ଡେରାଡୁନ,୧୩/୦୩: ଉତ୍ତରାଖଣ୍ଡ ରାଜଧାନୀ ଡେରାଡୁନରେ ଭୀଷଣ ସଡକ ଦୁର୍ଘଟଣା ହୋଇଛି । ହିଟ୍ ଆଣ୍ଡ ରନ୍ ମାମଲା ସାମ୍ନାକୁ ଆସିଛି । ଏକ କାର୍ ଦ୍ରୁତ ଗତିରେ ମାଡି ଆସି ୬ ଜଣଙ୍କୁ ଧକ୍କା ଦେଇଛି । ୪ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୨ ଜଣଙ୍କର ଅବସ୍ଥା ସଂକଟାପନ୍ନ ରହିଛି । ଆହତଙ୍କ ଚିକିତ୍ସା ଚାଲିଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଗାଡି ଚାଳକ ଦୁର୍ଘଟଣା ଘଟାଇ ଚମ୍ପଟ ମାରିଛି ।
ଦ୍ରୁତ ଗତିରେ ଆସି ପିଟିଦେଲା କାର୍- ହୋଲିକୁ ଆଉ ୨ ଦିନ ବାକି ରହିଛି । ଏହା ପୂର୍ବରୁ ଡେରାଡୁନ ରାଜପୁର ରୋଡ ସାଇ ମନ୍ଦିର ନିକଟରେ ହିଟ୍ ଆଣ୍ଡ ରନ ଘଟଣା ଛାତିଥରାଇ ଦେଇଛି । ବୁଧବାର ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଛି । ଦ୍ରୁତ ଗତିରେ ମାଡି ଆସି ଏକ କାର ୬ଜଣ ଲୋକଙ୍କୁ ଧକ୍କା ଦେଇଥିଲା । ୪ ଜଣ ଶ୍ରମିକଙ୍କର ମୃତ୍ୟୁ ହୋଇଛି । ଆଉ ଦୁଇଜଣ ବାଇକ୍ ଚାଳକଙ୍କ ଅବସ୍ଥା ସଂକଟାପନ୍ନ ରହିଛି । ଦୁର୍ଘଟଣାର ଖବର ପାଇ ଆଇଜି ରାଜୀବ ସ୍ବରୁପ, ଏସଏସପି ଅଜୟ ସିଂହ, ଏସପି ସିଟି ସମେତ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚିଥିଲେ।
କାରଟି ପ୍ରଥମେ ରାସ୍ତାରେ ଯାଉଥିବା ୪ ଶ୍ରମିକଙ୍କୁ ଧକ୍କା ଦେଇଥିଲା । ଏହା ପରେ ବାଇକ୍ ରେ ଯାଉଥିବା ଦୁଇଜଣଙ୍କୁ ଧକ୍କା ଦେଇଥିଲା। ୨ ଆହତ ହସ୍ପିଟାଲରେ ଭର୍ତ୍ତି ହୋଇଛନ୍ତି । ମୃତ ୩ ଜଣଙ୍କର ପରିଚୟ ମିଳିଛି । ସେମାନେ ହେଲେ ମଂଶାରାମ (୩୦), ରଞ୍ଜିତ୍ (୩୫), ଧନୀରାମ । ଜଣଙ୍କର ପରିଚୟ ମିଳିନାହିଁ ।
ଦୁର୍ଘଟଣାର କାରଣ- ପୋଲିସ ପକ୍ଷରୁ ମିଳିଥିବା ସୂଚନାଅନୁସାରେ ଅଭିଯୁକ୍ତ ଘଟଣାସ୍ଥଳରୁ ଚମ୍ପଟ ମାରିଛି । ଖୋଜି ଖୋଜି ଜାରି ରହିଛି । ସିସିଟିଭି ଫୁଟେଜ ଯାଞ୍ଚ କରାଯାଉଛି । ସେହି ରୁଟରେ ଯାଉଥିବା ସମସ୍ତ ଗାଡିକୁ ତନ୍ନ ତନ୍ନ କରି ଯାଞ୍ଚ କରାଯ।ଉଛି । କେଉଁ ଗାଡି ଧକ୍କା ଦେଇଛି ତାହା ଖୁବ ଶୀଘ୍ର ଜଣାପଡିବ । ଏକ ମର୍ସିଡିଜ କାର ଧକ୍କା ଦେଇଥିବା କୁହାଯାଉଛି । ବେପରୁଆ ଗାଡି ଚାଳନା ପାଇଁ ଦୁର୍ଘଟଣା ଘଟିଥିବା ଅନୁମାନ କରାଯାଉଛି ।
