେ ଶୁକ୍ରବାର ସନ୍ଧ୍ୟା ସମୟରେ ଦ୍ଵୀପ ପ୍ରଜ୍ବଳନ କରିବାକୁ ମନ୍ଦିର ପରିସରକୁ ସ୍ଥାନୀୟ ଯୁବକ ମାନେ ଆସିଥିଲେ । ସେଠାରେ ଶିବ ଲିଙ୍ଗ ଭଙ୍ଗା ହୋଇଥିବା ନେଇ ଦେଖିବାକୁ ପାଇଥିଲେ । ସଙ୍ଗେ ସଙ୍ଗେ ଏହି ଖବର ବିଜୁଳି ବେଗରେ ବ୍ୟାପି ଯାଇଥିଲା । ଖବର ପାଇ ଜୟନ୍ତୀଗଡ, ଚମ୍ପୁଆ ତଥା ଆଖପାଖ ଗାଁର ଲୋକମାନେ ମନ୍ଦିରରେ ଏକାଠି ହୋଇଥିଲେ । ଖଣ୍ଡିତ ଶିବ ଲିଙ୍ଗକୁ ଦେଖି ଲୋକେ ଉତ୍ତ୍ୟକ୍ତ ହେବା ସହ ଏଭଳି କାଣ୍ଡ ଘଟାଇଥିବା ଦୁର୍ବୃତ୍ତ ମାନଙ୍କୁ ଗିରଫ ଦାବୀରେ ହୋ ହାଲ୍ଲା କରିଥିଲେ । ଏହା ସହ ପୋଲିସକୁ ମଧ୍ୟ ଏହି ଘଟଣା ସମ୍ୱନ୍ଧରେ ଖବର ଦେଇଥିଲେ । ଖବର ପାଇବା ପରେ ଜଗନ୍ନାଥପୁର ପୋଲିସ ନୀଳକଣ୍ଠ ମନ୍ଦିରରେ ପହଞ୍ଚି ସେଠାରେ ସ୍ଥିତି ଅନୁଧ୍ୟାନ କରିଥିଲେ। ଏହି ଘଟଣାକୁ ନେଇ ଶନିବାର ଚମ୍ପୁଆର ବିଭିନ୍ନ ହିନ୍ଦୁ ସଙ୍ଗଠନ ଚମ୍ପୁଆ ବନ୍ଦ କରିଛନ୍ତି । ଫଳରେ ସ୍କୁଲ, କଲେଜ ଏବଂ ଗାଡ଼ି ଚଳାଚଳ ସହିତ ଦୋକାନ ବଜାର ସମ୍ପୂର୍ଣ୍ଣ ବନ୍ଦ ରହିଛି । ରାସ୍ତାର ଦୁଇ ପାର୍ଶ୍ୱରେ ଶହ ଶହ ଗାଡ଼ି ଅଟକି ରହିଥିବା ଦେଖିବାକୁ ମିଳିଛି ।
